Ange Kagame wasabwe akanakobwa yashimangiye urwo akunda umusore bagiye kubana ubuziraherezo

Yanditswe na IGIHE
Kuya 31 Ukuboza 2018 saa 01:01
Yasuwe :
0 0

Ange Ingabire Kagame, ubuheta bwa Perezida Kagame na Madamu Jeannette Kagame, ku wa Gatanu w’iki Cyumweru yasabwe na Bertrand Ndengeyingoma, bitegura kubana akaramata.

Mu muco nyarwanda gusaba bifatwa nk’ubukwe bukomeye ku mukobwa kuko aribyo birori bibera mu rugo rw’ababyeyi be, bakishimira intambwe umwana wabo ateye nyuma yo gushimwa imico n’ubwiza.

Ni umunsi utibagirana ku miryango. Kuri Ange Kagame ntateze kuzibagirwa tariki ya 28 Ukuboza 2018, umunsi yasabwe n’umusore w’inshuti ye, Bertrand Ndengeyingoma.

Umuhango wo gusaba Ange ntiwagiraga uko usa ku gicamunsi cyo kuwa Gatanu uheruka. Wabereye mu Karere ka Rwamagana mu Murenge wa Muhazi, akagari ka Ntebe mu mudugudu w’Amagaju aho Umukuru w’Igihugu n’umuryango we batuye.

Witabiriwe n’inshuti n’imiryango ndetse n’abandi bantu ba hafi yaho. Abitabiriye ubu bukwe bahagarukiye ku Kimihurura ku Ngoro y’Inteko Ishinga Amategeko bari hamwe mu modoka za bisi zari nyinshi.

Nyuma y’ibi birori byaranzwe n’ibyishimo ndetse n’akanyamuneza mu buryo bujyanye n’umuco nyarwanda w’umwimerere, Ange Kagame yifashishije urukuta rwe rwa Twitter asangiza abamukurikira akari ku mutima we, dore ko n’ubusanzwe azwiho gukoresha cyane izi mbuga.

Ange Kagame yashimangiye urukundo akunda Ndengeyingoma bitegura kurushinga. Ati “Ku rukundo rw’ubuzima bwanjye, niteguye gukomeza ubuzima ndi kumwe nawe. Twembi, ubuziraherezo.”

Ange Kagame yashimiye kandi ababyeyi be bamureze kugeza akuze ndetse na basaza be batatu; Ivan Cyomoro Kagame, Brian Kagame na Ian Kagame; kimwe n’urungano rwe rwamubaye hafi kuri uyu munsi w’ibyishimo.

Mu kiganiro yigeze kugirana na IGIHE mu Ukwakira 2014, Ange Kagame kuri ubu ufite imyaka 25 yavuze ko ku bantu batamuzi, ari "inkoramutima, ngira urukundo kandi mporana icyizere".

Bertrand Ndengeyingoma wasabye Ange Kagame akomoka mu muryango wa rwiyemezamirimo Cyrille Ndengeyingoma. Yarangije amasomo muri Kaminuza ya Massachusetts Institute of Technology muri Leta Zunze Ubumwe za Amerika mu birebana na Civil Engineering na Architecture nyuma yo kwigira amashuri abanza n’ayisumbuye mu Rwanda. Ari mu bigiye amashuri yisumbuye muri "College Apacope".

Muri leta ya Massachusetts kandi niho Ange Kagame yasoreje amasomo ye ya Kaminuza Muri Smith College mu bijyanye n’ubumenyi mu bya politiki nyuma yo kwiga Green Hills na Dana Hall School.

Ange Kagame ari mu byishimo bikomeye nyuma yo gusabwa no gukwa na Bertrand Ndengeyingoma bitegura kubana akaramata
Yashimiye ababyeyi be bamureze bakanamwitaho kugera magingo aya
Ange Kagame mu ifoto y'urwibutso hamwe na basaza be
Ange Kagame yari agaragiwe n'urungano rwe kuri uyu munsi utazibagirana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza