00:00:00 IGIHE NETWORK KN KINYARWANDA EN ENGLISH FR FRANCAIS

Ubuhamya bw’umubyeyi wafashwe ku ngufu n’Interahamwe zikanamwicira abana

Yanditswe na Hakizimana Jean Paul
Kuya 22 April 2022 saa 09:18
Yasuwe :

Umukecuru w’imyaka 69 yagarutse ku kaga yahuye na ko muri Jenoside yakorewe Abatutsi mu 1994 yafashwe ku ngufu n’Interahamwe nyinshi mu bihe bitandukanye ndetse anicirwa abana be babiri areba.

Ibi yabitangaje mu buhamya yatanze ubwo hibukwagwa abagore n’abana bishwe muri Jenoside yakorewe Abatutsi mu 1994 i Sovu mu Karere ka Rwamagana.

Tariki ya 20 Mata yabaye umunsi mubi ku Batutsi bari bahungiye ku mashuri y’i Sovu mu Karere ka Rwamagana kuko abarenga 600 bahiciwe.

Abenshi mu biciwe i Sovu biganjemo abagore bicanywe ubugome bukabije, burimo kubanza kubasambanya, gufunga amadirishya y’amashuri bagashyiramo urusenda, abana bishe abandi bana, abagore bica abandi bagore n’ubundi bugome bwinshi bukabije.

Uyu mubyeyi ni umwe mu bari bahungiye kuri aya mashuri ya Sovu, ariko aza kwicirwa abana babiri muri batatu yari afite n’umugabo.

Yavuze ko aha i Sovu hari mu hantu Jenoside yakorewe Abatutsi yatangiye nyuma ariko ikoranwa ubugome bukabije.

Tariki ya 13 ngo nibwo ibitero bya mbere byatangiye kugabwa bituma bajya kwihisha iwabo barahasenya ariko bo ntibababona. Kuri uwo mugoroba abana batangiye kumusonzana afata icyemezo cyo kujya gushaka ibyo yabagaburira.

Ati “Mu gihe ngihetse umwana umwe nageze imbere mpura n’igitero cy’Interahamwe bamvugiriza induru gusa umwe muri bo ababuza kunyica ngo igihe cyo kwica abagore n’abana ntikiragera.”

Tariki ya 14 nibwo batangiye kwica, bica imwe mu miryango y’abatutsi yari ihari ku buryo ngo n’ubu yazimye burundu. Uyu mubyeyi we ngo yahise ajya kwa sebukwe babahisha iminsi ibiri ku munsi wa gatatu arahava.

Yarasambanyijwe

Tariki ya 18 ahagana saa tatu ngo nibwo Interahamwe zamuguyeho we n’abana be zitangira kumwambura imyenda ari nako zimukubita, umwe muri bo ngo yasabye ko bajya kubicira ku isambu yabo yari iri aho hafi.

Ati “Tugiye kugera aho ku isambu, umuhungu wanjye arambwira ngo wabansabiye imbabazi, umwe muri bo amubwira ko atabona imbabazi n’uko turamanuka yigiye imbere gato baba bamwiciye aho, murumuna we na we baba bamwiciye aho mbireba n’amaso.”

Uyu mubyeyi yavuze ko bahise bakurikizaho kumwambura imyenda baramusambanya nyuma yo kumukubita inkoni nyinshi cyane. Yavuze ko yahise atangira kwicwa n’agahinda akajya yicara ahantu ku nzira ku buryo ngo n’abandi benshi bamusambanyaga.

Yavuze ko nyuma haje Interahamwe iramuhagurutsa ariko ngo agenda atabasha gutambuka kuko bari bamukomerekeje cyane.

Bishwe nabi

Ku wa 20 Mata nibwo Abatutsi bari bahungiye i Sovu bishwe urw’agashinyaguro. Kuri iyo tariki na bwo haje igitero gifata uyu mubyeyi kimujyana ku mashuri ya Sovu ahari hagiye kwicirwa Abatutsi benshi.

Ati “Hari umukecuru wanyuzeho avuga ko bari guhunga Inkotanyi ngo kuko zageze i Rwamagana, umugabo witwa Moses ni we wavuze ngo abagore n’abana babakusanyirize mu mashuri, babwira ko bazajya babaha ibiryo kandi ari ukubegeranya ngo babone uko babicira hamwe.”

Yakomeje agira ati “Bahise batangira gukinga amadirishya ubundi bacana umuriro. Muri wa muriro bakamenamo urusenda kandi babakingiranye ku buryo umwotsi wavagamo waryanaga cyane.”

Yavuze ko ku mashuri y’i Sovu habereye ubugome bukabije ngo kuko hanagaragaye abagore bicaga, abana bicaga bagenzi babo.

Yatanze urugero rw’umugore wari utwite wabanje gusambanywa arangije aricwa, atanga n’urundi rw’umugore wishwe atewe ibisongo mu gitsina.

Kuri uwo munsi zimwe mu nterahamwe zari zaturutse i Munyaga n’izaturutse i Mwulire ziraye mu bagore n’abana bari bahungiye ku mashuri ya Sovu zirabica bose.

Bukeye bwaho Kayiraba wari wabashije kurokoka yagiye mu nkambi aho Inkotanyi zahurizaga Abatutsi n’abandi baturage zabaga zimaze kurokora. Ati “Iyo Inkotanyi zitaza tuba twarazimye twese kuko basanze na bake basigaye benda kutwica.”

Yahimiye Umukuru w’Igihugu ku butwari bwamuranze mu kuyobora Abanyarwanda no kububaka bakongera kuba umwe. Yavuze ko ikigega cya FARG cyamufashije kubona inzu yo kubamo naho Avega-Agahozo yo imufasha mu kudaheranwa n’agahinda ubu ngo ni umukecuru umeze neza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .