Shira amatsiko kuri Mutoni Assia wamamaye muri filime nyarwanda (Video)

Yanditswe na Uwiduhaye Theos
Kuya 22 Ukwakira 2018 saa 08:50
Yasuwe :
0 0

Abahoza amaso ku nsakazamashusho bareba filime nyarwanda, bakunze kubona umukobwa wakinnye mu Intare y’ingore yitwa Rosine.

Muri iyi filime akinamo ari umukobwa uhorana amagorwa ukundwa n’umusore, mukase ’Intare y’ingore’ akabyivangamo ndetse akabatandukanya akamuhuza n’undi mukobwa aba afite.

Uyu mukobwa w’imyaka 25 ubusanzwe yitwa Mutoni Assia, yavukiye Nyamagabe [ahahoze hitwa ku Gikongoro] mu ntara y’Amajyepfo. Umwaka ushize yasoje icyiciro cya kabiri cya kaminuza mu bijyanye n’ubukerarugendo.

Ahora atuje ariko iyo muganira akunda gutebya. Yivuga nk’umukobwa wari inkubaganyi kera akiri umwana ndetse akaba ingayi cyane ariko ngo ‘byose byari ubwana’.

Mu kiganiro na IGIHE yavuze ko yabyirukanye inzozi zo kuzaba umuririmbyi cyangwa umunyamakuru, ndetse yakundaga bikomeye Evelyne Umurerwa wa televiziyo y’u Rwanda, nyuma akaza kwisanga muri filime kubera ko n’ubundi akiri umwana yakinaga amakinamico.

Gukina amakinamico akaba ari nabyo byamuharuriye inzira yo gutangira gukina filime, ndetse mu 2012 atangira kujya mu zikomeye zanatumye atangira kwamamara.

Ati “Ubundi impano iyo uyifite ni ibintu byizana kuko impano iyo uyifite ntabwo yamara igihe itarigaragaza. Natangiye gukina amakinamico ndi umwana niga mu mashuri abanza, ngeze mu yisumbuye ntangira kwitabira ibya filime. Mu mpera za 2012 ndangije ayisumbuye mbitangira bya kinyamwuga mpita nkina mu yitwa Ibara.”

Uyu mukobwa amaze kugaragara muri filime zitandukanye zirimo Giramata, Intare y’ingore, Seburikoko, City Maid, Jibu, Close Chapter yo muri Tanzania ndetse akaba ari gutegura gukora filime ihuriyemo abakinnyi ba filime bakomoka muri Tanzania, u Rwanda na Nigeria.

Assia avuga ko mu buzima bwe abantu afata nk’intwari ari Perezida wa Repubulika y’u Rwanda Paul Kagame, Louise Mushikiwabo ndetse na Jeannette Kagame.

Avuga ko ahuye na Perezida Kagame yamubaza niba ajya abona umwanya wo kureba filime nyarwanda, yaba hari iyo yigeze kureba cyangwa ase ajya areba akamubaza ibyo abona abakina izi filime bahindura.

Icyo Assia atazibagirwa n’ukuntu akiri umwana yajyaga akunda kuba ingayi cyane, ati “Kera nkiri umwana nari umukobwa w’udukoryo gusa, nagiraga umururumba. Iyo mbitekereje uburyo nahoraga ndwanira ibiryo byinshi kandi ntari bubimare ndaseka.”

Umusore yakwishimira ko bakundana ni ufite indagaciro yo kwiyubaha ndetse akaba azi no kumwitaho.

Assia avuga ko adashobora kwishimira ahantu hatari mu Rwanda gusa ngo ashobora kwifuza gusohokera ahantu hatandukanye h’ubwiza nyaburanga nko kuri Miami cyangwa mu birwa bya Seyshelles.

Mutoni Assia amaze kwamamara cyane muri sinema nyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza