Basetse nyuma! Ibihe by’ingenzi byaranze umukino wa Musanze FC na Rayon Sports mu mafoto

Yanditswe na Ntare Julius
Kuya 6 Mutarama 2019 saa 11:16
Yasuwe :
0 0

Abahanga bavuga ko useka neza ari useka nyuma y’abandi! Ni ko byagendekeye abafana ba Rayon Sports bategereje iminota 86 kugira ngo bashyire agatima impembero nyuma y’aho Musanze FC yari yababereye ibamba.

Mu mukino wa shamiyona w’umunsi wa 13, ibintu byari ibicika mu Karere ka Musanze mu Ntara y’Amajyaruguru munsi y’Ikirunga cya Muhabura.

Kuri Stade Ubworoherane hari hakoraniye abafana ba Musanze FC ariko baganjijwe mu bwinshi n’aba-Rayon Sports bari baserutse mu myenda y’ubururi n’umweru.

Uyu mukino wari ishiraniro warangiye Rayon Sports icyuye amanota atatu ku ntsinzi y’ibitego bibiri kuri kimwe. Musanze FC ni yo yafunguye amazamu ku munota wa karindwi ku gitego cyatsinzwe na Shyaka Philbert.

Cyaje kwishyurwa na Bimenyimana Bonfils Caleb, habura iminota ine ngo umukino urangire Niyonzima Olivier Sefu ahesha abafana ba Rayon Sports ibyishimo by’umunsi.

Umufotozi wacu, Ntare Julius, yari kuri uyu mukino awukurikirana yifashishije camera ye. Ibi ni bimwe mu bihe byaranze uyu mukino mu mafoto.

Ikirere cya Musanze cyari gikeye mbere y'umukino
Wanyanza ntibimusaba ibyapa ngo atambutse ubutumwa , ni amarangi gusa ubundi agasoza ashimira ababusomye
Umutoza Robertinho usanzwe akunda abana bari mu bamwakiriye agisesekara kuri Stade Ubworoherane
Umukino umaze gutangira, Ikirunga cya Muhabura cyohereje udutonyanga kuri Stade Ubworoherane ariko ntacyo twahungabanyije ku migendekere yawo
Mbere y'uko umukino utangira, Robertinho yabanje guha amabwiriza myugariro w'iburyo Nyandwi Saddam
Perezida wa Musanze, Tuyishimire Placide (iburyo) na Muhizi (ibumoso) basesengura umukino w'ikipe babareye abayobozi
Umutoza wa Musanze FC, Ruremesha Emmanuel, ntiyishimiraga uko abakinnyi be batakagaza amahirwe y'ibitego
Ikibuga cya Stade Ubworoherane iyo bigeze ku zuba ahari itaka iyo habereye ikotaniro ivumbi riratumuka
Rutahizamu Bimenyimana Bonfils Caleb , myugariro wa Musanze Shyaka Philbert ndetse n'umunyezamu Ndayisaba Olivier bahuriye mu kirere barwanira umupira imbere y'izamu rya Musanze FC
Mudeyi Suleiman wahoze muri Musanze agenzura umupira ku kirenge imbere y'umutoza Ruremesha Emmanuel
Barirengako Frank umukinnyi wo hagati wa Musanze yiziritse kuri Sefu karahava
Akomeza kumukurura
Birangira amushyize hasi
Maze ahabwa ikarita y'umuhondo na Ruzindana Nsoro nawe ayakira ataburanye
Umunyezamu wa Musanze FC, Ndayisaba Olivier, yitegeye ikirunga cya Muhabura cyambaye ingofero mu masaha y'umugoroba
Mugisha François'' Master '' yishyushya mu gihe umutoza Robertinho ataramuhamagara ngo ajye gutiza umurindi ikipe ye
Nyuma y'uko myugariro wa Musanze Shyaka Philbert ashyize hasi Niyonzima Olivier Sefu yatangajwe n'uko umusifuzi atemeje ko ari ikosa
Kapiteni wa Musanze, Valeur Nduwayo, ntiyigeze yorohera umunya- Brésil, Jonathan Da Silva wagiye aremera Caleb uburyo bubyara ibitego
Hari aho byageraga Caleb akibaza impamvu amahirwe atabyara umusaruro
Habyarimana Eugène hamwe na Jonathan batanguranwa umupira mu kirere
Mudeyi Suleiman wari wakinishijwe nka rutahizamu uca ibumoso arekura umupira w'umuterekano awuganisha mu izamu rya Musanze ryari ririnzwe na Ndayisaba Olivier
Jonathan Da Silva yahushije igitego cyabazwe
Umunyezamu wa Musanze, Ndayisaba Olivier , yitwaye neza muri uyu mukino
Shyaka Philbert yatabaye izamu inshuro nyinshi
Mazimpaka André wafatiraga Musanze mu mwaka w'imikino ushize yari yagarutse guhangana n'ikipe yahozemo
Myugariro wa Rayon Sports wavuye muri Police umwaka ushize w'imikino, Hussein Habimana, yari yitwaye neza muri uyu mukino nk'umusimbura wa Rwatubyaye Abdoul
Mbere y'uko igitego cya kabiri kijyamo bamwe mu bafana ba Rayon Sports bari bataye icyizere ko uyu mukino bashobora kuwunganya cyangwa bakaba banawutsindwa
Ku mupira yahawe neza na Bukuru Christopher ku munota wa 86, Niyonzima Olivier ''Sefu'' yatunguye Ndayisaba Olivier umunyezamu wa Musanze maze amutsinda igitego cyatanze amanota
Ni igitego cyababaje cyane abakinnyi ba Musanze kuko nta yandi mahirwe bari bafite yo kugombora
Umutoza Robertinho yasabye abafana ba Rayon Sports guhaguruka kuko intsinzi ntakuka yari ibonetse
Yabaye nk'ukoza agati mu ntozi
Kapiteni wa Rayon Sports Manzi Thierry ni gutya yashimiye Bukuru Christopher ku bw'umupira mwiza yahaye Sefu ukavamo igitego cyatanze amanota atatu
Rwarutabura udatana n'udushya yahise ajya kwishimira igitego imbere y'abayobozi barimo na Meya wa Musanze akambakamba muri ubu buryo
Abapolisi bagiye kuhamukura ntibigeze bamufata kuko yabaciye mu rihumye maze asimbuka agana muri bagenzi be basangiye kwisiga amarangi
Ng'uwo mu kirere cya Stade Ubworoherane
Igitego cya kabiri cya Rayon Sports cyaje cyica imibare ya Ruremesha utarigaragariza abayobozi ndetse n'abakunzi ba Musanze FC
Icyizere cyari cyose ku bafana b'ubururu n'umweru
Haba ku myenda ndetse no ku mubiri ibara ni ubururu n'umweru
Chelsea nayo yambara nka Rayon Sports
Umukino urangiye Robertinho yagiye kwishimana na Ramadhani utoza abazamu ndetse na Kassim Ndayisenga umuzamu wa kabiri wa Rayon Sports
Igihe umusifuzi yahuhaga mu ifirimbi ko umukino urangiye abafana ba Gikundiro bari basazwe n'ibyishimo bagiye guterura umutoza Robertinho
Gusa yageze aho arabangira
Bakomeza guhatiriza
Bamukurura imyenda nawe ariko abacika
Yageze aho atabarwa na Nkunzingoma Ramadhan umutoza w'abanyezamu ndetse na Kassim Nzayisenga umunyezamu wa kabiri
Ramadhan yasabye abafana guha umutoza agahenge maze nabo baramwitaza
Abakinnyi ba Rayon Sports batanze ibyishimo kuri Stade Ubworoherane buri mufana wa Gikundiro yifuzaga kubakoraho
Mugisha François ''Master yagiye mu rwambariro mu kivunge cy'abafana
N'abana ntabwo bifuzaga kubarekura
Sefu yakorwagaho n'umugabo agasiba undi
Robertinho yasabaga abafana ko bamuha akayira akagera mu rwambariro gusa bo ntibabyumvaga bamwe bafataga udufoto tw'urwibutso
Uyu mufana hamwe na Ramadhan nibo bari barindiye Robertinho umutekano
Umwana wari uje kumusanganira ateze amaboko yasubijweyo n'umufana wari umurinze
Birangira abuze amahirwe yo guhobera umutoza w'ikipe yihebeye
Uyu byamurenze umwenda wo hejuru awukuramo
Yararamye areba ahanga amaso ibicu ashimira Imana ibakuyeho igisuzuguriro
Aba Skol yabafashije guhuza urugwiro
Ubururu n'umweru niwe muhuza wabo
Byari ibirori kuri Stade Ubworoherane
Bazamutse ku rubyiniro maze barabyina karahava

Kanda hano urebe uko uyu mukino wagenze umunota ku wundi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza