Ifoto y’Umunsi: Major Ntuyahaga yakiriwe n’umuryango we

Yanditswe na Akayezu Jean de Dieu
Kuya 24 Ukuboza 2018 saa 08:39
Yasuwe :
0 0

Abo mu muryango wa Major Ntuyahaga Bernard bishimiye kumwakira bamukorera ibirori nyuma yo koherezwa mu Rwanda n’u Bubiligi bwamuhamije uruhare mu rupfu rw’abasirikare babwo 10 barindaga Minisitiri w’Intebe, Uwiringiyimana Agathe.

Ntuhaga yagejejwe mu Rwanda ku wa 21 Ukuboza 2018, yakirwa nk’Umunyarwanda wahamijwe ibyaha ariko akarangiza igihano cye.

Amafoto yakwirakwiye ku mbuga nkoranyambaga agaragaza Ntuyahaga yishimanye n’abo mu muryango we, bitandukanye n’uko yavugaga ko atifuza kuza mu Rwanda ku bw’impungenge z’uko yafatwa nabi.

Maj. Ntuyahaga yageze mu Rwanda nyuma y’amezi atandatu arangije igifungo cy’imyaka 20 yakatiwe n’inkiko zo mu Bubiligi.

Ntuyahaga yashinjwe ko yavanye abasirikare 10 b’Ababiligi bari mu butumwa bw’amahoro bw’Umuryango w’Abibumbye mu Rwanda (MINUAR) mu 1994 kwa Uwiringiyimana bari bashinzwe kurinda, abashyira mu maboko y’abasirikare bagenzi be muri “Camp Kigali” baza kwicwa.

Uyu mugabo w’imyaka 66 yakunze kugaragaza impungenge ku kuzanwa mu Rwanda, yitwaje ko ubwo yakatirwaga n’Urukiko rwa Bruxelles mu 2007, rwamukuriyeho kurindirwa umutekano nk’uko biteganywa n’amasezerano ya Genève yo mu 1951.

Ubwo yagezwaga i Kigali, Komisiyo y’Igihugu yo gusezerera no gusubiza mu buzima busanzwe abahoze ari abasirikare yatangaje ko nyuma yo kumuha akaruhuko no gusura abo mu muryango we, azerekezwa i Mutobo ahatangirwa amasomo ku bahoze ari abasirikare mbere yo gusubizwa mu buzima busanzwe.

Icyo gihe Mukantabana Séraphine, uyobora iyi komisiyo yatangarije IGIHE ko “Maj Ntuyahaga yaje nk’uwahoze ari umusirikare, icyo azakora namara kuruhuka ni ukujya i Mutobo, agafashwa gusubira mu buzima busanzwe mu gihe cy’amezi atatu. Twamwakiriye nk’uwahoze mu gisirikare.”

Major Ntuyahaga aje yiyongera ku basaga ibihumbi 11, bahoze mu mitwe yitwaje intwaro biganjemo ababarizwaga muri FDLR, kuri ubu bamaze gusubizwa mu buzima busanzwe aho bari gufatanya n’imiryango yabo gutanga umusanzu mu kubaka igihugu.

Aba afite telefone avugana n'inshuti n'abavandimwe
Komisiyo yo gusezerera no gusubiza mu buzima busanzwe abahoze ari abasirikare izabanza kumujyana i Mutobo nk'uko bikorwa ku bandi
Major Ntuyahaga yageze mu Rwanda yakirirwa neza, ubu ni umuturage nk'abandi
Byari ibyishimo ku bo mu muryango wa Ntuyahaga bari bongeye kumubona

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza