Dusange no kuri
        
Uyu munsi mu Mateka

Tariki 25 ni umunsi wa 360 mu minsi igize umwaka, hasigaye iminsi 6 uyu mwaka ukagera ku musozo, dore ko uzagira iminsi 366.

Ni umunsi Abakristu bizihizaho ivuka ry’umwana w’Imana Yesu/Yezu Kristu uzwi cyane ku izina rya Noheli. Noheli iva ku ijambo natalis ry’ikilatini, mu gifaransa bakoresha noël, ikaba kandi ari na yo Christmas mu Cyongereza cyangwa se Christmas Day.

Umunsi wa noheli waba waremejwe kugira ngo uhurirane n’imboneko z’ukwezi kwa mbere kw’itumba (winter solstice) kuko Abaromani bawizihizaga ku itariki ya 25 Ukuboza buri mwaka.

N’ubwo bwose ari umunsi witabwaho cyane n’abakristo, bamwe mu batizera gikristo benshi bawizihiza nk’umunsi wo gusabana n’imiryango, no kuruhuka.

Ijambo Christmas ni ijambo ryunze riva kuri “Christ’s mass” (misa ya Kristo). Iva kandi ku ijambo ry’icyongereza cyo hagati y’umwaka wa 900 n’uwa 1600 ’Christemasse’ rikaba ryarakoreshejwe bwa mbere mu 1038 nk’uko amateka abyerekana.

Bimwe mu byaranze uyu munsi

1927: Mu gihugu cya Vietnam, hashinzwe umutwe wa politiki witwa Vietnamese Nationalist Party

1932: Mu gihugu cy’u Bushinwa humvikanye umutingito wibasiye bikomeye agace ka Gansu; uyu mutingito wari ku gipimo cyigera kuri 7.6 urebeye ku ngero za Richter, uhitana abantu 275.

1941: Mu Ntambara ya Kabiri y’Isi yose, ingabo z’u Buyapani zakubise inshuro iza Hong Kong mu gitero cyarangiye u Buyapani buyigaruriye.

1947: Mu gihugu cy’u Bushinwa batangiye kubahiriza itegeko nshinga.

1974: Inkubi y’umuyaga uzwi cyane nka Cyclone wibasiye agace ka Darwin mu Majyaruguru ya Australia.

1977: Minisitiri w’Intebe wa Israel Menachem Begin yagiranye ibiganiro na Perezida wa Misiri Anwar Sadat bigamije amahoro, bahuriye mu gihugu cya Misiri.

Amwar Sadat na Menachem Begin

1989: Nicolae Ceauşescu wigeze kuyobora igihugu cya Romania, we n’umufasha we bakatiwe igihano cyo kwicwa nyuma y’urubanza rutamaze igihe kirekire baruburana.

1990: Igeregezwa ry’uburyo bukoresha ikoranabuhanga rya internet bwashoboye gutanga icyizere n’ibisubizo bihamye. Ubu ni uburyo bumenyerewe nka World Wide Web bukoreshwa mu ikranabuhanga rya internet.

1991: Mikhail Gorbachev wari Perezida wa Leta Zunze Ubumwe z’Abasoviyete yeguye ku mirimo ye, nyuma y’umunsi umwe yeguye kuri iyi mirimo iki gihugu cyari kigizwe na leta zishyize hamwe cyahise gisenyuka, aho ku ikubitiro Ukraine ariyo yabimburiye ibindi ibinyujije muri kamarampaka y’abaturage bayo.

2000: Perezida w’u Burusiya Vladimir Putin yashyize umukono ku itegeko rishyiraho indirimbo nshya yubahiriza igihugu cye, iyi ndirimbo yahimbwe na Alexander Vasilyevich Alexandrov.

Bamwe mu bavutse uyu munsi

1918: Ahmed Ben Bella, wabaye Perezida wa mbere wa Algeria.

1924: Atal Bihari Vajpayee, wabaye Minisitiri w’Intebe w’u Buhinde.

Bamwe mu batabarutse uyu munsi

2007: Mighty King Kong, umuhanzi wo mu njyana ya Reggae ukomoka mu gihugu cya Kenya.

2010: Carlos Andrés Pérez wabaye Perezida wa Venezuela.