Amerika igiye kwirukana Abanya-Salvador ibihumbi 200 icumbikiye

Yanditswe na Evariste Nsengimana
Kuya 9 Mutarama 2018 saa 12:39
Yasuwe :
0 0

Leta Zunze Ubumwe za Amerika zatangaje ko mu 2019, Abanya-Salvador basaga ibihumbi 200, bazamburwa uburenganzira bwo guturayo, mu rwego rwo gushyira mu bikorwa icyemezo cya Perezida Donald Trump cyo gukumira abimukira n’ababayo mu buryo bunyuranije n’amategeko.

Mu 2001, nibwo umutingito wibasiye ibihugu byo muri Amerika yo hagati birimo na El Salvador, usiga ibihumbi byinshi by’abaturage batagira aho gukinga umusaya, abandi benshi barahunga, bamwe bagana muri Amerika bahabwa ubuhunzi, batangira ubuzima busanzwe nk’abenegihugu.

Kuri uyu wa Mbere, Amerika yatangaje ko guhera muri Nzeri 2019, Abanya-Salvador bose bahungiyeyo icyo gihe, bazaba batacyemerewe kubayo nk’impunzi, ko bahawe amezi 18 yo gusubira iwabo cyangwa gushaka ibyangombwa byo guturayo byemewe n’amategeko, nk’uko ibiro ntaramakuru by’Abongereza(Reuters) byabitangaje.

Uyu mwanzuro kandi si Abanya-Salvador ureba gusa, hari n’ibindi bihumbi by’abaturage ba Haiti na Nicaragua, na bo babagayo muri ubu buryo bamenyeshejwe ko bagomba gusubira iwabo.

Umuyobozi w’umuryango ugamije kugabanya umubare w’impunzi ziba muri Amerika, Roy Beck, yatagaje ko impamvu zatumye bakirwa zirimo by’ibiza byari mu bihugu byabo nk’imitingito kuri ubu bikaba byararangiye.

Nubwo Leta ya El Salvador yakiranye yombi iki cyemezo cyo gucyura abaturage bayo, imiryango irengera uburenganzira bw’impunzi ivuga ko ari ukwirengagiza imvururu ziri mu gihugu baturutsemo, kubirukana bikaba ari ukubahohotera.

Kuri ubu, El Salvador ni igihugu gito cyugarijwe n’ibibazo by’ubukungu n’umutekano muke uterwa n’udutsiko tw’amabandi abangamira abaturage.

Uwitwa Patricia Hernandez, w’imyaka 53, yageze muri Amerika mu 2000, asaba ubuhunzi mu 2001, yatangaje ko icyo cyemezo kibabangamye cyane kuko abenshi batangaga imisoro, ko badakwiye gufatwa nk’abanyabyaha cyangwa abatazwi na Leta.

Abanya- Salvador bagiye kwirukanwa muri Amerika ntibishimiye icyemezo cyabafatiwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza