Imbogamizi Oprah Winfrey ashobora guhura nazo igihe yaba yiyamamarije kuyobora Amerika

Yanditswe na Mukaneza M.Ange
Kuya 11 Mutarama 2018 saa 09:55
Yasuwe :
0 0

Mu ntangiriro z’iki cyumweru nibwo amakuru yatangiye gukwirakwira ko Oprah Winfrey, umwe mu bagore bavuga rikijyana ku Isi, yaba afite igitekerezo cyo kuziyamamariza kuyobora Leta Zunze Ubumwe za Amerika (USA) mu matora ateganyijwe mu 2020.

Ibi byatangiye kuvugwa nyuma y’ijambo Oprah usanzwe akora ikiganiro cyamwitiriwe kuri televiziyo, yavugiye mu birori byo gutanga ibihembo bya Golden Globes Awards ku Cyumweru tariki ya 7 Mutarama 2018.

Mu gihe hari abavuga ko aramutse yiyamamaje yaba afite amahirwe menshi yo gutsinda, ikinyamakuru Washington Post cyakoze ubushakashatsi kuri bimwe mu bintu yagiye akora mu bihe byashize bishobora kubangamira uyu mugambi. Muri ibyo harimo:

-  Gufata ku ngufu byagaragaye mu ishuri rye

Nk’uko byagenze kuri Perezida Donald Trump ubwo yiyamamarizaga kuyobora Amerika, abantu ntibahwemye kugarura ibya Kaminuza ye (Trump University) yavugwaho gukora ibisa n’uburiganya, bikarangira yemeye kwishyura miliyoni 25 z’amadolari ngo iki kibazo kirangire. Na Oprah abantu benshi bashobora kuzamubaza ku bijyanye no gufata abana ku ngufu byagaragaye mu ishuri ry’abakobwa yashinze muri Afurika y’Epfo.

Oprah Winfrey Leadership Academy for Girls ni ishuri uyu mugore uza mu bafite agatubutse ku Isi yubatse muri Afurika y’Epfo; ryafunguye imiryango mu 2007, rikaba ryaratwaye akayabo ka miliyoni 40 z’amadolari.

Rikimara kuzura abantu bamushinje kubaka ishuri rihenze mu gihugu gikennye, we avuga ko impamvu yabikoze ndetse agashyiramo inzu itunganya imisatsi (salon) n’ahakorerwa Yoga ari uko yifuzaga ko abakobwa baryigamo babona ibyo we atahawe ari umwana.

Nyuma y’amezi make ariko umugore wari ushinzwe aho abanyeshuri baryama, yatawe muri yombi akekwaho gukoresha abana b’abakobwa imibonano mpuzabitsina ku ngufu.

Ibi byababaje Oprah cyane, ndetse ashinja abayobozi b’ikigo gushishikariza abana guhishira ibyabakorerwaga, anafata umwanzuro wo kwirukana uwari umuyobozi mukuru w’ishuri.

Nyuma y’imyaka ibi bibaye ariko bamwe mu bakobwa barirukanywe bashinjwa gushora bagenzi babo mu mibonano mpuzabitsina, ibintu byahise bituma ikirego cy’uwari ushinzwe aho baryama gitangira kwibazwaho.

Nubwo Oprah yabashije gukemura ikibazo cy’uwari umuyobozi w’ikigo wamushinjaga kumusebya, uwafunzwe akekwaho gufata ku ngufu yaje kugirwa umwere avuga ko adateze kubabarira iki cyamamare cyamwangirije ubuzima kubera ibirego by’ibinyoma.

Oprah yatangiye gushyirwa mu majwi ko ashobora kwiyamamaza mu 2020, gusa Trump yavuze ko amuzi neza ku buryo adashobora kumutsinda igihe baba bahanganye

-  Yatumye umurwayi wa kanseri adakurikiza inama z’abaganga

Mu bindi abantu bashobora kubaza Oprah igihe yaba yiyamamaje ni uburyo yatumye umugore witwa Kim Tinkham wari urwaye kanseri y’ibere atajya kwibagisha nk’uko yari yabisabwe n’abaganga.

Ni nyuma y’uko mu 2007, abwiye Oprah ko yanze gusubira mu baganga ahubwo ahitamo gukoresha ibanga ryo gukira binyuze mu gutekereza neza, nk’uko iki cyamamare cyabishimangiraga binyuze muri gahunda yitwa ‘The secret’. Nyuma y’imyaka itatu ariko Tinkham yaje gupfa.

Oprah kandi anazwiho kuba ari umwe mu bantu bashyigikiye bikomeye Mehmet Oz, we yita ‘America’s Doctor’, uzwiho kumenyekanisha imiti itarigeze ikorerwa ubushakashatsi ngo hamenyekane niba ifite ubushobozi bwo kuvura koko.

Yanigeze gushyigikira Jenny McCarthy, muri gahunda ye yo kurwanya inkingo; ibi byose bituma hibazwa uko ubuvuzi muri Amerika bwaba bumeze igihe Oprah yaba asimbuye Trump.

-  Yigeze gutuma ibiciro by’inyama bigwa

Oprah mu gihe yaba ashaka kwegukana umwanya w’umukuru w’igihugu muri Amerika, yasabwa gutsinda muri California cyangwa Texas, leta zizwiho kuba mu zifite abaturage barya inyama nyinshi.

Ni mu gihe nyamara mu 1996, Oprah yanyujijeho ikiganiro kigaruka ku ndwara umuntu ashobora kwandura binyuze mu nyama, bitewe n’ibyo yari yaganiriye n’umutumirwa agahita afata umwanzuro wo kutazongera kurya umugati ziba zirimo uzwi nka Burger.

Ibi byatumye abantu benshi bahita bareka kurya inyama, abari muri ubu bushabitsi bamujyana mu nkiko bamushinja gutuma abaturage bigumura, bigatuma igiciro kigwa ku kigero cyariho mu myaka 10 yashize.

-  Yashyigikiye igitabo kirimo amakuru y’ibinyoma

Mu 2005 nibwo Oprah yakiriye mu kiganiro cye James Frey wanditse igitabo ku buryo yavuye mu bubata bw’inzoga n’ibiyobyabwenge yise “A Million Little Pieces”, uyu mugore avuga ko ari intwaro yafasha buri wese kwikura muri ibi bibazo.

Nyuma ariko byaje kugaragara ko byinshi mu byanditse muri iki gitabo cyagurishijwemo kopi zisaga miliyoni ebyiri, ari inkuru mpimbano, ndetse na Frey ubwe aza kubyiyemerera.

Ibi ariko ntibyabujije Oprah gukomeza kumushyigikira avuga ko icy’ingenzi ari uko yari imbata y’ibiyobyabwenge ariko akabasha kubivamo; abanyamakuru batangiye kumwibasira bituma atumira Frey mu kiganiro amubwira nabi, ndetse amwita umubeshyi.

Nubwo mu 2010, nyuma y’imyaka itanu bibaye Oprah yasabye Frey imbabazi ku bwo kuba atarabashije kumwumva, ntibikuraho ariko ko bidateze gusibangana mu mitwe y’Abanyamerika.

-  Yifurije abafite irondaruhu gupfa

Ubwo mu 2013 yari muri gahunda yo kumenyekanisha film ye yitwa ‘The Butler’, Oprah yagiranye ikiganiro na BBC agaruka ku bijyanye n’irondaruhu.

Nubwo bitoroshye kuba wabona ikiganiro cy’umwimerere yagiranye n’iki kinyamakuru, MSNBC yagarutse kuri amwe mu magambo yavuze ko abakuze babibwemo ibitekerezo by’irondaruhu bakwiye gupfa.

Ati “Haracyari icyiciro cy’abantu, bakuze, bavutse, bagaburirwa ndetse bakurira muri iri vangura n’irondaruhu. Ndetse abo bakwiye gupfa.”

Kwifuriza gupfa umuntu uwari we wese niyo yaba ari usazanye irondaruhu, nta cyizere ko byatuma ibikorwa bye byo kwiyamamaza bigenda neza.

-  Yari inshuti ikomeye ya Weinstein ushinjwa guhohotera abagore

Ikindi gishobora kwitambika muri gahunda ya Oprah ni ubushuti bwe na Harvey Weinstein, banafatanyije umushinga wo gutunganya film ‘The Butler”, kuri ubu ushinjwa n’abagore benshi kuba yarabahohoteye.
Nubwo ijambo rye mu bihembo bya Golden Globes ryatumye benshi batangira kuvuga ko ashobora kwiyamamaza, yarikuye ku bishinjwa Weinstein, ariko ngo amafoto y’aba bombi ngo ashobora kutazava mu mitwe y’abaturage.

Hari kandi n’abagiye batangaza ko uyu mugabo yagiye yiyegereza abagore batandukanye, abizeza kuzabafasha guhura n’ibyamamare nka Oprah na Naomi Campbell uzwi cyane mu bijyanye n’imideli.

Mu ishuri rya Oprah riri muri Afurika y’Epfo, havuzwemo ibikorwa by’ihohoterwa rishingiye ku gitsina
Oprah yigeze gufotorwa asoma Harvey Weinstein ushinjwa gukorera ihohoterwa abagore batandukanye
Oprah yagiye ahabwa imidali itandukanye ashimirwa umusanzu we mu iterambere rya Amerika. Aha ni mu 2013 ubwo Perezida Barack Obama yamwambikaga umudali kubera uruhare rwe mu gushyigikira ubwisanzure mu gutanga ibitekerezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza