Trump yibasiye uwahoze ari inkoramutima ye amwita ‘umutamutwe’

Yanditswe na Mukaneza M.Ange
Kuya 4 Mutarama 2018 saa 08:17
Yasuwe :
0 0

Perezida wa Leta Zunze Ubumwe za Amerika, Donald Trump, yibasiye Steve Bannon wigeze kuba umujyanama we, avuga ko ubwo yavanwaga mu kazi yahise ata umutwe.

Ibi Trump yabivuze nyuma y’uko hagiye hanze igitabo kirimo ubuhamya bwa Bannon, yemeza ko inama yahuje umuhungu wa Trump, Donald Trump Jr n’Abarusiya mu 2016 yari igamije ubugambanyi.

Ubu buhamya bwasohotse mu gitabo cyiswe ‘Fire and Fury: Inside the Trump White House’ cyanditswe na Michael Wolff, gikubiyemo amwe mu mabanga y’umuryango wa perezida.

Trump Jr. ashinjwa kuba muri iyi nama Abarusiya baramuhaye amabanga yangiza isura ya Hillary Clinton, wari uhanganye na se mu matora y’umukuru w’igihugu.

Kuwa gatatu Trump yatangaje ko nta sano na rito riri hagati ya Bannon nawe cyangwa se ubutegetsi bwe.

Ati “Steve Bannon ntacyo ahuriyeho nanjye cyangwa ubutegetsi bwanjye. Ubwo yirukanwaga, ntiyatakaje akazi ke gusa ahubwo yataye n’umutwe.”

Yakomeje agaragaza ko Bannon yatangiye kumukorera nyuma yo kwemezwa nk’umukandida w’ishyaka ry’Aba-républicain ahigitse abandi bakandida 17, bityo ko uruhare rwe mu kuba ari perezida ari ruto cyane.

Ati “Muri iki gihe ari wenyine, Steve atangiye gusobanukirwa neza ko gutsinda bitoroshye nk’uko njye mbigaragaza. Steve afite uruhare ruto cyane mu ntsinzi yacu y’amateka, twagejejweho n’abagabo n’abagore b’iki gihugu basaga n’abibagiranye.”

Washington Post ivuga ko abunganizi mu mategeko ba Trump batangaje ko Bannon yateshutse ku masezerano ye y’akazi, ubwo yemeraga kuganira na Wolff akamumenera amwe mu mabanga y’uwo yigeze kubera umujyanama.

Bannon wari umujyanama wa Trump mu bijyanye n’igenamigambi, yafatwaga nk’imena mu bagejeje Trump muri White House, muri Kanama 2017 nibwo yavanwe ku mirimo ye.

Trump yise Steve Bannon wahoze ari umujyanama we umuntu wataye umutwe biturutse ku buhamya yatanze mu gitabo cya Michael Wolff

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza