Umugore wa Perezida w’u Bufaransa Brigitte Macron agiye gusubira mu mwuga wo kwigisha

Yanditswe na Ishimwe Israel
Kuya 14 Gicurasi 2019 saa 08:21
Yasuwe :
0 0

Madamu Brigitte Macron, umugore wa Perezida w’u Bufaransa, Emmanuel Macron agiye gusubira mu mwuga w’ubwarimu yahozemo, aho azaba akorera mu kigo gihugura abacikirije amashuri.

Brigitte yabaye umwarimu w’Igifaransa n’Ikinamico mu bigo byiganjemo ibyigenga mu mijyi ya Amiens na Paris kugeza mu 2015, ubwo yinjiraga mu bikorwa bya politiki.

Yemeye inshingano z’ubugenzuzi no kwigisha mu kigo gishya giherereye mu Mujyi wa Clichy-sous-Bois n’ikindi cyo mu Majyepfo ashyira Uburasirazuba bw’u Bufaransa.

Ku wa Mbere, uyu mubyeyi yasuye inyubako z’icyo kigo cya “Institut des Vocations”, ni umushinga ushyigikiwe n’abarimo Umuraperi Fabien Loubayi [Ben J], Thierry Marx uzobereye mu byo guteka mu gihe watewe inkunga na Sosiyete ikomeye mu gutunganya imyenda mu Bufaransa ya LVMH [LVMH Moët Hennessy – Louis Vuitton SE].

Iri shuri n’irindi riherereye hafi ya Komine ya Valence azafungura imiryango muri Nzeri 2019. Biteganyijwe ko buri mwaka azajya aha ubumenyi abagera kuri 50 bari hagati 25-30 bataye ishuri.

Brigitte w’imyaka 66 yabwiye abanyamakuru ko “Ntazaba ari amasomo nk’ayo nahaga abanyeshuri mbere ariko azibanda ku buryo bwo kuganira no kungurana ibitekerezo.’’
Abanyeshuri bazatoranywa kwiga muri iryo shuri bazahabwa $1,100, azabafasha nk’umusingi wo kubategurira ahazaza no kwinjira ku isoko ry’umurimo.

Yakomeje atangaza ko “Turabizi ko bakeneye kumenya imibare, kumenya uko bandika Igifaransa, kumenya kuvugira mu ruhame no kubaka ibitekerezo mu nyandiko. Ndashaka kubaha icyanga ku gaciro ko kwiga.’’

Inshuro azajya yigisha buri munyeshuri ntizatangajwe ariko Brigitte ariwe uzayobora akanama k’abarimu muri icyo kigo biteganyijwe ko kizafungura n’andi mashami mu gihugu hose.

Brigitte yahuye bwa mbere na Macron afite abana batatu bakuru, umwe muri bo bakaba bariganaga mu ishuri ryo mu Mujyi wa Amiens. Aba bombi binjiye mu rukundo rwagarutsweho cyane ndetse imiryango irarwijundika.

Macron yashakanye na Brigitte mu Ukwakira 2007, umwe afite imyaka 29 undi afite 54.

Kuva yakwinjira mu Ngoro ya Perezida muri Gicurasi 2017, Brigitte ntiyakunze kugaragara cyane mu bitangazamakuru, kuko aboneka rimwe na rimwe yaherekeje Perezida Macron mu bikorwa byagutse.

Nyuma y’icyemezo cya LVMH cyo gushyigikira ishuri rizita ku bataye amashuri, ibindi bigo [ku isonga hari Total icuruza ibikomoka kuri peterori] nabyo byahize gutera inkunga itangizwa ry’andi mashami mu gihugu, hagamijwe kugabanya ikibazo cy’ubushomeri buhanitse.

Umuraperi Ben J yavuze ko amashuri mashya agamije ‘gutanga amahirwe ku bantu batitabwaho, abo mbona mu bitaramo byanjye. Ni ingenzi kubazamura no kubaremamo icyizere.’’

Brigitte Macron agiye gusubira mu mwuga w'ubwarimu
Brigitte Macron ni umugore wa Perezida w'u Bufaransa, Emmanuel Macron

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza