Abanya-Libya bizihije umunsi watangiriyeho impinduramatwara zahiritse Gaddafi

Yanditswe na Evariste Nsengimana
Kuya 18 Gashyantare 2018 saa 12:21
Yasuwe :
0 0

Abantu ibihumbi n’ibihumbi by’abanya-Libya kuri uyu wa Gatandatu, bazindukiye mu birori byo kwizihiza isabukuru y’imyaka irindwi ishize mu gihugu cyabo hatangiye impinduramatwara zasize uwari Perezida imyaka isaga 42, Muammar Gaddafi ahiritswe ku butegetsi.

Libya yaguye mu icuraburindi ryasize Gaddafi ahiritswe, nyuma y’uko Umuryango Mpuzamahanga, NATO, utangiye gushaka uko wahosha imvururu zaterwaga n’imitwe y’iterabwoba n’amakimbirane ashingiye ku moko muri iki gihugu gikungahaye kuri Peteroli.

Ku wa 20 Ukwakira 2011 nibwo Colonel Muammar Gaddafi wayoboye Libya guhera ku wa 1 Nzeri 1969, yiciwe mu Mujyi wa Syrte, igikorwa cyasize iherezo ku butegetsi bwe bwari burambye cyane ku mugabane.

Urupfu rwe rwaje nyuma y’impinduramatwara ikomeye aho ku wa 17 Gashyantare 2011 hatangiye imyigaragambyo ikomeye yamagana Guverinoma ye.

Mu kwibuka icyo gikorwa, kuri uyu wa Gatandatu, mu Murwa Mukuru Tripol no mu yindi mijyi itandukanye yo mu Majyaruguru y’umugabane wa Afurika; abantu bazindukiye mu birori bibuka ibihe bigoye Libya yaciyemo, byanasize ubukungu na Politiki by’igihugu aharindimuka.

Mu ijambo Minisitiri w’Intebe, Fayez al-Sarraj, yatanze kuri Televiziyo mu rwego rwo kwizihiza iyi sabukuru, yabwiye abaturage ko kwimakaza ubumwe n’ubwiyunge ariyo nkingi ikomeye yo kurangiza amacakubiri n’ibibazo byugarije igihugu.

Sarraj yaniyamye ibihugu bimwe byihishe inyuma y’amakimbirane n’umwiryane bimaze igihe mu banya-Libya, abisaba kureke gukomeza kwivanga mu miyoborere yayo nkuko AFP yabitangaje.

Abazindukiye muri ibyo birori, bafite icyizere ko umwaka wa 2018, uzaba uw’ibyishimo ku batuye Libya kuri ubu yugarijwe n’ibibazo birimo iby’ubukungu, iby’amashanyarazi, guta agaciro kw’ifaranga n’ibindi.

Abaturage benshi bahuriye hamwe mu kwizihiza itariki ya 17 Gashyantare umunsi watangiriyeho imyigaragambyo yamagana Gaddafi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza