U Buhinde bugiye kubaka ibirindiro bya gisirikare muri Seychelles

Yanditswe na Mukaneza M.Ange
Kuya 19 Gashyantare 2018 saa 08:51
Yasuwe :
0 0

Mu rwego rwo gukomeza guhangana n’u Bushinwa busa n’ubushaka kwigaruria igenzurwa ry’inyanja y’Abahinde, u Buhinde bugiye kubaka ibirindiro bikomeye bya gisirikare muri Seychelles.

Mu mpera z’ukwezi gushize ibihugu byombi byashyize umukono ku masezerano avuguruye, agamije guha u Buhinde uburenganzira bwo kubaka ibirindiro bya gisirikare mu gace ka Assumption Island.

Aya masezerano yagezweho nyuma y’ibiganiro byamaze imyaka myinshi, azongera imbaraga z’u Buhinde mu kugenzura inyanja y’Abahinde inyuramo ibicuruzwa byiganjemo ibikomoka kuri peteroli.

Kubaka ibirindiro bya gisirikare muri Seychelles k’u Buhinde, bihuye neza n’ingamba zikomeje gufatwa n’u Bushinwa buri kwigarurira Afurika, haba mu bya gisirikare ndetse n’ubucuruzi.

Ku butegetsi bwa Perezida Xi Jinping, u Bushinwa bugaragaza umugambi wo gushyira ibirindiro by’ingabo zirwanira mu mazi hanze y’igihugu, umwaka ushize akaba aribwo bwubatse ibya mbere muri Djibouti hafi y’agace ka Bab el-Mandeb, kari mu byambu bya mbere binyuzwaho ibintu byinshi byambutswa binyuze mu nyanja y’Abahinde.

Aka gace gafite ubugari bungana na kilometero 29, gahuza inyanja ya Méditerranée unyuze mu bunigo bwa Suez, inyanja Itukura binyuze mu kigobe cya Aden ndetse n’inyanja y’Abahinde.

Nk’uko CNN dukesha iyi nkuru yabyanditse, nyuma ya Djibouti, u Bushinwa bwahise bwigarurira icyambu cya Hambantota muri Sri Lanka, ibintu bifatwa nk’uburyo bwo kwigarurira igenzurwa ry’ibibera mu nyanja y’Abahinde gusa ahubwo n’ubucuruzi bw’u Buhinde.

Mu gihe u Bushinwa buhakana gushaka kwigarura ikindi cyambu kiri muri Maldives, kiri mu bifatwa nk’ibikomeye mu Nyanja y’Abahinde, abasesenguzi bahamya ko biri mu byatumye u Buhinde bushyira imbaraga mu masezerano na Seychelles.

Umuyobozi w’Ikigo gishinzwe ibijyanye n’inyanja mu Buhinde, Gurpreet Khurana, yatangarije iki kinyamakuru ko kubaka ibirindiro bya gisirikare bigamije kurushaho gucungira umutekano inyungu z’igihugu cye, kandi ko mu gihe u Bushinwa bukomeje kwagura ibikorwa byabwo, nabo batagomba kurebera.

Bimwe mu bikubiye muri aya masezerano yaganiriweho bwa mbere mu 2015 bigizwemo uruhare na Minisitiri w’Intebe w’u Buhinde, Narendra Modi, aha Seychelles uburenganzira bwo gufunga by’agateganyo ibi birindiro, igihe byagaragara ko bibangamiye inyungu z’iki gihugu.

Inkuru bifitanye isano: Imvano y’ibirindiro by’ingabo z’ibihugu bikomeye ku Isi bikomeje kubakwa muri Afurika

Minisitiri w’Intebe w’u Buhinde, Narendra Modi, yahaye Seychelles uburenganzira bwo gufunga by’agateganyo ibi birindiro, igihe byagaragara ko bibangamiye inyungu z’iki gihugu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza