Abana 25 b’ingagi biswe amazina mu birori bibereye ijisho-Uko umuhango wose wagenze (Amafoto)

Yanditswe na Ishimwe Israel, Philbert Girinema
Kuya 6 Nzeri 2019 saa 11:34
Yasuwe :
0 0

Ibihumbi by’Abanyarwanda bifatanyije n’abanyamahanga baturutse mu bice bitandukanye by’Isi mu muhango wo Kwita Izina abana 25 b’ingagi wabereye mu Kinigi mu Karere ka Musanze kuri uyu wa Gatanu, tariki ya 6 Nzeri 2019.

Uyu muhango wabaga ku nshuro ya 15 witabiriwe n’ibyamamare byise amazina aganisha ku mbaraga za Leta y’u Rwanda mu kubungabunga urusobe rw’ibinyabuzima by’umwihariko ingagi zo mu misozi irimo na Pariki y’Igihugu y’Ibirunga.

Abana bahawe amazina ni abavutse hagati ya tariki ya 1 Nyakanga 2018 n’iya 11 Gicurasi 2019.

Kuri iyi nshuro uyu muhango witabiriwe n’ibyamamare birimo Umwongereza Naomi Campbell, Umunyamerika w’icyamamare mu muziki wa RnB Ne-Yo, umunyabigwi muri ruhago Tony Adams wakiniye Arsenal yo mu Bwongereza n’abandi.

Abana b’ingagi bahawe amazina ni abo mu miryango ya Amahoro, Umubano, Hirwa, Igisha, Isimbi, Muhoza, Kwitonda, Sabyinyo, Susa, Pablo, Kuryama, Mafunzo, Kureba, Musirikali na Ntambara.

Kuva umuhango wo Kwita Izina watangizwa mu 2005, abana b’ingagi 281 bamaze guhabwa amazina.

UKO UMUHANGO WO KWITA IZINA WAGENZE:

-  IJAMBO RYA PEREZIDA KAGAME

14: 00: Umukuru w’Igihugu yabanje gusuhuza abaturage n’abandi bashyitsi bitabiriye umuhango wo Kwita Izina.

Yatangiye ababwira kumwereka morali mbere yo gutangira kuvuga ijambo rye. Yasabye abari ku buhanga bw’ibyuma kubanza kuzamura umuziki kugira ngo babyine gato.

Nyuma yo kuririmba indirimbo zirimo “Tuzarwubaka’’ na ‘‘Sisi wenyewe’’ , abaturage bahise bamuha amashyi menshi, banakomeza bavuga bati “Turakwemera.’’

IJAMBO RY’UMUKURU W’IGIHUGU PAUL KAGAME

Abaturage ndabashimira ko mwifata neza, ko mufata neza n’ibidukikije nubwo byavuzwe ko twese tubifitemo inyungu, rimwe na rimwe hari ubwo abantu batabimenya bityo bikabapfana ubusa.

Icyiyongeye kuri ibyo, nk’uko uyu munsi wagenewe Kwita Izina abana b’ingagi, nanjye mu myaka 15 ishize nagize amahirwe yo kwita ingagi z’impanga amazina.

Nkuko mwabyumvise, ntabwo nabaye umubyeyi mubi, nazitayeho, nishyuye amafaranga y’ishuri kandi nakoze ibishoboka byose ku buryo mvugana nazo, tufite internet muri ibi bice, turavugana.

Umwe muri abo bana, yabaye umuntu ukomeye mu muryango, ubu ni umutware w’umuryango [Silverback], yitwa Byishimo. Ni umutware wishimye.

Ariko intambwe nziza twabwiwe n’Umuyobozi wa RDB [Clare Akamanzi] ntiyashoboraga kubaho hatabayeho ubufatanye bw’abaturage no gukurikirana neza ko bungukirwa n’ubwo bufatanye bumaze imyaka bwagiriye akamaro igihugu, ingagi na ba mukerarugendo banyuzwe no kuba hano, banyuzwe n’umutekano kubera ubwo bufatanye.

Perezida Kagame yavuze ku bana b'ingagi z'impanga yise amazina none bakaba baravuyemo umuryango mugari
Umuyobozi mukuru w'Ikigo cy'Igihugu gishinzwe Iterambere (RDB), Clare Akamanzi, yavuze ko u Rwanda rwateye imbere mu bikorwa byo kubungabunga urusobe rw'ibinyabuzima

-  INGAGI ZISWE AMAZINA MU BYICIRO BITANU

Ingagi zahawe amazina mu byiciro bitanu birimo icya mbere kigizwe n’abisi barimo Jeremy Jauncey, Madeleine Nyiratuza, Ron Adams, Tony Adams na Niklas Adalberth.

Amazina bahaye ingagi:

- Jeremy Jauncey: Yise ingagi izina ‘Ingando’

- Madeleine Nyiratuza: Yise ingagi izina ‘Isanzure’

- Ron Adams: Yise ingagi izina ‘Igihango’

- Tony Adams: Yise ingagi izina ‘ Sura u Rwanda’

- Niklas Adalberth: Yise ingagi izina ‘ Irembo"’

Itsinda rya kabiri ryise ingagi aya mazina

- Meddy: Yise ingagi izina ‘Inkoramutima’

Meddy yise ingagi izina ‘Inkoramutima’

- Otara Gunewardene: Yise ingagi izina ‘Kira’

- Louis Van Gaal: Yise ingagi izina ‘Indongozi’

- Hailemariam Desalegn Boshe: Yise ingagi izina ‘Umukuru’

- Ronan Donovan: Yise ingagi izina ‘Intego’

Itsinda rya gatatu ryise ingagi aya mazina

- RH Princess Basma Bint Ali: Yise ingagi izina ‘Uhiriwe’

- Emmanuel Niringiyimana: Yise ingagi izina ‘Nimugwire mu Rwanda’

Niringiyimana Emmanuel wahanze umuhanda iwabo i Karongi yise ingagi izina ‘Nimugwire mu Rwanda’

- Dame Louise Martin & Patricia Scotland: Yise ingagi izina ‘Uruti Nazirian’

- Paul Milton & Luke Bailes: Yise ingagi izina ‘Inararibonye’

- Naomi Campbell: Yise ingagi izina ‘Intarutwa’

Itsinda rya Kane ryise ingagi aya mazina

- Areruya Joseph: Yise ingagi izina ‘Inganji’

- Marco Lambertini : Yise ingagi izina ‘Ikirenga’

- Sherrie Silver: Yise ingagi izina ‘Ibirori’

- Anthony Nzuki: Yise ingagi izina ‘Karame’

- Dr Wilfred David Kiboro : Yise ingagi izina ‘Ituze’

Itsinda rya Gatanu ryise ingagi aya mazina

- Jean Népomuscène Musekura: Yise ingagi izina ‘Bisoke’

- Karen Chalya: Yise ingagi izina ‘Umwihariko’

- Amina Mohammed: Yise ingagi izina ‘Ingoga’

Umunyamabanga Wungirije w’Umuryango w’Abibumbye, Amina Mohammed yise ingagi izina ‘Ingoga’

- Robert Twibaze: Yise ingagi izina ‘Inzobere’

- Ne-Yo: Yise ingagi izina ‘Biracyaza’

Ne-Yo yise ingagi izina ‘Biracyaza’

-  Amafoto ya Perezida Kagame n’abandi banyacyubahiro bitabiriye umuhango wo Kwita Izina

Perezida Kagame yashimiye abaturage bo mu Ntara y'Amajyaruguru bagira uruhare mu bikorwa byo kubungabunga urusobe rw'ibinyabuzima
Umuyobozi Mukuru mu Kigo cy'Igihugu cy'Iterambere RDB, ushinzwe ubukerarugendo, Belise Kaliza, yavuze ko ubukerarugendo bwateye imbere mu gihugu
Perezida Kagame aganira n'Umunyamabanga Wungirije w’Umuryango w’Abibumbye, Amina Mohammed, uyu yari mu ntiti zakoranye n'Umukuru w'Igihugu mu gukurikirana amavugurura ya Komisiyo y'Umuryango wa Afurika Yunze Ubumwe

-  13: 08: Umunya-Ghana Fred Swaniker ni we wayoboye umuhango wo Kwita Izina

Umuyobozi w’Ikirenga wa Kaminuza ya ALU, Fred Swaniker, ni we wayoboye umuhango nyirizina wo Kwita Izina.

Mu ijambo rye yatangiye ashimangira ko ari inshuti y’akadasohoka y’u Rwanda.

Yagize ati “Nubwo mva muri Ghana ariko ndi inshuti y’u Rwanda. Intego yanjye ni uguteza imbere igihugu. Ndabashishikariza mwese kuza gutegurira ibikorwa mu Rwanda.’’

ALU yatangijwe na Swaniker mu 2013, ifite amashami mu Birwa bya Maurice no mu Rwanda aho ikorera muri Kigali Heights; abayigamo bahabwa amasomo kuri internet nk’atangirwa i Cambridge muri Massachusetts muri Leta Zunze Ubumwe za Amerika.

Uyu mugabo ni we wahamagaye abisi batanze amazina ku bana b’ingagi.

Umunya-Ghana Fred Swaniker yashishikarije abitabiriye uyu muhango gutegurira ibikorwa byabo mu Rwanda

-  Itorero Mashirika ryasusurukije abitabiriye umuhango

12: 56: Mashirika yaserutse imbere y’ibihumbi by’abateraniye i Musanze. Iri torero ry’ikinamico, imivugo n’indirimbo ryaserutse mu mudiho wa Kinyarwanda.

Ryatangiye riririmba indirimbo gakondo zirimo umuhamirizo no gushagirira.
Bamwe mu barigize bagaragaye bambaye umwambaro ushushanya isura y’ingagi, bakajya banigana imico yayo mu buryo bwashimishije benshi.

Umukino bakinnye wagaragazaga uburyo Leta y’u Rwanda yashyize imbaraga mu kubungabunga urusobe rw’ibinyabuzima.

Abagize Itorero Mashirika baserutse bambaye imyambaro ibagaragaza nk'ingagi
Umunyarwenya Arthur Nkusi ari mu bakinnye umukino w'Itorero Mashirika
Intore z'Itorero Mashirika zanyuze benshi mu muhamirizo wa Kinyarwanda

IJAMBO RYA GUVERINERI GATABAZI

-  Guverineri w’Intara y’Amajyaruguru, Gatabazi JMV, yashimiye Umukuru w’Igihugu ku cyemezo cyafashwe cy’uko abaturage bagerwaho n’inyungu iva mu bukerarugendo aho babona amazi meza, amashuri, amavuriro n’ibindi bikorwa by’iterambere.

Gatabazi avuze ko Umujyi wa Musanze umaze gutera imbere kuko ufite amahoteli menshi arimo ay’inyenyeri eshanu, enye n’eshatu; ku buryo ashobora kwakira abashyitsi benshi kandi icya rimwe.

Guverineri w’Intara y’Amajyaruguru, Gatabazi JMV, yashimye icyemezo cya Guverinoma y'u Rwanda cyo gusangiza abaturiye Pariki z'Igihugu inyungu iva mu bukerarugendo

-  Perezida Kagame yageze mu Kinigi

12:20: Umukuru w’Igihugu yageze mu Kinigi ahagiye kubera uyu muhango wo kwita ingagi 25 amazina. Hagiye gukurikira indirimbo yubahiriza igihugu iri bukurikirwe n’ijambo ry’ikaze rya Guverineri w’Intara y’Amajyaruguru, Gatabazi Jean Marie Vianney.

Ubwo haririmbwaga indirimbo yubahiriza igihugu

Perezida Kagame yakiranywe urugwiro n’abaturage benshi bateraniye ahabereye uyu muhango uri mu ikomeye.

Perezida Kagame asuhuza abaturage b'i Musanze n'abandi bitabiriye umuhango wo Kwita Izina
Perezida Kagame ubwo yageraga mu Kinigi mu Karere ka Musanze ahabereye umuhango wo Kwita Izina
Perezida Kagame asuhuza bamwe mu byamamare byitabiriye umuhango wo Kwita Izina

-  12:05: Abisi bageze mu Kinigi ahabereye umuhango wo Kwita Izina

Abantu 25 bise amazina abana b’ingagi bageze mu Kinigi ahabereye ibirori bikomeye byo Kwita Izina.

Baserutse bakenyeye bya Kinyarwanda, imyambaro igaragaza umuco gakondo. Abarimo Ne-Yo na Van Gaal watoje Manchester United yo mu Bwongereza batambutse bahabwa amashyi y’urufaya n’abateraniye mu Kinigi hafi y’ubuturo bw’ingagi zo mu Birunga.

IBYO WAMENYA KU BISI B’INGAGI

-  Hailemariam Desalegn Boshe: Yabaye Minisitiri w’Intebe wa Ethiopia. Ku buyobozi bwe yabagariye ubucuti bw’igihugu cye n’u Rwanda ku buryo umubano w’impande zombi washinze imizi.

Hailemariam Desalegn Boshe yabaye Minisitiri w'Intebe wa 14 wa Ethiopie hagati ya 2012 na 2018

-  Amina Mohammed: Ni Umunyamabanga Wungirije w’Umuryango w’Abibumbye. Yahoze ari Minisitiri w’Ibidukikije muri Guverinoma ya Nigeria aho ashimwa kugira uruhare mu iterambere ry’ibikorwa byo kubungabunga ibidukikije, kurwanya iyangirika ry’ikirere no kwita ku mutungo kamere mu iterambere rirambye.

-  Paul Milton & Luke Bailes: Ni we washinze Milton Group yubatse Singita Kwitonda Lodge ifasha abashoramari Paul Tudor Jones na Anders Povlsen.
Milton akora mu bijyanye no kubungabunga urusobe rw’ibinyabuzima ndetse amaze imyaka itanu akorana n’u Rwanda.

Uyu mugabo washinze akaba anayobora Singita, Luke Bailes, amaze imyaka myinshi ashyira imbaraga mu bikorwa byo kubungabunga urusobe rw’ibinyabuzima ku Mugabane wa Afurika.

-  RH Princess Basma Bint Ali:Ni umuvugizi mu bijyanye no kubungabunga urusobe rw’ibinyabuzima n’iterambere ry’ubuhinzi muri Jordanie.

Yashinze imiryango myinshi itegamiye kuri Leta irimo Royal Botanic Garden of Jordan (RBG) na Royal Marine Conservation Society of Jordan.

-  Dame Louise Martin, DBE: Ni Perezida w’Ishyirahamwe ry’Imikino ihuza Ibihugu bivuga Ururimi rw’Icyongereza (Commonwealth). Uyu mugore yahoze ari umukinnyi, ni umuhanga mu by’imirire ndetse yanabaye umurezi.

-  Tony Adams: Ni icyamamare mu mukino w’umupira w’amaguru, yamenyekanye akinira Arsenal FC n’Ikipe y’Igihugu y’u Bwongereza (The Three Lions) yahamagawemo inshuro 66, aho amakipe yombi yayabereye kapiteni.
Tony Adams w’imyaka 52 yakiniye Arsenal yo mu Bwongereza imyaka 19 hagati ya 1983 na 2002 aba na kapiteni wayo imyaka 14. Mu myaka 22 yamaze muri Arsenal FC yatwaye ibikombe 13 maze yubakirwa ikibumbano hanze ya Emirates Stadium.

U Rwanda na Arsenal bifitanye amasezerano yo kumenyekanisha u Rwanda nk’icyerekezo cy’ishoramari n’ubukerarugendo binyuze muri gahunda ya Visit Rwanda, mu gihe cy’imyaka itatu.

-  Ron Adams: Ni Ambasaderi wa Israel mu Rwanda. Ni we wa mbere wahawe guhagararira iki gihugu mu Rwanda, ufite icyicaro mu Mujyi wa Kigali.

Ambasaderi wa Israel mu Rwanda, Ron Adam ari mu bise izina umwana w'ingagi. Mu 2014 u Rwanda rwabaye igihugu cya mbere muri Afurika cyasinyanye amasezerano y’umubano na Israël.

-  Niklas Adalberth: Ni rwiyemezamirimo ukomoka muri Suède, ndetse yatangije Umuryango w’Abanya- Suède ufasha ba rwiyemezamirimo, Norrsken.

-  Jeremy Jauncey:Yashinze ndetse anayobora Ikigo gishinzwe ibyo kwamamaza kizwi nka Beautiful Destinations.

-  Otara Gunewardene: Ni rwiyemezamirimo ukomoka muri Sri Lanka ndetse akaba akora n’ibikorwa bitandukanye by’ubugiraneza.

-  Ronan Donovan: Gafotozi wa Shene ya Televiziyo y’Abanyamerika, National Geographic. Anatunganya filime.

-  Louis Van Gaal: Uyu Muholandi yabaye umukinnyi ndetse anatoza amakipe atandukanye. Uyu mugabo w’imyaka 68 yatoje amakipe akomeye arimo AZ Alkmaar, Bayern Munich, Ajax Amsterdam, FC Barcelona, Ikipe y’Igihugu y’u Buholandi na Manchester United.

Aloysius Paulus Maria van Gaal OON w'imyaka 68 yatoje amakipe arimo Ajax, Barcelona, AZ Alkmaar, Bayern Munich na Manchester United

-  Naomi Campbell: Uyu munyamideli ukomoka mu Bwongereza, ni
umukinnyi wa filime ndetse akaba na rwiyemezamirimo ukomeye.

-  Sherrie Silver: Umubyinnyi w’icyamamare wazamuye izina ry’u Rwanda ku ruhando mpuzamahanga. Yagaragaye mu ndirimbo zitandukanye zirimo iya Child Gambino; iyi yaherewe igihembo cy’umubyinnyi mwiza mu bitangwa na MTV VMA Award.

-  Marco Lambertini: Ni Umuyobozi w’Ikigega Mpuzamahanga cyo kwita ku bidukikije (WWF).

-  Shaffer Chimere Smith: Uyu benshi bamuzi ku mazina ya Ne-Yo akoresha mu muziki. Ne-Yo ni Umunyamerika ufatanya ubuhanzi, kubyina, kwandika indirimbo, gutunganya indirimbo, gukina film no kubyina.

Ne-Yo wageze mu Rwanda ku nshuro ye ya mbere ategerejwe mu gitaramo gikomeye cya “Kwita Izina Concert’’ kizabera muri Kigali Arena ku mugoroba wo ku wa 7 Nzeri 2019.

Ne-Yo w’imyaka 39 ubusanzwe yitwa Shaffer Chimere Smith uretse kuririmba, yandikira bagenzi be indirimbo, akazitunganya ndetse akanabyina.

Yatangiye umuziki akiri umunyeshuri, aba mu itsinda ryitwaga Envy ryaje gusenyuka mu 2000, ahita awukora ku giti cye n’ubwo bitari byoroshye.

Mu 2004 nibwo yatangiye kumenyekana ubwo yagiraga uruhare mu kwandika indirimbo ya Mario yitwa “Let Me Love” yanakunzwe cyane.

Umwaka wa 2006 niwo wasize Isi yose irangamira uyu mugabo wavutse mu 1979 ubwo yashyiraga hanze album ye ya mbere yitwa “In My Own Words” yabaye iya mbere ku rutonde rukorwa na Billboard muri Amerika.

Yakoze indirimbo zakunzwe cyane nka “So Sick”, “One In A Million” “Miss Independent” n’izindi zakunzwe n’abantu batari bake ku Isi.

Ne-Yo yegukanye ibihembo bya Grammy mu 2009 harimo icya album nziza yo mu njyana ya R&B “Because Of You” na “Miss Independent” yahembwe nk’indirimbo yahize izindi za R&B.

Umuhanzi w'icyamamare ubwo yageraga mu Kinigi. Yari aherekejwe n'umurinzi w'ibigango bazanye mu Rwanda
Umunyamerika Ne-Yo yari afite akanyamuneza

-  Ngabo Médard Jobert: Ni umuhanzi uri mu Banyarwanda bagezweho mu bakora umuziki. Ari mu byamamare byatumiwe mu muhango wo Kwita Izina.

Meddy ari mu bahanzi bakomeye cyane bakomoka mu Rwanda bise ingagi izina

-  Emmanuel Niringiyimana: Uyu musore w’imyaka 23 avuka mu Karere ka Karongi. Izina rye ryazamuwe n’igikorwa kidasanzwe cyo gukora umuhanda ureshya na kilometero zirindwi (7Km) wenyine abyibwirije.

-  Anthony Nzuki: Ayobora abarinda Pariki mu Akagera.

-  Madeleine Nyiratuza:Ashinzwe Agashami k’Iterambere muri UNDP Rwanda. Ni we unahagarariye ibikorwa byo kubungabunga Ishyamba rya Gishwati.

-  Areruya Joseph: Ni umukinnyi wamamaye mu mukino wo gusiganwa ku magare. Uyu musore w’imyaka 23 bakunda kwita Kimasa avuka mu Karere ka Kayonza.

Yakuriye muri Les Amis Sportifs y’I Rwamagana iterwa inkunga na Banki y’Ubucuruzi ya Cogebanque, mbere yo kubengukwa na Dimension Data yo muri Afurika y’Epfo aho yavuye yerekeza mu Ikipe ya Delko-Marseille-Province yo mu Bufaransa.

Areruya yegukanye Tour du Rwanda 2017. Yatowe nk’umukinnyi w’Umunyafurika wa 2018 mu mwaka wamuhiriye kuko yanatwayemo La Tropicale Amissa Bongo yabaye muri Mutarama 2018.

Yanditse amateka yo kuba Umunyafurika wa mbere wo Munsi y’Ubutayu bwa Sahara wasiganwe mu irushanwa ry’amagare rya Paris-Roubaix, rimwe mu masiganwa akomeye muri uyu mukino.

-  Dr Wilfred David Kiboro : Ni Umuyobozi w’Inama y’Ubutegetsi mu Kigo cy’Abanyakenya, Nation Media Group ‘NMG’ kiri mu bikomeye mu bijyanye n’itangazamakuru muri Afurika y’Iburasirazuba n’iyo Hagati. Uyu mugabo w’imyaka 75 ari mu bubashywe cyane mu itangazamakuru n’ishoramari rya Kenya.

NMG ifite ibitangazamakuru bikorera mu bihugu bitandukanye birimo Kenya, Uganda, Tanzania n’u Rwanda.

-  Abanyamadini, abanyepolitiki n’abayobozi mu nzego zitandukanye bageze mu Kinigi

Umuhango wo Kwita Izina ni igikorwa cyagutse gihuriza hamwe abantu batandukanye baturuka imihanda yose.

Mu bitabiriye uyu muhango barimo abayobozi muri Guverinoma y’u Rwanda, abahagarariye amadini, abikorera n’abandi.

Umuyobozi wa 'Jali Holding Company', Twahirwa Ludovic 'Dodo' aganira na Sina Gerard
Minisitiri w'Ubutegetsi bw'Igihugu, Prof. Shyaka Anastase aganira n'umwe mu bitabiriye uyu muhango
Umuyobozi wa Polisi y'u Rwanda, IGP Dan Munyuza n’Umugaba Mukuru w'Ingabo z'u Rwanda, Gen Patrick Nyamvumba baganira
Musenyeri wa Diyosezi ya Ruhengeri, Vincent Harolimana, ari mu banyamadini bitabiriye uyu muhango
Itsinda ryaturutse muri Arsenal, umufatanyabikorwa w'u Rwanda mu kwamamaza ubukerarugendo bwarwo naryo ryitabiriye uyu muhango
Abanyamakuru mpuzamahanga bishimiye igikorwa cyo kwita izina ingagi benshi bitabiriye ku nshuro ya mbere
Itsinda ry'abanyamakuru mpuzamahanga riri mu rugendo rwo kureba ibyiza nyaburanga bitatse u Rwanda naryo ryitabiriye ibi birori. Ku ifoto ni Haya wo muri Syria na Sarah wo muri Canada ariko ukorera i Dubai
Ange Kagame n'umugabo we Bertrand Ndengeyingoma bitabiriye uyu muhango

-  Abahanzi batangiye gususurutsa abitabiriye ibirori byo Kwita Izina

11: 20: King James na Riderman afatanyije na Siti True Karigombe bahuriye ku rubyiniro

Abahanzi babiri bari mu bakunzwe mu muziki w’u Rwanda bayobowe na King James, Umuraperi Riderman aherekejwe na Siti True Karigombe bari gususurutsa abitabiriye umuhango wo Kwita Izina.

Aba bahanzi bavangirwaga umuziki na Dj Bisoso, baririmbye indirimbo zabo zakunzwe, bamwe mu bafana babo bakabishimira.

King James na Riderman basusurukije abitabiriye umuhango wo Kwita Izina
Senderi International Hit yishimiwe n'abaturage bitabiriye uyu muhango. Ibihangano bye byacuranzwe cyane inshuro nyinshi

11:04: Umuhanzi Senderi International Hit ni we uri ku rubyiniro aho ari kuririmbira ibihumbi by’abaturage bitabiriye umuhango wo Kwita Izina.

Kuva mu marembo y’Intara y’Amajyaruguru ukirenga umusozi wa Shyorongi, hari ibyapa bitanga ikaze mu muhango wo Kwita Izina.

Ukomeje imbere gato mu Mujyi wa Musanze, harimbishijwe imitako igaragaza ibirori bikomeye biri mu byo u Rwanda rwitabira muri gahunda yarwo yo kubungabunga urusobe rw’ibinyabuzima by’umwihariko ingagi zo mu Birunga.

Abaturage ni benshi ku mihanda itandukanye irimo n’igana mu Kinigi ahabera umuhango wo Kwita Izina.

Ku kibuga cya Kinigi, hamaze kugera abaturage benshi bategereje kubona uko uyu muhango uza kugenda.

Hassan Sakubu uzwi nka DJ Bisoso mu mwuga wo kuvanga imiziki ni we wasusurukije abitabiriye uyu muhango mu muziki uryoheye ugutwi
Abanya-Musanze bagaragaje akanyamuneza mbere y'umuhango wo Kwita Izina
Akanyamuneza kari kose ku bitabiriye umuhango wo Kwita Izina
Minisitiri w'Ubutegetsi bw'Igihugu, Prof. Shyaka Anastase n'umunyemari Sina Gerard ubwo bageraga mu Kinigi
Naomi Campbell yishimiye kuba mu Rwanda nk'umwe mu bari buze Kwita Izina

KWITA IZINA BIFITE IMVANO MU MUCO NYARWANDA

Ubusanzwe no mu muco Nyarwanda umwana aravuka, igihe kikagera agahabwa izina rizatuma ashobora gutandukanywa n’abandi muri Sosiyete. Hambere ntiyarenzaga nibura iminsi umunani ataritwa izina. Yarihabwaga mu muhango uzwi nko kurya ubunnyano.

Muri uwo muhango hatumirwagamo abana bato bakagaburirwa isogi n’izindi mboga zibumbabumbiye mu mutsima w’amasaka cyangwa w’uburo uri ku nkoko, ari naho havuye kubyita ubunnyano.

Bamaraga kurya ubunnyano bakita umwana izina, ababyeyi babaga bafite amazina bamuteganyirije bakayatangaza mu museke w’umunsi wakurikiraga iribwa ry’ubunnyano.

Amafoto: Himbaza Pacifique na Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza