Abanyamadini barenga 90% banyuzwe n’icyemezo cyo gufunga insengero zitujuje ibisabwa

Yanditswe na Emma-Marie Umurerwa
Kuya 6 Ugushyingo 2018 saa 03:38
Yasuwe :
0 0

Ubushakashatsi bwerekanye ko abanyamadini barenga 90% banyuzwe n’icyemezo cya leta y’u Rwanda cyo gufunga insengero, imisigiti ndetse na za kiliziya bitujuje ibisabwa, cyabaye guhera muri Gashyantare uyu mwaka.

Ubu bushakashatsi bwamuritswe kuri uyu wa Kabiri bwakozwe n’umuryango LIPRODHOR, ku burenganzira bwo gusenga n’ubwisanzure bw’amadini n’amatorero mu Rwanda.

Bwakorewe mu turere 29, amadini 29, habazwa abantu 495 harimo abayobozi b’amadini n’amatorero 45% , abayoboke 50.5%, abayobozi b’inzego z’ibanze 2.8%, hamwe n’abo mu miryango itari iya Leta 1.2%.

Perezida wa LIPRODHOR, Mushimiyimana Pierre Damien, yavuze ko amadini n’amatorero mu mikorere yayo nta nzitizi afite.

Abarenga 90 % bagaragaje ko ubwisanzure n’uburenganzira bwo gusenga mu Rwanda byubahirizwa uhereye ku gushaka ubuzima gatozi ndetse ko imikorere n’uburenganzira bwabo byubahirizwa, hashingiywe ku mategeko mpuzamahanga ndetse n’Itegeko Nshinga rya Repubulika y’u Rwanda.

Yagize ati “Dukurikije umuvuduko wari uhari wo gufunga insengero zitujuje ibisabwa twibwiraga ko hari abantu benshi bishobora kuba byarababangamiye, ariko ntabwo ariko twabisanze kuko twasanze benshi barabyishimiye.”

Abanyamadini bagera kuri 92% bavuze ko kubona ubuzima gakozi bwo gukorera mu Rwanda byoroshye, 8% gusa bavuga ko bikigoye kuko ngo amadini akivuka asabwa ibyangombwa byinshi.

Abagera kuri 95% bavuga ko uburenganzira bwo gusenga ndetse n’ubwisanzure buhari, mu gihe 5% bavuze ko batisanzuye cyane cyane ku bijyanye no gukora ibitaramo bya nijoro ndetse ngo no ku manywa barakumirwa.

Imiryango ya sosiyete sivile yo ngo yavuze ko mbere yo gufunga insengero byari kuba byiza habanje ibiganiro hagati ya Leta n’abayobozi b’amadini n’amatorero.

Bavuze ko hari igihe abayobozi b’inzego z’ibanze badakora neza inshingano bigatuma hari ibikorwa abaturage batamenyera igihe bigafatwa nk’ibitunguranye. Hifujwe ko hazajya habaho integuza ndetse n’ibiganiro mbere yo kubafatira ibyemezo.

Muri Gashyantare uyu mwaka nibwo Ubuyobozi bw’inzego z’ibanze bwatangiye ibikorwa byo gufunga insengero zitujuje ibisabwa birimo ibyangombwa nk’iby’isuku, umutekano ku bahasengera, parikingi n’ibindi.

Igenzura riheruka ry’Urwego rw’Igihugu rw’Imiyoborere (RGB) muri Nyakanga ryagaragaye ko insengero zigera kuri 8670 zigifunze, nyuma yo kugaragara ko hari ibisabwa zitari zuzuza kugira ngo zikomorerwe.

Perezida wa LIPRODHOR, Mushimiyimana Pierre Damien, yavuze ko amadini n’amatorero mu mikorere yayo nta nzitizi afite

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza