Abanyeshuri babiri bagiye gutangiza ikoranabuhanga rizafasha abatindaga ku byapa bategereje imodoka

Yanditswe na HABIMANA James
Kuya 14 Gicurasi 2019 saa 10:12
Yasuwe :
0 0

Umunyeshuri muri Kaminuza ya Kigali, Germain Rwibutso na Albin Shema wiga muri Carnegie Mellon University i Kigali, bagiye gutangiza uburyo bw’ikoranabuhanga buzafasha abatwara abagenzi n’abagenzi mu mujyi wa Kigali.

Rwibutso yiga mu mwaka wa nyuma ibijyanye na mudasobwa mu gihe Shema we yiga mu cyiciro cya Gatatu cya Kaminuza.

Aba banyeshuri bavuze ko nyuma yo kubona ikibazo cy’abagenzi bahagarara igihe kinini ku byapa bategereje imodoka, rimwe na rimwe ugasanga abafite imodoka nabo bajya ku byapa bakabura abagenzi, batekereje ku buryo bw’ikoranabuhanga bwakwifashishwa.

Mu kiganiro na IGIHE, Rwibutso ari na we muyobozi mukuru w’ikigo cyitwa Binary Earth bashinze, yavuze ko bamaze umwaka batangiye gukora.

Yagaragaje ko bashaka gufatanya n’ibigo bitwara abantu ku buryo abashoferi bazajya bamenya ngo ku cyapa hari umubare runaka w’abantu bategereje imodoka bityo bihute kubakuraho.

Ati “Icyo bizafasha ni uko aho kugira ngo bisi ijye ku cyapa ihamare iminota 10 itegereje abantu cyangwa se umuntu ajyeyo azi ko atari bubone bisi, icyo tugiye gufasha ni uko bisi izajya ijya ku cyapa izi ngo hariho abantu bangana gute ariko n’umugenzi uhari azajya amenya ngo hari bisi igiye kumugeraho mu minota runaka.”

Yavuze ko bizafasha abafite bisi kudatakaza umwanya n’amafaranga kuko wasangaga bisi ijya ku byapa birenga 10 ishaka abagenzi kandi badahari.

Agira ati “Nk’ubu mushobora kujya ku cyapa mugategereza muri abantu benshi, iyo utegereje bisi mu minota 20 uraruha bikarangira ufashe moto kuko nta bisi irimo kuza, ku mugenzi bizajya bituma agabanya umwanya yamaraga ahagaze.”

Uko ubu buryo buzakora ni uko bazafata camera bikoreye bakazishyira ku cyapa gitegerwaho imodoka, iyo camera izajya ifata amafoto buri masegonda 30 ibare abantu bahahagaze yohereze uwo mubare ku bigo bitwara abagenzi nabyo byohereze bisi.

Yunzemo ati “Twebwe twikorera camera kuko kuzigura birahenda, nk’ubu muri Kigali hari ibyapa byo gutegeraho bigera kuri 500 urumva uko tungana kugira ngo tuzagure camera 500 byatwara igihe kandi iki ni ikigo kitaratangira kwinjiza amafaranga.”

Camera bagura ishobora gutwara amafaranga y’u Rwanda miliyoni imwe mu gihe iyo bikoreye ibatwara ibihumbi 200 Frw.

Yagaragaje ko bamaze kugirana ibiganiro n’Urwego Ngenzuramikorere (RURA) bababwira ibyo bagomba kongeramo, ku buryo mu mezi abiri bafite icyizere ko bazaba batangiye gukora.

Aba banyeshuri bagaragaza ko nubwo imodoka zitwara abagenzi zishobora kuba ari nke ariko n’izihari ngo ntizikoreshwa neza.

Umunyeshuri muri Kaminuza ya Kigali, Germain Rwibutso, agaragazaga uko camera izajya ifotora abantu bahagaze ku cyapa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza