Abayobozi mu bijyanye n’itumanaho bagiye guhurira i Kigali mu nama ya GSMA

Yanditswe na Sekamana Mathias
Kuya 10 Nyakanga 2019 saa 11:34
Yasuwe :
0 0

Abayobozi mu nzego za leta n’abikorera, bagiye guhurira i Kigali mu nama y’iminsi itatu izaba hagati ya tariki 16-18 Nyakanga 2019 muri Kigali convention Centre, izahuriramo inzego za leta n’abikorera mu itumanaho baturutse mu bigo byinshi bitanga serivisi z’itumanaho rya telefoni n’ikoranabuhanga.

Ni inama yateguwe na GSMA (Global System for Mobile Communications Association), ihuriza hamwe ibigo bitanga serivisi z’itumanaho rya telefoni bigera ku 1200.

Umuyobozi mukuru wa GSMA Ltd, John Hoffman yavuze ko bishimiye kugaruka mu Rwanda mu nama yiswe 2019 Mobile 360– Africa conference, yigira hamwe uko ikoranabuhanga ryazana impinduka nziza mu mibereho y’abantu.

Ati “Ikoranabuhanga riyoboye impinduka muri Afurika, kandi itumanaho rya telefoni ryitezweho gufasha muri iyo nzira. Kuba abantu bagera ku gice cya miliyari muri Afurika bakoresha itumanaho rya telefoni zigendanwa, uko kuba hamwe biri kugenda bifasha abantu kubona serivisi zitandukanye zirimo gukoresha ikoranabuhanga, serivisi z’ubuzima n’izo guhanahana amafaranga.”

“Twishimiye kugaruka mu Rwanda mu mwaka wa kabiri. Ikoranabuhanga n’ishoramari bihuje umuvuduko muri aka karere, rero muri iyi nama tuzaba turebera hamwe uko abaturage bakoresha iri koranabuhanga n’impinduka nziza za telefoni muri aka karere.”

Iyi nama izitabirwa n’abayobozi na ba nyir’ibigo bikomeye bikora telefoni cyangwa bitanga serivisi zigendana nazo.

Bamwe mu bazatanga ibiganiro muri iyi nama harimo Daisy Zhu ushinzwe kwamamaza ikoranabuhanga rya 5G muri Huawei, Ashish Thakkar washinze Mara Group, Umuyobozi mukuru wa MTN Rwanda Bart Hofker, Umuyobozi mukuru w’urwego rw’igihugu ngenzuramikorere (RURA), Lt Col Patrick Nyirishema n’abandi.

Iya izibanda cyane ku kuzamura ikoreshwa ry’ikoranabuhanga mu baturage, izabamo gusangira ibitekerezo n’ubunarariribonye, ibiganiro mu matsinda byose bivuga ku cyizere, ikoranabuhanga, ihanahanamakuru no guhuza abantu by’ejo hazaza.

Bigendanye n’aho Afurika igeze m’umuvuduko w’ikoranabuhanga, iyi nama izashakira hamwe impinduka nziza z’igihe kirekire z’ikoranabuhanga mu baturage n’abakora ibijyanye n’itumanaho.

Ku munsi wa gatatu hazaba ho inama y’akanama k’ubuyobozi bw’ibijyanye no guhanahana amafaranga kuri telephone muri GSM, aho bazaba barebera hamwe imikorere y’uru rwego, amavugururwa n’udushya dukenewemo.

Mu bindi bizakotrwa muri iyi nama, hari mo kugaragazwa ibikorwa byakozwe na GSMA Mobile muri gahunda yayo y’iterambere. Iki gikorwa kizibanda cyane ku bikorwa bwateje imbere ikoreshwa rya telefoni muri serivise zo kungera umuvuduko w’iterambere kubari bantu batagerwaga ho na serivisi by’umwihariko abagore, abatuye ibyaro n’urubyiruko.

Ubushakashatsi bwa GSMA bwagaragaje ko kuva mu 2004, ikoranabuhanga rya 4G ryageze ku bantu miliyoni 200, abarenga miliyoni 40 bafungura konti zabo ku mbuga nkoranyambaga naho porogaramu zo mu matelefone zigera ku 30,000 zikora neza zakorewe muri Afurika.

Insanganyamatsiko y’iyi nama ni ‘Rise of the Digital Citizen’ cyangwa se iterambere ry’’abaturage bakoresha ikoranabuhanga mu buzima bwa buri munsi.

Abantu batandukanye bashobora kwitabira iyi nama babanje kwiyandikisha hano. Izagaragarizwamo kandi uko telefoni ngendanwa, ikoranabuhanga n’itumanaho bikoreshwa mu rwego rwo kugera ku ntego z’iterambere rirambye z’Umuryango w’abibumbye.

Imibare ya RURA igaragaza ko nko mu Rwanda, kugeza muri Werurwe 2019 abakoreshaga telefoni igendanwa bari bari miliyoni 9,3, bingana na 77.1 % by’abaturage bose.

Telefoni imaze kuba igikoresho cy'ingenzi mu buzima bwa buri munsi
Umubare w'abakoresha telefoni na serivisi ziyitangirwaho bikomeje kwiyongera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza