Amasezerano 15 u Rwanda rwasinyanye n’u Bushinwa ageze he atanga umusaruro?

Yanditswe na Akayezu Jean de Dieu
Kuya 10 Nzeri 2019 saa 06:43
Yasuwe :
0 0

Muri Nyakanga 2018, Perezida w’u Bushinwa, Xi Jinping yagiriye uruzinduko rw’amateka mu Rwanda yakirwa na mugenzi we Paul Kagame, uruzinduko rwaherekejwe n’isinywa ry’amasezerano 15 y’ubufatanye hagati y’ibihugu byombi.

Perezida Xi yagendereye u Rwanda hagati ya 22 na 23 Nyakanga 2018, aherekejwe n’itsinda ry’abayobozi mu nzego za leta n’abikorera ku giti cyabo.

U Rwanda n’u Bushinwa bisanzwe bifitanye umubano umaze imyaka isaga 40 ariko ugenda waguka umunsi ku munsi, abakuru b’ibihugu byombi bagasurana birumvikana n’uruhande rw’abaturage niko bimeze kuko ubuhahirane hagati y’ibihugu byombi bumaze gutanga umusaruro ugaragara.

Mu kiganiro n’urubuga rwa Leta y’u Bushinwa runyuzwaho amakuru y’iterambere, China.org.cn, Ambasaderi w’u Rwanda mu Bushinwa, Kayonga Charles yagarutse ku mubano w’ibihugu byombi mu myaka 40, by’umwihariko amasezerano yasinywe ubwo Perezida Xi yari mu Rwanda.

Yavuze ko nyuma y’umwaka umwe hasinywe ayo masezerano, umusaruro watangiye kuboneka kandi nk’uko bigaragara hari icyizere ko ibihugu byombi bizakomeza kuyungukiramo no gukomeza kwagura umubano n’ubufatanye.

Mu byo ibihugu byombi byemeranyije harimo ubufatanye mu bucuruzi bwo kuri Internet [E- Commerce], aho nyuma u Rwanda rwanagiranye amasezerano n’ikigo Alibaba Group, yo gutangiza urubuga eWTP (electronic World Trade Platform), rufasha ibigo bito n’ibiciriritse gukora ubucuruzi bwambukiranya imipaka binyuze mu ikoranabuhanga.

Alibaba kandi yemereye u Rwanda kubaka ubushobozi itanga amahugurwa ku banyarwanda, ba rwiyemezamirimo n’abayobozi ku ikoreshwa ry’ubu bucuruzi bwo kuri Internet.

Ibi kandi bijyana no kuba ikawa y’u Rwanda kuri ubu yamamazwa ikanacururizwa ku isoko ryo kuri Internet rya Alibaba Group.

Amb Kayonga yagize ati “Ku rubuga rwa Alibaba turi kwamamaza no gucuruzaho ikawa yacu ariko tunamamazaho ubukerarugendo kandi ndakeka byarazamutse turi kubona ubwiyongere bw’ikawa twohereza mu mahanga.”

Ku ikubitiro ubwo hageragezwaga uyu mushinga, ba rwiyemezamirimo batanu b’abanyarwanda n’abanyeshuri 38 bo muri Kaminuza icyenda bahuguwe ku bucuruzi bwo mu ikoranabuhanga, 13 muri bo babonye impamyabushobozi.

U Rwanda n’u Bushinwa kandi byasinye amasezerano y’ubwikorezi aho kuri ubu RwandAir ikora ingendo zijya muri iki gihugu.

Ibihugu byombi kandi byasinyanye amaserano yo koroherezanya mu bucuruzi aho nyuma y’ibiganiro hagati y’impande zombi ko u Rwanda rwajya rwohereza ibicuruzwa byarwo ku isoko ry’u Bushinwa.

Amb Kayonga ati “Mu bihe bishize RwandAir yatangiye kuza mu Bushinwa nk’uko nabivuze ibi biri mu murongo w’amasezerano yasinywe hagati ya Perezida Xi na Perezida wacu ku bijyanye n’ubufatanye ku bwikorezi bwo mu kirere.”

“Ariko kandi ibi bije nyuma y’aho umubano w’u Bushinwa na Afurika watangiye gushyirwamo imbaraga kandi hari imishinga myinshi y’ubufatanye hagati y’impande zombi, turabizi u Bushinwa bwateye imbere cyane ku nganda, ubukerarugendo n’ibindi. Kuba rero RwandAir iri kuza mu Bushinwa ni ingirakamaro kuri Afurika yose.”

Yakomeje avuga ko kuba u Rwanda rwarashyizeho gahunda yo korohereza abaza mu gihugu aho bemererwa gusaba visa bahageze, ibi akaba ari andi mahirwe ku Bashinwa bazajya bakoresha RwandAir baza i Kigali.

Amb Kayonga kandi avuga ko abakerarugendo b’Abashinwa basura u Rwanda n’ibyiza birutatse bafite amahirwe akomeye kuko by’umwihariko abasura Pariki z’igihugu biborohera kuko baba bashobora kuzisura zose mu gihe gito.

Ati “Icya mbere nabashishikariza gusura Pariki z’igihugu kuko u Rwanda ni igihugu gito kandi gifite pariki nziza zifite ibintu byiza bashobora gusura ariko kuba u Rwanda ari ruto bishobora kugufasha kuva muri pariki imwe ujya mu yindi. Ku buryo amasaha abiri uvuye muri Pariki y’Akagera uhita ugera muri Pariki y’Iburunga ukibonera Ingangi.”

Abashinwa b’abakerarugendo bakoresheje miliyari 300 z’amadolari mu bukerarugendo mu 2017, nibo bakoresheje menshi ku Isi. Ikigo cy’igihugu cy’Iterambere, RDB, kivuga ko ari amahirwe yo gukurura abasura u Rwanda kuko muri uwo mwaka rwakiriye 5000 bo mu Bushinwa.

Ambasaderi w'u Rwanda mu Bushinwa, Kayonga Charles yavuze ko hari umusaruro mu masezerano u Rwanda ruherutse gusinyana n'u Bushinwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza