Amb. Nduhungirehe yakozwe ku mutima n’icyizere Perezida Kagame yamugiriye

Yanditswe na Karirima A. Ngarambe
Kuya 13 Nzeri 2017 saa 10:12
Yasuwe :
0 0

Amb. Nduhungirehe Olivier uherutse kugirwa Umunyamabanga wa Leta muri Minisiteri y’Ububanyi n’Amahanga, Ubutwererane n’Umuryango w’Ibihugu bya Afurika y‘Iburasirazuba, yagize ibyishimo byo kugirirwa icyizere n’Umukuru w’Igihugu, agahamya ko bigiye no kumuha kugikorera birushijeho.

Kuwa 30 Kanama 2017 ni bwo Olivier Nduhungirehe, wari umaze imyaka ibiri ari Ambasaderi w’u Rwanda mu Bubiligi, yagizwe Umunyamabanga wa Leta muri Minisiteri y’Ububanyi n’Amahanga, Ubutwererane n’Umuryango w’Ibihugu bya Afurika y‘Iburasirazuba aho agiye gukorana bya hafi na Minisitiri Mushikiwabo Louise.

Nduhungirehe wujuje imyaka 42 y’amavuko kuri uyu wa Gatatu tariki ya 13 Nzeri, ni umugabo ufite umugore n’abana babiri, umukobwa w’imyaka 10 n’umuhungu w’imyaka umanani. Yabwiye IGIHE ko inkuru y’inshingano nshya yahawe na Perezida Kagame, yamukoze ku mutima kandi akumva agiye gukora imirimo yisumbuyeho.

Yagize ati "Nayakiranye ibyishimo, kubera ko Nyakubahwa Perezida wa Repubulika yongeye kungirira icyizere akangira umwe mu bagize Guverinoma, Umunyamabanga wa Leta muri Minisiteri y’Ububanyi n’Amahanga, Ubutwererane n’Umuryango w’Ibihugu bya Afurika y‘Iburasirazuba. Rero ni ibyishimo kuri jyewe kuko bituma nzagira uruhare rwisumbuye mu iterambere ry’igihugu."

Nduhungirehe yananyuze mu nshingano zihariye azaba afite akorana na Minisitiri Mushikiwabo.

Yavuze ko inshingano ze ari ugufatanya na Minisitiri Mushikiwabo mu gukomeza kuzuza inshingano za Minisiteri arizo by’umwihariko guteza imbere umubano w’u Rwanda n’amahanga cyane cyane n’umubano w’u Rwanda n’ibihugu byo mu karere; gukomeza guteza imbere ubukungu bw’u Rwanda binyuze mu butwererane ndetse no mu guteza imbere ishoramari mu Rwanda no guteza imbere Diaspora nyarwanda.

Yongeyeho ati "Nk’uko mubizi rero umwaka utaha Perezida wa Repubulika, Paul Kagame azaba ayobora Umuryango wa Afurika Yunze Ubumwe, nka Minisiteri y’Ububanyi n’amahanga n’Ubutwererane n’Umuryango wa Afurika y’Iburasirazuba tuzaba dufite uruhare runini muri iyo Perezidansi y’u Rwanda y’uwo muryango, kakaba rero ari akazi kari imbere kadutegereje. Byose tuzabikorana umurava nk’uko nabirahiriye imbere ya Nyakubahwa Perezida wa Repubulika kugira ngo dukomeze duteze imbere igihugu cyacu tugishakire inshuti, abashoramari, kugira ngo dukomeze twiyubake tuniteza imbere, ari nako duteza imbere umugabane wa Afurika."

Kuva mu 2007 Nduhungirehe ni bwo yatangiye guhabwa inshingano z’ububanyi n’amahanga kuko yabaye Umujyanama wa mbere muri Ambasade y’u Rwanda muri Ethiopia kuva mu 2007 kugeza mu 2010; avuyeyo yoherezwa gukorera muri Ambasade y’u Rwanda i New York muri Leta Zunze Ubumwe za Amerika nabwo ari Umujyanama wa mbere wa Ambasaderi. Aho yari anungirije Uhagarariye u Rwanda mu Muryango w’Abibumbye.

Yavuye muri Amerika muri Gicurasi 2015 agizwe Umuyobozi mukuru w’agateganyo muri Minisiteri y’Ububanyi n’Amahanga n’Ubutwererane ushinzwe imiryango mpuzamahanga, umwanya yahise avaho agirwa Ambasaderi w’u Rwanda mu Bubiligi. Aha avuyeyo agirwa Umunyamabanga wa Leta muri Minisiteri y’Ububanyi n’Amahanga, Ubutwererane n’Umuryango w’Ibihugu bya Afurika y‘Iburasirazuba.

Amb. Nduhungire Olivier, Umunyamabanga wa Leta muri Minisiteri y’Ububanyi n’Amahanga, Ubutwererane n’Umuryango w’Ibihugu bya Afurika y‘Iburasirazuba

kari[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza