00:00:00 IGIHE NETWORK KN KINYARWANDA EN ENGLISH FR FRANCAIS

Ambasade ya Israel yashyikirije Abanyakarongi inka 20

Yanditswe na Nsanzimana Erneste
Kuya 23 Ugushyingo 2022 saa 07:39
Yasuwe :

Ambasaderi wa Israel mu Rwanda, Dr Ron Adam yashyikirije abaturage bo mu Karere ka Karongi inka 20 bagenewe na Leta ya Israel abasaba kuzifata neza kugira ngo zizabageze ku iterambere ibihugu byombi u Rwanda na Israel bibifuriza.

U Rwanda na Israel bifitanye umwubano n’ubufatanye by’umwihariko mu bucuruzi, uburezi, ubuhinzi n’ubworozi bigamije gushyigikira iterambere ry’abaturage b’ibihugu byombi.

Kuva muri 2012 Israel iha abanyeshuri b’Abanyarwanda buruse bakajya gukarishya ubumenyi mu bijyanye no gukoresha ikoranabuhanga mu buhinzi bwa kijyambere.

Karongi ibaye akarere ka gatanu iki gihugu gihaye inka nyuma ya Rulindo, Burera, Gisagara na Nyamasheke. Muri rusange iki gihugu kimaze guha Abanyarwanda batishoboye inka zigera ku 100 zo kubafasha mu rugendo rw’iterambere.

Kuri uyu wa 23 Ugushyingo 2022, ubwo Amb. Dr Ron Adam yashyikirizaga abaturage ba Karongi inka bagenewe na Leta ya Israel, yavuze ko zitanzwe mu rwego rwo gushyigikira gahunda ya Girinka Munyarwanda yatangijwe na Perezida w’u Rwanda Paul Kagame mu 2006.

Ati "Nshimishwa n’iyi gahunda kuko ni igikorwa cy’iterambere rirambye. Izi nka zizabyara boroze n’abandi, bazabona amata, bazabona ifumbire. Abahawe izi nka turabasaba kuzitaho bakazirinda imvura n’izuba, bakazigaburira neza zikagumana ubuzima bwiza, ikindi tubasaba ni ugusangira na bagenzi babo ibyo bafite".

Mukantabana Joyeuse wo mu Murenge wa Rubengera mu Kagari ka Ruragwe yashimye umubano mwiza uri hagati ya Israel n’u Rwanda, avuga ko iyi nka ahawe igiye kumufasha kwiteza imbere.

Ati "Nta tungo nagiraga nahingaga sineze kubera kubura ifumbire, iyi nka izanteza imbere ku gafumbire ku buryo ahantu nasaruraga ibiro 10 by’ibishyimbo nzajya mpakura ibilo 20. Amata nayanywaga nyaguze ariko ubu sinzongera kuyagura kuko baduhaye inka zihaka mu minsi mike izaba ibyaye. Intego mfite ni ukuyifata neza kugira ngo nzoroze n’abandi".

Mbabazi François yavuze ko inka yahawe igiye guhindura imibereho ye, yizeza Leta y’u Rwanda na Leta ya Israel ko agiye kuyifata neza kugira ngo izamuteze imbere anoroze bagenzi be.

Umuyobozi w’Akarere ka Karongi, Mukarutesi Vestine yashimye umubano w’u Rwanda na Leta ya Israel avuga ko abaturage b’akarere ayoboye bafite umunezero mwinshi batewe no kuba Israel yabahaye inka kuko mu muco nyarwanda inka ari ikimenyetso cy’urukundo.

Ati "Izi nka ni ikimenyetso cy’urukundo rurambye abaturage bacu bagiranye na Leta ya Israel. Turabasaba kuzifata neza kugira ngo abana babo bage banywa amata n’abaturanyi babone amata barwanye imirire mibi, ikindi tubasaba ni uko nabo bazitura abandi".

Abaturage bahawe inka bamaze igihe bazitegura, bubatse ibiraro banatera ubwatsi kugira ngo izi nka zitazicwa n’umukeno.

Israel imaze guha Abanyarwanda inka zigera ku 100
Abahawe inka biyemeje kuzifata neza kugira ngo zizabateze imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .