Century Real Estate yizihije isabukuru y’imyaka 10 imaze ituza neza Abanyarwanda (Amafoto)

Yanditswe na Ishimwe Israel
Kuya 14 Gicurasi 2019 saa 01:57
Yasuwe :
0 0

Mu 2009 nibwo Gakwandi Michael na Haba Charles bahuje imbaraga z’ibigo byabo, batangiza Sosiyete ya Century Real Estate (CRE) itanga serivisi z’ubuhuza mu kugura no kugurisha inyubako mu Rwanda.

Icyemezo cyo kwishyira hamwe cyari kigamije gufasha Abanyarwanda kubona serivisi nziza zo kugura, kugurisha no gukodesha inzu kandi nziza.

Century Real Estate yatangiye mu gihe umwuga wo kuranga inzu wari utarimakazwa mu muco w’Abanyarwanda, ndetse byabafashe igihe ngo cyo gusobanura no kumvisha ababagana serivisi batanga.

Mu 2014 nibwo Rwigamba Paul yisunze Haba na Gakwandi mu kongerera imbaraga imikorere ya CRE na serivisi itanga.

Abayobozi b’iki kigo, abakozi bacyo n’abafatanyabikorwa bakorana bahuriye mu birori byo kwizihiza imyaka 10, Century Real Estate imaze ishinzwe; byabereye muri Century Park Hotel i Nyarutarama, ku mugoroba wo ku wa 20 Gicurasi 2019.

CRE yizihije imyaka isaga 10 ikorera mu Rwanda, ishimira inkoramutima z’abakiliya barimo abantu ku giti cyabo, ibigo bya leta n’iby’igenga byayigiriye icyizere biyitiza amaboko.

Century Real Estate yasangiye ibyishimo n’abakiliya bayo

Umuyobozi wa Blue Oceans, Diana Mpyisi, yavuze ko yishimiye kwifatanya na Century Real Estate mu kwizihiza isabukuru y’imyaka 10 ivutse.

Yagize ati “Ndi umukiliya wa Century Real Estate, nkunda serivisi itanga. Ishoramari ryanjye [ikigo cya Blue Oceans kizobereye muri serivisi z’itangazamakuru, itumanaho n’inganda ndangamuco] kibarizwa mu nyubako (Kigali Heights) CRE igenzura. Nkorana na bo iyo nkeneye inyubako kandi batanga serivisi nziza n’umutekano wizewe.’’

Umuyobozi Ushinzwe Ibijyanye n’Umutungo utimukanwa muri Banki y’Ubucuruzi ya KCB, Uwera Evelyn, yavuze ko CRE yabaye amahitamo kubera imikorere yayo.

Ati “Yagaragaje ko itanga serivisi nziza mu bijyanye n’ubuhuza mu gushaka inzu muri Kigali no mu Rwanda hose.’’

Yavuze ko iyi sosiyete ikeneye kongera imbaraga mu kugenzura no guha agaciro imyanya y’ibibanza idakoreshwa ‘kuko byagira ingaruka ku bukungu bw’igihugu.’

Century Real Estate irishimira iterambere yagezeho n'icyizere yagiriwe n'Abanyarwanda bayigana

Umuyobozi ushinzwe Imishinga no kugenzura Umutungo muri Century Real Estate, Rwigamba Paul, yavuze ko bafite icyerekezo cyo gukomeza kwaguka no guha Abanyarwanda serivisi nziza.

Yagize ati “Mu gutangira ntibyari byoroshye, kubona umuntu uranga inzu ye, cyangwa akayitanga atunyuzeho. Uko imyaka yicumye, abantu bagiye bumva akamaro ka serivisi dutanga.’’

Yavuze ko imyaka 10 bayigezeho kubera icyizere bubatse muri serivisi batanga no kugira ibanga mu kazi.

Yakomeje ati “Iyo umuntu agiye kugurisha ikibanza cyangwa inzu aguha inyandiko ze, umuntu iyo akodesha inzu, utamwizeye yazana abajura, akaguhungabanya.’’

Rwigamba yavuze ko CRE ifite gahunda yo kwibona nka sosiyete mpuzamahanga ariko nyuma yo ‘kunoza neza serivisi iha Abanyarwanda no kubyaza umusaruro amahirwe ari mu gihugu.’

Yakomeje ashimangira ko “Kugera ku myaka 10 ni abantu twakoranye na bo. Tudafite abakozi beza, ibintu birapfa. Abantu baduha akazi n’abo dukorana nibo badufasha.’’

Century Real Estate yatangiye ifite imbogamizi z’abakozi batamaraga kabiri ariko imaze gushikama nyuma yo kwinjira mu mikoranire na Kaminuza y’u Rwanda, aho iyifasha guha abanyeshuri igihe cyo kwimenyereza no guha akazi abitwaye neza.

CRE ifite abakozi barenga 35 bakora mu byiciro bitandukanye birimo abagurisha, abakodesha n’ibindi.

Ngabo Romeo Romaric watangiye gukorana na CRE mu 2014, yahembwe nk’umukozi mwiza, anashimirwa mu ruhame.

Yabwiye IGIHE ko “Ishimwe nahawe ni ikimenyetso cyo kuzirikana ko tukiri kumwe. Abakoresha banjye ni inshuti zisanzwe, babaye umuryango kurusha kuba abankoresha. Birumvikana ko umuntu atareka inshuti.’’

Iyi sosiyete ifite intego yo kubaka ikigo cyizewe mu gutanga serivisi z’ubuhuza mu by’ubwubatsi, guha Abanyarwanda ubumenyi buhagije kandi bukenewe ku isoko, ubujyanama n’amahugurwa atandukanye.

Ikibazo cy’imiturire kiri mu bihangayikishije Isi na Afurika idasigaye, imibare igaragaza ko abatuye uyu mugabane baziyongeraho miliyari 1.3 mu 2050, ariyo mpamvu hakwiye ubushishozi mu guteganyiriza ahazaza.

Umuyobozi Ushinzwe Ibijyanye n’Umutungo utimukanwa muri Cogebanque, Iradukunda Igor (ibumoso) yitabiriye ibirori CRE yizihirijemo isabukuru y'imyaka 10
Pasiteri Hassan Kibirango (uwa kabiri ibumoso) ubarizwa mu Itorero rya Christian Life Assembly ari mu bitabiriye ibi birori
Abagize Neptunez Deejays ni bo bavanze umuziki muri ibi birori
Abakozi ba Century Real Estate bashimiwe ubwitange bubaranga mu kazi
Rwigamba yavuze ko iterambere ry'imyaka 10 bishimira batari kurigeraho iyo batagira abakozi beza bakorana
Umuyobozi Mukuru muri Sosiyete ya Century Real Estate, Gakwandi Michael, yashimye buri wese wagize uruhare mu guteza imbere serivisi z'ubuhuza bw'abashaka kugura no gukodesha inzu zo kubamo
Abafatanyabikorwa n'abakozi babaye inkoramutima kuri CRE bashimiwe mu ruhame
Itsinda rya Neptunez ryasusurukije abitabiriye ibi birori binyuze mu majwi meza y'urusobe, ibyuma bya kizungu bifite umuziki wuje uburyohe
Century Real Estate yizihije isabukuru y’imyaka 10 imaze ituza neza Abanyarwanda
Wari umunsi w'ibyishimo no gusangira
Umuyobozi ushinzwe Imishinga no kugenzura Umutungo muri Century Real Estate, Rwigamba Paul, yavuze ko bafite icyerekezo cyo gukomeza guha Abanyarwanda serivisi nziza
Gakwandi Michael na Pule Aisha bari mu bayobozi ba CRE bishimira isabukuru y'imyaka 10

Amafoto: Himbaza Pacis

Video: Hakizimana Alain na Cyuzuzo Rodrigue


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza