Dr. Ndayambaje yagaragaje ko ireme ry’uburezi ritagerwaho hatitawe ku mashuri nderabarezi

Yanditswe na Evariste Nsengimana
Kuya 14 Gicurasi 2019 saa 02:34
Yasuwe :
0 0

Umuyobozi w’Ikigo gishinzwe guteza imbere Uburezi (REB), Dr. Ndayambaje Irénée, yavuze ko gahunda zashyizweho zo kuzamura amashuri nderabarezi ari inkingi ikomeye yitezweho kuzamura ireme ry’uburezi mu Rwanda.

Dr. Ndayambaje yabigarutseho ku wa 10 Gicurasi 2019, ubwo yasuraga ishuri Nderabarezi rya Kirambo riherereye mu Karere ka Burera.

Ni ibiganiro byibanze ku kamaro kwita kuri mwarimu bigira ku iterambere ry’igihugu, kuko ariwe ufasha abantu kuba abaturage no kugira ubuzima bwiza.

Dr. Ndayambaje yavuze ko Leta yashyizeho icyerekezo gihamye na gahunda zigenewe gukemura ibibazo uburezi bufite ngo bijyane na gahunda z’iterambere ry’ikinyagihumbi zijyane nabwo.

Dr. Ndayambaje yavuze ko Leta yashyize imbaraga muri gahunda y’uburezi kuri bose ariko ireme ryabwo rigomba kuza imbere.

Ati “Ntabwo wavuga uburezi kuri bose n’ireme ry’uburezi utibanze ku mashuri nderabarezi.”

Dr. Ndayambaje Irénée yavuze ko ibinyujije muri Minisiteri y’Uburezi, Leta yahaye umwihariko amashuri nderabarezi mu rwego rwo kuzamura ireme ry’uburezi.

Ati “Umwuga w’ubwarimu ugiye kurushaho kubahwa; ubu kwinjira mu ishuri nderabarezi bigiye kuba inzira ifunganye bitewe n’uko tuzajya twakira abanyeshuri bake b’abahanga gusa.”

Umuhanga mu mitekerereze w’umwongereza John Locke yavuze ko ‘Umwana ukivuka ari nk’urupapuro rutanditseho ikintu na kimwe, abarimu aribo bagomba kumuha ubumenyi bukwiye uhereye ku myaka yo hasi, kugira ngo bakure bavemo abaturage Isi ikeneye’.

Dr. Ndayambaje ati “Umwarimu ni umusingi wa byose; afata umuntu utazwi akamugira ikirangirire, ariyo mpamvu kugira ngo duhe agaciro uruhare rwanyu mu burezi bwacu, amashuri y’incuke agomba kujya aha akazi abarimu babizobereye barangije amashuri nderabarezi.”

Dr. Ndayambaje Irénée yavuze ko agaciro ka mwarimu katazigera kirengagizwa kuko iyo ushaka kubaka inzu ikomeye, uhera ku musingi.

Guhera umwaka w’amashuri wa 2020 Leta izajya itangira abanyeshuri biga uburezi 50% y’amafaranga y’ishuri mu buryo bwo kubashishikariza uburezi no kuzirikana uruhare rwabo mu burezi.

N’ubwo hari ibihembo bigenerwa abarimu nko gushimirwa n’abo bareze, ababyeyi b’abana no kumva bishimiye uruhare rwabo mu bisekuru by’ahazaza, Leta yanatangiye gahunda zo kuzamura imibereho yabo birimo nko kongera 10% ku mushahara wabo.

Dr. Ndayambaje yavuze ko mu minsi mike hazatangira kujya habaho isuzumabumenyi rihoraho rizagira uruhare runini ku ireme ry’uburezi ryifuzwa.

Ati “Uko turushaho kuvuga ku ireme ry’uburezi, tugomba no gusuzuma umusaruro uboneka binyuze mu isuzumabumenyi rihoraho guhera ku rwego rw’ishuri kugeza ku rwego rw’igihugu.”

Yashishikarije abanyeshuri ba TTC Kirambo kwitabira amarushanwa yo kwandika ku rwego rwa Afurika y’Iburasirazuba nk’uburyo bwo kuzamura ubumenyi mu ndimi, by’umwihariko mu rw’icyongereza.

Dr. Ndayambaje yavuze ko mu minsi mike gushyira abarimu bashya mu kazi bizajya bikorwa kandi bigakurikiranwa na REB ifatanyije na Minisiteri y’Ubutegetsi bw’Igihugu mu rwego rwo gukemura ibibazo byagiye bigaragara mu kubaha akazi.

Dr. Ndayambaje yagaragaje ko ireme ry’uburezi ritagerwaho hatitawe ku mashuri nderabarezi
Dr. Ndayambaje yari yasuye ishuri Nderabarezi rya Kirambo riherereye mu Karere ka Burera

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza