Impamvu ikigo cyigenga cyeguriwe kwakira ubusabe bw’Abanyarwanda bakeneye viza za Schengen

Yanditswe na Ferdinand Maniraguha
Kuya 10 Mutarama 2019 saa 04:11
Yasuwe :
0 0

Hashize iminsi mike Ambasade y’u Bubiligi mu Rwanda itangaje ko ikigo VFS Global cyeguriwe kwakira ubusabe bw’abanyarwanda bashaka viza zo kujya muri icyo gihugu no mu gace ka Schengen.

Agace ka Schengen kagizwe n’ibihugu 26 by’i Burayi byashyize umukono ku masezerano yasinyiwe i Schengen muri Luxembourg, bikemeranya gukora nk’agace kamwe mu bijyanye n’ingendo mpuzamahanga.

U Bubiligi buhagarariye ibihugu 19 byo muri Schengen mu gutanga viza zitarengeje iminsi 90. Ibyo bihugu ni Autriche, Repubulika ya Tchèque, Estonie, Finlande, u Bufaransa, u Budage, u Bugereki, Hongrie, u Butaliyani, Lettonie, Lituanie, Luxembourg, Malta, u Buholandi, Portugal, Slovénie, Espagne, Suède n’u Busuwisi.

Ambasaderi w’u Bubiligi mu Rwanda, Benoit Ryelandt, mu kiganiro n’abanyamakuru kuri uyu wa Kane, yavuze ko kuba barahaye VFS Global ububasha bwo kwakira dosiye za viza nta mpinduka bizazana mu buryo zatangwaga.

Ryelandt yavuze ko gusuzuma no gufata umwanzuro ku busabe bwa viza bizaguma mu maboko ya Ambasade. Bivuze ko nyuma yo kwakira dosiye, VFS Global izajya ihita iyohereza muri Ambasade.

Yavuze ko guha inshingano VFS Global ari uko abasaba viza biyongereye bikagora abakozi ba ambasade kubifatanya n’izindi nshingano.

Mu 2013 ambasade y’u Bubiligi yakiriye ubusabe 5000 bw’abasaba viza ariko mu 2018 yakiriye ubusabe 9500.

Ambasaderi Ryelandt yavuze impamvu abanyarwanda benshi basaba viza zo kujya mu Bubiligi no mu bihugu bya Schengen ari uko bateye imbere.

Ati “Ubukungu bw’u Rwanda bumaze imyaka buhagaze neza, bivuze ko abantu bafite amikoro yo gutembera hirya no hino no gusura abavandimwe mu bihugu bya Schengen. Nkeka ko hari abantu benshi hano bafite ubushobozi bwo kujya hanze ariko hari n’umubano umeze neza w’u Rwanda n’ibihugu by’i Burayi.”

Umuyobozi wa VFS Global muri Afurika yo munsi y’Ubutayu bwa Sahara, Hariprasad Viswanathan yavuze ko bazajya bafasha abashaka gusaba viza kuzuza ibyangombwa byose bikenewe, ufite ikibazo bakamusobanurira.

Yavuze ko hari amafaranga make ya serivisi bazajya baca uzanye dosiye, gusa nubwo atayavuze umubare ashimangira ko atazaba menshi ku buryo yaca intege abashaka viza.

Kwakira ubusabe bw’abashaka viza zo mu Bubiligi na Schengen bizatangira gukorwa na VFS Global guhera ku wa Kabiri tariki tariki 15 Mutarama 2019 ku cyicaro cyayo i Kigali ku nyubako nshya iri imbere ya St Michel.

Mu bantu 9500 baje gusaba viza muri Ambasade y’u Bubligi umwaka ushize, 85 % bareyemerewe.

U Bubiligi kandi mu Rwanda bwakira ubusabe bwa viza ku banye-Congo batuye muri imwe mu ntara za Kivu, baba bakeneye kujya mu Bubiligi, u Bufaransa, u Buholandi, Luxembourg na Suède.

VFS Global yahawe kujya yakira ubusabe bw’abakeneye izi viza, ifite ibiro 2834 ku Isi bisabirwamo serivisi, igakorera mu bihugu 141 ku migabane itanu. Ikorana na Guverinoma 62.

Iki kigo kivuga ko kimaze gufasha abantu mu busabe miliyoni 187 kuva cyatangira mu 2001.

VFS Global ifite icyicaro gikuru i Dubai, ikanagira ibigo biyishamikiyeho i Burayi, Amerika na Aziya.

Ambasaderi w’u Bubiligi mu Rwanda, Benoit Ryelandt, yavuze ko guha inshingano VFS Global ari uko abasaba viza biyongereye bikagora abakozi ba ambasade kubifatanya n’izindi nshingano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza