Imyanzuro umunani y’Inama y’Umushyikirano iherutse yageze kuki ?

Yanditswe na Ferdinand Maniraguha
Kuya 5 Ukuboza 2018 saa 01:09
Yasuwe :
0 0

Kuwa Kane no kuwa Gatanu w’icyumweru gitaha, abanyarwanda baturutse impande zose z’Isi n’inshuti zabo, bazakoranira muri Kigali Convention Centre, mu nama yo kungurana ibitekerezo ku buzima rusange bw’igihugu izwi nk’Umushyikirano.

Ni inama ngarukamwaka y’Umushyikirano igiye kuba ku nshuro ya 16, ireba uko ubuzima rusange bw’igihugu buhagaze, hagatangwa inama n’ibitekerezo hagafatwa n’imyanzuro igomba gushyirwa mu bikorwa kugira ngo ibitameze neza binozwe.

Mu gihe hitegurwa iyo nama y’umushyikirano ku nshuro ya 16, IGIHE yasubije amaso inyuma, ireba uburyo imyanzuro umunani y’inama y’Umushyikirano iherutse yashyizwe mu bikorwa. Iyi myanzuro irareba ubuzima rusange bw’igihugu yaba mu burezi, umuco, ubuzima, ubukungu n’ibindi.

Uburezi

Inama ya 15 y’Umushyikirano yafashe imyanzuro irimo uwo ‘gukomeza gushyiraho ingamba n’impinduka za ngombwa zigamije kuzamura ireme ry’uburezi mu byiciro byose by’uburezi, gusuzuma ingengabihe y’amashuri, kunoza imyigishirize y’indimi, kongera amashuri yigisha ubumenyi n’ubumenyingiro no kurwanya impamvu zituma abana bata ishuri’.

Mu byakozwe kuri uyu mwanzuro harimo kuba Minisiteri y’Uburezi yaratangaje ko ingengabihe y’amashuri abanza n’ayisumbuye iri gusuzumwa, ku buryo mu 2020 umwaka w’amashuri ushobora kujya utangira muri Nzeri.

Mu kunoza imyigishirize y’indimi, muri Werurwe uyu mwaka hatangajwe ko hari kunozwa uburyo abarimu bajya bahabwa ikizamini cy’Icyongereza, hakamenyekana urwego bariho bagafashwa kongera ubumenyi, abo bigaragaye ko batiyongera bakaba basezererwa.

Ubwo buryo buzanakoreshwa ku banyeshuri barangije buri cyiciro mu mashuri yisumbuye, amakuru na za Kaminuza ndetse uwatsinzwe Icyongereza mu cyiciro kimwe ntiyemerewe kujya mu cyiciro gikurikiyeho.

Ku kongera amashuri y’imyuga n’ubumenyigiro, Minisitiri w’Uburezi Dr Mutimura Eugène ubwo yatangizaga ibizamini bisoza amashuri yisumbuye mu minsi ishize, yavuze ko hari ibimaze gukowa kandi bizakomeza.

Yagize ati “Dufite intego ko muri 2024 tuba tugeze nibura kuri 60 % z’abana bajya mu mashuri y’imyuga n’ubumenyingiro ugereranyije n’abajya mu mashuri y’ubumenyi rusange. Ubu tugeze hafi 45 %. Ibyo bidusaba ko dukomeza kubaka tugashyiraho imbaraga. Hari amashuri icumi tugiye kubaka dufatanyije na Leta y’u Buhinde.”

Ubuzima

Mu rwego rw’ubuzima, hafashwe umwanzuro wo kongera ibikorwa remezo no kurushaho kubaka ubushobozi bw’abakora mu rwego rw’ubuvuzi, gushyira imbaraga mu guhangana n’ibyorezo bitandukanye ndetse no kurushaho gutanga serivisi nziza.

Mu bijyanye no kongera ibikorwa remezo, Guverinoma y’u Rwanda mu ngengo y’imari ya 2018/2019 yatangaje ko igiye kubaka no kuvugurura ibitaro bitandatu biri ku rwego rw’Uturere, bizuzura bitwaye asaga miliyari 30Frw.

Harateganywa kuvugurura ibitaro bya Byumba mu karere ka Gicumbi n’ibya Munini mu Karere ka Nyaruguru.

Hari n’ibishya bizubakwa birimo iby’Akarere ka Nyarugenge byatangiye, ibya Nyabitekeri mu Karere ka Muhanga, ibya Gatunda mu Karere ka Nyagatare n’ibya Gatonde mu Karere ka Gakenke.

Mu bijyanye no kubaka ubushobozi bw’abakora mu rwego rw’ubuzima hibandwa ku ndwara z’ibyorezo, mu Ugushyingo 2018 Minisiteri y’ubuzima yatangije imyitozo ku baganga igamije kubaha ubushobozi bwo guhangana no gukumira icyorezo cya Ebola.

Ni nyuma y’uko icyo cyorezo gihitanye abasaga 200 mu Burasirazuba bwa Repubulika Iharanira Demokarasi ya Congo ihana imbibi n’u Rwanda.

Iyi nama kandi yafashe umwanzuro wo kurushaho gukangurira ababyeyi no kubaha ubumenyi mu mbonezamikurire y’abana bato, kwita cyane cyane ku mirire myiza, isuku no kurushaho guteza imbere amarerero y’abana.

Hakozwe ubukangurambaga mu turere twose kuri serivisi zikomatanyije z’imbonezamikurire y’abana bato zirimo imirire myiza n’ubuzima bw’umubyeyi n’umwana.

Hibanzwe ku turere 13 dufite umubare mwinshi w’abana bagwingiye turimo Rusizi, Karongi, Rutsiro, Nyabihu, Ngororero, Rubavu, Kayonza, Bugesera, Gakenke, Ruhango, Huye, Nyamagabe na Nyaruguru.

Ubukungu

Mu bijyanye n’ubukungu hafashwe umwanzuro wo kurushaho gukorana n’abikorera kugira ngo inganda n’abaturage babashe kubona amashanyarazi ku giciro gihendutse mu rwego rwo korohereza ishoramari.

Mu korohereza abaturage kubona amashanyarazi, muri Mata uyu mwaka Sosiyete ishinzwe Ingufu mu Rwanda (REG) yatangaje amavugurura mashya iri gukora kugira ngo abakiliya bayo babashe kubona serivisi zinoze ndetse no guhangana n’ibibazo byakundaga kugaragara birimo icikagurika rya hato na hato ry’umuriro.

Mu mavugurura REG yatangije harimo kongerera ubushobozi imiyoboro ikwirakwiza amashanyarazi, uburyo bw’ikoranabuhanga bwo gukurikirana inshuro n’igihe abafatabuguzi bamara badafite umuriro w’amashanyarazi, gusaba umuriro binyuze kuri internet no kugabanya iminsi byasabaga kugira ngo uwasabwe guhabwa umuriro awubone.

Muri Kanama, Urwego Ngenzuramikorere (RURA) rwatangaje ibiciro bishya by’umuriro w’amashanyarazi byorohereza cyane abafite inganda.

RURA yavuze ko inganda zizajya zishyuzwa amashanyarazi bitewe n’igihe cy’umunsi uruganda ruri kuyakoreshamo, niba ari mu gihe abantu batari kuyakoresha ari benshi zishyure ku giciro gito, naho mu gihe abaturage bari kuyakoresha nabo, zishyure amafaranga asanzwe.

Hananzuwe kongera ubukangurambaga mu kwizigamira no kurushaho gufasha ishoramari ry’ibikorerwa imbere mu gihugu (Made in Rwanda, Start in Rwanda, Grow in Rwanda and Beyond), mu rwego rwo guhanga no kunoza umurimo ndetse no kugabanya icyuho hagati y’ibitumizwa n’ibyoherezwa mu mahanga.

Ku kugabanya icyuho hagati y’ibitumizwa mu mahanga n’ibyoherezwayo, Banki Nkuru y’Igihugu (BNR) muri Kanama yatangaje ko ibyo u Rwanda rwohereza hanze byiyongereho 23.2 % mu mezi atandatu ya mbere ya 2018, bigera kuri miliyoni 463.16 z’amadolari bivuye kuri miliyoni 375.91$ byariho mu mezi nk’ayo umwaka ushize.

Ikinyuranyo cy’ibyo u Rwanda rwohereza hanze cyagabanyutseho 2% mu mezi atandatu ya mbere ya 2018 ugereranyje n’igihe nk’icyo muri 2017.

Mu guteza imbere ibikorerwa mu Rwanda kandi, inganda nka Volkswagen yo mu Budage izobereye mu gukora imodoka, yatangije ibikorwa byo kuziteranyiriza mu Rwanda, guhera muri Kamena uyu mwaka.

Guteza imbere ibikorerwa mu Rwanda byajyanye no gushishikariza abanyarwanda kubigura, by’umwihariko abakozi ba Leta bakaba baherutse gusabwa kujya nibura bambara imyenda yakorewe mu Rwanda rimwe mu kwezi.

Umuco

Umuco nk’inkingi ikomeye y’imibereho y’igihugu, ntiwibagiranye mu nama ya 15 y’Umushyikirano kuko hafashwe umwanzuro wo gukomeza gusigasira indangagaciro zishingiye ku muco wacu no kurushaho kuzitoza abakiri bato n’abanyarwanda batuye mu mahanga kugira ngo zidufashe kwihuta mu iterambere.

Inteko Nyarwanda y’ururimi n’umuco (RALC) mu Ukwakira yamuritse ‘Igitabo Nyobozi ku Ndangagaciro remezo z’umuco w’u Rwanda’ cyitezweho gufasha ababyeyi, abarezi n’abanyeshuri gucengera indangaciro zarangaga umuco w’abakurambere n’uburyo zakwifashisha mu gihe tugezemo.

RALC ivuga ko iki gitabo cyoherejwe mu mashuri, igisigaye kaba ari ugukorana na Minisiteri y’Ububanyi n’amahanga kugira ngo kigezwe no ku banyarwanda baba mu mahanga.

Hari kandi umwanzuro wo gukomeza gushimangira ubufatanye hagati y’inzego za Leta, ababyeyi, sosiyete sivile n’imiryango ishingiye ku madini n’amatorero mu kurushaho kwigisha ururimi rw’Ikinyarwanda bihereye mu muryango, mu mashuri, mu biganiro bitangwa mu bitangazamakuru.

RALC ivuga ko yakoze ubukangurambaga butandukanye bugamije kongera ubumenyi mu rurimi rw’Ikinyarwanda. Nko muri Nzeri uyu mwaka mu mashuri yose yisumbuye afite icyiciro cya kabiri hatangijwe amarushanwa yo kwandika neza Ikinyarwanda ku banyeshuri. Akorwa abayitabiriye barushanwa kwandika neza Imivugo n’Inkuru ngufi.

Umwanzuro wa nyuma wari ugushyiraho gahunda y’urugerero ruciye ingando kugira ngo urubyiruko rurusheho gukora imirimo ruri hamwe.

Urugerero ruciye ingando rwatangiye guhera muri Gicurasi uyu mwaka kugeza muri Kamena. Uru rugerero nirwo rwasimbuye Itorero ryajyaga ryakira abarangije amashuri yisumbuye.

Perezida Kagame na Madamu Jeannette Kagame bitabiriye inama y'Umushyikirano ku nshuro ya 15
Abanyarwanda baba muri Diaspora bafatanya n'ababa mu gihugu bagatanga ibitekerezo bicyubaka
Abayobozi mu nzego zose z'igihugu bitabira inama y'Umushyikirano igiye kuba ku nshuro ya 16

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza