Inkotanyi ntizateye u Rwanda ahubwo zaratashye-Bamporiki

Yanditswe na Ishimwe Israel, Karirima A. Ngarambe
Kuya 12 Nyakanga 2018 saa 12:35
Yasuwe :
0 1

Perezida w’Itorero ry’Igihugu, Bamporiki Edouard, yavuze ko mu Rwanda rwo hambere abakurambere baguye igihugu akoresheje iturufu yo kutavangura, byatumye ubu bafatwa nk’intwari zacyitangiye.

Bamporiki yasobanuye ko kuva ku ngoma za cyami, u Rwanda rwari rwubakiye ku kwitangira igihugu kurusha ibindi byose, ashimangira ko iyi nzira yakomeje guharurwa na FPR yubatse ubunyarwanda butajegajega budashingiye ku bwoko.

Mu kiganiro yatanze ku wa 6 Nyakanga 2018, mu gutangiza umwiherero w’abanyamuryango ba FPR Inkotanyi i Burayi wabereye mu gace ka Coventry mu Bwongereza, Bamporiki yavuze ko Abanyarwanda barwanye bakoresheje intwaro zitandukanye zirimo kutavangura abarwanyi, byatumaga abatabaye batahukana intsinzi.

Bamporiki yabwiye abari muri uyu mwiherero ko ahagana mu 1700, Umwami Kilima Rujugira yagiye ahitwa Rutunga muri Gasabo, atera igiti yaciriyeho iteka ko u Rwanda rutera rudaterwa.

Yagize ati “Mperutse gutanga iki kiganiro abantu barambwira bati ko ‘Inkotanyi zaruteye?’Ndavuga nti ‘oya ntabwo zaruteye zaratashye. Ntawe utera ataha. Ujya iwabo iyo bamubangamiye arugurura.”

Ku wa Mbere Ukwakira 1990, ni wo munsi hatangiye urugamba rwo kubohora u Rwanda ku ngoyi y’ubutegetsi bubi bwimakaje amoko, itonesha, ivangura n’ibindi byagejeje kuri Jenoside yakorewe Abatutsi igahitana abarenga miliyoni. Intsinzi yabonetse ku wa 4 Nyakanga 1994 ubwo RPA yabohoraga Umujyi wa Kigali nyuma y’uwa Butare, byakurikiwe no kuba Guverinoma yariho yarahise yerekeza mu buhungiro muri Zaïre.

U Rwanda ntabwo rufite abanzi, ni abantu bayobye

Bamporiki yavuze ku banzi b’igihugu abagereranya n’abantu bayobye. Yagize ati ‘‘Kuvuga ngo ufite umwanzi utakurasa, utahiganwa na we kandi ari wo muri wowe gukomeza kumwita umwanzi bishobora kumuha akabaraga. Ahubwo iyo umubwiye ngo waratannye ahubwo uzataha ryari ko watannye?’’

Yasobanuye ko umwimerere muri gakondo y’Abanyarwanda wari warubatswe mu gihe kirekire unagenderwaho mu kurwana ingamba wasenywe n’abakoloni binyuze mu guca amoko mu bantu.

Yagize ati ‘‘Hari abantu bakemera ko uko ureshya byagushyira mu bwoko runaka. Umuntu areshya nuko atunze, umuntu asa nuko atunze, umuntu aramuka uko yaraye. Ntabwo ushobora kuvuga ngo Bamporiki azisiga ninogereze, ntabwo bishoboka. Uzasa uko wisize. Byaratugoye (kwemera gucamo abantu amoko) Umwami Musinga atangira kubyanga bamucira i Kamembe muri Cyangugu, akomereza Moba.’’

Bamporiki yavuze ko kuvuga amateka y’u Rwanda uhereye mu 1959 hari ibitakara kuko azingiye mu 1926.

Uyu muyobozi w’itorero yavuze ko Abanyarwanda baba muri Diaspora bakwiye kwirinda kuvuga ubwiru bw’imbere bakabika ibanga.

Yagize ati ‘‘Icyaha gikomeye mu bantu ni ukuba turi hano turi abanyamuryango, tukagira ubwiru bwacu bw’ibyo tuganira warangiza ukaba umusemuzi w’ibigarasha. Byanze bikunze iyo umuntu mutataramanye hari ibintu atorera hejuru ntamenye ibyo aribyo. Ubwiru bw’i Rwanda bwasemuwe n’abo mu nda y’ingoma barimo Kayondo wavuze ko ibyo Abanyarwanda bagenderamo ari ibishenzi, abazungu barabyinjirira barabimenya, baradusenya baraturangiza.’’

Bamporiki yabwiye cyane urubyiruko ko ibyo intwari zitangiye birimo gusigasira umuco no gutekerereza mu nganzo yawo byatakaye.

Ati ‘‘Ntiwavuga umuco umwami atakaye kuko ariwe murinzi wawo. Buri muyobozi avoma mu nganzo y’abamubanjirije keretse iyo uwamubajirije yasibye inzira. Nta kintu Kagame yavoma mu nganzo ya Habyarimana kuko ni iriba ritobamye ariko ararirenga akajya gushaka mu bakurambere bamubanjirije akagenda atuvunguriraho.’’

Yagaragaje kandi uko Habyarimana yakoranye na leta zitandukanye bigatuma Abanyarwanda batakaza indangagaciro zabo.

Yashimiye ababyeyi bashoboye kubungabunga umuco n’ururimi no kurerera abana bafite indangagaciro mu buhungiro banavuyemo abatangije urugamba rwo kubohora igihugu, rwahagaritse Jenoside.

Yagize ati ‘‘Urugamba rwo gukomeza kubaka igihugu ntimururebere mu mayero n’amadolari, mururebere mu ndangagaciro n’intekerezo z’abakurambere bavugaga ngo igihugu nagipfira, ariko nticyajya ku manga mpagaze ndebera.’’


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza