Iyicarubozo rya CMI mu mafoto y’umunyarwanda washimutiwe muri Uganda

Yanditswe na IGIHE
Kuya 12 Werurwe 2019 saa 09:37
Yasuwe :
0 0

Guhera kuri uyu wa Mbere, ku mbuga nkoranyambaga hari gucicikana amafoto ateye agahinda y’umunyarwanda Moses Ishimwe Rutare, umaze amezi abiri atoterezwa muri gereza z’Urwego rwa Gisirikare rushinzwe ubutasi muri Uganda (CMI).

Rutare yarekuwe by’agateganyo kuri uyu wa Mbere tariki 11 Werurwe nyuma yo gutanga ingwate n’abishingizi.

Mu mafoto, rwiyemezamirimo Moses Ishimwe Rutare washimuswe na CMI tariki 22 Ukuboza umwaka ushize, agaragara nk’utariho ugereranyije na Rutare wa mbere.

Ifoto yafotowe atarashimutwa igaragaza umugabo wemye ufite ubuzima bwiza, wifitiye icyizere wambaye neza nk’umucuruzi n’utwumvisho (ecouteurs) mu matwi.

Ugereranyije n’ifoto yafotowe nyuma y’amezi abiri n’igice ari mu maboko ya CMI, agahinda kwakwica.

Igaragaza neza ubunyamaswa bwa CMI. Muri iyo foto nshya Rutare bigaragara ko yananutse cyane, bishoboka cyane ko yari amaze igihe yicishwa inzara.

Ikinyamakuru Virunga Post cyatangaje ko CMI ifite uburyo bwihariye ikoreramo iyicarubozo abo yashimuse nkuko byagendekeye Roger Donne Kayibanda, uherutse kugarurwa mu Rwanda nyuma y’igihe atoterezwa muri gereza ya CMI i Mbuya.

Abanyuze muri ayo mabagiro ya CMI bavuga ko bafashwe bagaburirwa kawunga gusa n’ibishyimbo byereramo amazi. Kenshi ngo baraza bakabimena kuri sima, ufunzwe akirwariza.

Rutare ameze nk’umusaza, ateye agahinda kumureba bigaragaza ko yakorewe irindi yicarubozo rirenze kwicishwa inzara.

Abanyuze muri ayo mabagiro ya CMI bemeza ko nka Mbuya n’ahandi mu nzu z’imbohe za CMI habarizwa abanyarwanda benshi bameze nka Rutare.

Bavuga uburyo abakozi ba CMI bakorana bya hafi n’abakozi ba RNC ya Kayumba Nyamwasa, binjiye mu nzego z’umutekano za Uganda, bagakubita bakanototeza mu buryo bwose abanyarwanda bafashwe bifashishije insinga z’amashanyarazi n’ibindi bintu bikomeye.

Benshi mu bakorewe iryo yicarubozo bagiye bahavana ubumuga nko kuvunwa amagufwa, amaboko cyangwa amaguru.

Ibinyamakuru byo muri Uganda byanditse ko Rutare yafashwe agendagenda hafi y’inyubako ya CMI. Icyakora ntabwo batangaza icyo kugendagenda bisobanuye.

Nubwo yafashwe ashinjwa kuzerera, ntabwo aribyo ashinjwa mu rukiko kuko umushinjacyaha avuga ko yinjiye mu gihugu mu buryo bunyuranyije n’amategeko.

Inkuru ya Virunga Post ivuga ko ubusanzwe ibyaha byo kwinjira cyangwa kuba muri Uganda bijyanye n’amategeko agenga urujya n’uruza rw’abantu mu muryango wa Afurika y’Iburasirazuba (EAC) kandi ayo mategeko arasobanutse neza. Avuga ko abaturage b’igihugu cyose kigize uwo muryango bemerewe gutembera hose kandi ko nta n’umwe ushobora kubihanirwa.

Amakuru yizewe icyo kinyamakuru gifite nuko kwinjira muri Uganda mu buryo butemewe ari icyaha kigerekwa kuwo CMI yafashe ngo ikomeze gihisha amabi yayo.

Ukuri nuko CMI yashimuse Moses Ishimwe Rutare kuko yari anyuze hafi y’inzu ya Brig Gen Abel Kandiho, umuyobozi wa CMI. Byabaye tariki 22 Ukuboza 2018 ubwo yari yagiye mu masengesho ku cyicaro cy’itorero Zoe Ministries mu gace ka Bugolobi hamwe n’umugore we Eunice Isure.

Urusengero rwa Zoe Ministries ruri hafi y’inzu ya Kandiho. Ubwo amasengesho yari arimbanyije ahagana saa sita n’iminota 50 mama wa Rutare yamuhamagaye kuri telefone. Undi yasohotse avugira kuri telefone yerekeza mu gahanda kazwi nka Luthuli Avenue yerekeza ahari inzu ya Kandiho ariko atabizi.

Bivugwa ko abakozi ba CMI bahawe amabwiriza yo guhagarika uwo ari we wese wiha guca hafi y’inzu ya shebuja, bakamuhata ibibazo.

Rutare yageze hafi y’iyo nzu ahagarikwa n’abantu bafite intwaro ariko bambaye gisivile. Bamusabye kwivuga bamaze kumva ako ari umunyarwanda bahita bamuta muri yombi.

Yagerageje kuvuga icyamuzanye aho ariko biba iby’ubusa. Ku bakozi ba CMI, kuba uri umunyarwanda biba ari icyaha cyuzuye cyo kujyanwa mu ibagiro ryayo riri ku cyicaro gikuru i Mbuya cyangwa ahandi bakorera iyicarubozo.

Ibyabaye kuri Rutare ndetse no ku bandi byerekana uburyo abayobozi ba Uganda biyemeje kubeshya, iyo batinyuka kuvuga ko “Nta munyarwanda wigeze atotezwa cyangwa ngo agirirwe nabi muri Uganda.”

Minisitiri w’Ububanyi n’amahanga Sam Kutesa aherutse kubyemeza mu itangazo ryavugaga ku mubano w’u Rwanda na Uganda ariko ibihamya biramunyomoza.

Minisitiri w’ubutabera n’Itegeko Nshinga Kahinda Otafiire yavuze ko “Nta munyarwanda wafashwe nabi, wafunzwe bitemewe n’amategeko cyangwa watotejwe n’ubutegetsi bwa Uganda.” Nyamara amafoto ya Rutare agaragaza ibitandukanye n’ibyo.

Abanyamategeko Eron Kiiza, Eric Kavuma na Simon Peter kuwa Mbere tariki 11 Werurwe 2019 bavuze ko benshi mu bakiliya babo b’abanyarwanda batotejwe ndetse bagiye bafungwa nabi ntibahabwe ubuvuzi.

Bavuze n’amazina ya bamwe batotejwe nka Rene Rutagungira, Iyakaremye Claude, Rwamucyo Emmanuel na Rutayisire Augustine.

Eron Kiiza yagize ati “Bagiye batabwa muri yombi nabi, bagafungwa bitemewe n’amategeko (hejuru y’amasaha 48) ndetse hari nubwo bimara amezi, bakanatotezwa.Nubwo ari abasivile, bagejejwe imbere y’urukiko rwa gisirikare, urubanza rwabo rugenda biguru ntege kandi nta kigaragaza ko bazarekurwa by’agateganyo.”

Yongeyeho ko “Abandi banyarwanda bagiye basubizwa iwabo binyuranyije n’amategeko bakajugunywa ku mupaka, nta buvuzi bahawe nyuma yo gukorerwa iyicarubozo.”

Guverinoma y’u Rwanda itangaza ko abanyarwanda basaga 900 bamaze gufungirwa muri Uganda binyuranyije n’amategeko, gutotezwa cyangwa kwirukanwa.

Ifoto ya Ishimwe yafashwe ubwo yari mu rukiko
Ishimwe mbere yo gufatwa mu Ukuboza 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza