Kayonza: Uruhuri rw’ibibazo mu muryango wabyaye abana batatu b’impanga ubarizwa mu bakene

Yanditswe na Hakizimana Jean Paul
Kuya 4 Ukuboza 2018 saa 08:32
Yasuwe :
0 0

Ku kazuba k’agasusuruko tariki 16 Werurwe 2018, wari umunsi w’ibyishimo bivanze no kubunza imitima ku muryango wa Nkuranga Emmanuel na Mukahigiro Joselyne, ubwo bibarukaga abana batatu ku rubyaro rwabo rwa kabiri.

Uyu muryango utuye mu Mudugudu wa Kabeza, Akagari ka Kabura, Umurenge wa Kabarondo ho mu Karere ka Kayonza, ubarizwa mu cyiciro cya kabiri cy’Ubudehe, ari nacyo cyateye benshi kwishima ko uyu muryango wungutse abana bakurikira imfura yawo y’imyaka itandatu ariko bakibaza uko bazabaho.

Umunyamakuru wa IGIHE yasuye uyu muryango uvuga ko gahunda ya Girinka, VUP n’izindi zigenerwa abatishoboye zitigeze zibageraho, ukaba utunzwe no kugirirwa impuhwe n’abaturanyi ndetse no guhingira amafaranga nabyo biboneka rimwe na rimwe.

Nkuranga avuga ko babyaye abana batatu b’impanga bibagwiririye ku buryo kubona ibyo babagaburira, kubambika no kubonsa byabagoye cyane bakitabaza ubuyobozi ariko ntibahite bahabwa ubufasha.

Ati “Nyuma yuko tubyaye abana batatu twitabaje inzego z’ubuyobozi tubabwira ko abana batatu tubyaye bizatugora kubatunga kuko nta sambu dufite duhingamo ndetse n’amafaranga ninjiza iyo nahingiye abandi atavamo ibibatunga ntibatwumva, twitabaza n’abaturanyi baratuvuganira ariko biranga biba iby’ubusa.”

Akomeza avuga ko iyo yabonye aho ahingira amafaranga 700, ari yo avamo buri kimwe nkenerwa mu rugo. Iyo uyu muryango uwubwiye ibyo kurya kabiri ku munsi baratangara kuko imyaka ishize barya rimwe ari myinshi.

Mukahigiro avuga ko yatunguwe no kubyara abana batatu. Imyenda abambika n’iyo na we yambara byose abihabwa n’abaturanyi n’abagiraneza kuko atakibasha no kujya gushaka amafaranga kubera urubyaro.

Abana batangiye kugwingira

Ku mezi atandatu gusa, abana ba Mukahigiro na Nkuranga, batangiye kugaragaraho ibimenyetso byo kugwingira. Ubwo babajyanaga kwa muganga kubapimisha basanze bose bari mu mutuku, ari bwo batangiye guhabwa ubufasha bw’amata.

Ati “Amata natangiye kuyafata ubwo nabajyanaga kwa muganga bagasanga babiri bari mu mutuku undi ari mu muhondo, nibwo batangiye kumpa amata mpa abana ariko mbere nta kintu bari baramfashije.”

Babujijwe kugeza ikibazo cyabo kuri Minisitiri

Mukahigiro avuga ko ikibazo cyabo bakigejeje k’Umunyamabanga Nshingwabikorwa w’Umurenge wa Kabarondo, akababwira ko umurenge udatera inkunga bajya kubibwira minisitiri akabasubiza inyuma [Gitifu].

Ati “Minisitiri w’ubuzima yaje nabonye abantu batanga ibibazo byabo ariko gitifu ariwe utanga mikoro, nanjye ndagenda ngiye gutanga icyanjye gitifu anyima mikoro ansubiza inyuma ngo nzaze ku murenge tubivugane. Kuwa Mbere tujyiyeyo n’umutware wanjye dusanga bari mu nama ntiyabikemura ahubwo anyuka inabi duhita dutaha bidakemutse.”

Umuyobozi w’Akarere ka Kayonza wungirije ushinzwe imibereho myiza y’abaturage Harerimana Jean Damascène, yabwiye IGIHE ko atemeranywa n’ibyo uwo muryango uvuga kuko azi neza ko ufashwa kimwe n’abandi mu kubona amata y’abana ahubwo ko bayagurishaga.

Ati “Twabahaye amata y’abana kuva bakivuka kugera n’ubu, gusa twaje gusuzuma dusanga aho kuyaha abana bayagurisha bikaba ari nabyo byatumaga abana bajya mu mutuku. Nyuma nibwo twafashe ingamba z’uko ayo mata tuzajya tuyaha ababyeyi b’urumuri baba mu mudugudu wabo uwo mubyeyi akajya ajyanayo abana bakayanywerayo ubundi bagataha.”

Icyakora Mukakanura Esperance ukurikirana aba bana nk’umujyanama w’ubuzima avuga ko ibyo kugurisha amata atabizi we icyo azi ari uko bayahawe ubwo abana babasangaga mu mutuku.

Harerimana avuga ko impamvu uyu muryango utagezweho na gahunda ya Girinka na VUP, ari uko utujuje ibisabwa ku buryo babihabwa.

Ati “Urabona uriya muryango ntabwo uragira aho uba ku buryo twamuha inka, naranabimubwiye ambwira ko atashobora kuyitaho kuko umwanya abona awukoresha yita ku muryango we. VUP gahunda iri inaha ni gahunda y’ingoboka kandi tuyiha abantu bakuze barengeje imyaka 65 urumva ko atarayigeza.”

Umuryango wa Mukahigiro w’imyaka 28 na Nkuranga w’imyaka 27 bafitanye abana bane umukuru akaba afite imyaka itandatu naho abandi batatu b’impanga bakaba bagiye kuzuza amezi icumi.

Umuryango wa Nkuranga na Mukahigiro uba mu bukene bukabije
Inzu y'icyumba kimwe bacumbikiwemo n'abaturanyi
Mukakananura Esperance umujyanama w'ubuzima ukurikirana aba bana arasaba ko uyu muryango wabona ubufasha bufatika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza