Kuki gufata Kabuga Félicien na bagenzi be byabaye ingorabahizi?

Yanditswe na Emma-Marie Umurerwa
Kuya 9 Mutarama 2019 saa 02:40
Yasuwe :
0 0

Abagize uruhare muri Jenoside yakorewe Abatutsi mu 1994 barimo Kabuga Félicien, bamaze igihe bahigwa ariko kubafata byarananiranye, hagakekwa ko biterwa n’uko bakoresha ubutunzi bafite mu kwiyoberanya cyangwa ubushake buke bw’ibihugu bihishemo.

Ubwo Urukiko Mpuzamahanga Mpanabyaha rwashyiriweho u Rwanda (TPIR) rwatangiraga mu Ugushyingo 1994, mu bari ku ruhembe rw’umugambi wa Jenoside rwafunzwe mu 2015 rutabonye, barimo batatu nibafatwa bazaburanishwa n’urwego rwarusimbuye: Umunyemari Félicien Kabuga, Major Protais Mpiranya na Augustin Bizimana wari Minisitiri w’Ingabo.

Naho mu bazaburanishwa n’u Rwanda ni Fulgence Kayishema, Charles Sikubwabo, Aloys Ndimbati, Ryandikayo na Phénéas Munyarugarama.

Abo kimwe n’abandi bose imyaka 25 igiye kwihirika batarafatwa kubera kwiyoberanya, mu buryo burimo guhindura amazina, ubwenegihugu, gukingirwa ikibaba n’inzego zinyuranye, kubikwa ko umuntu yapfuye kandi ariho n’ibindi.

Mu kiganiro Sobanukirwa cyanyuze kuri RTV ku wa 6 Mutarama 2018, Umwanditsi akaba n’umushakashatsi kuri Jenoside, Tom Ndahiro, yagaragaje ko inyungu za politike ziri mu bituma abagize uruhare muri jenoside badafatwa.

Muri Nyakanga 1997 muri Kenya hari hihishe benshi bakekwaho uruhare muri Jenoside yakorewe abatutsi, hakozwe umukwabu ukomeye wiswe ‘Operation NAKI’, wafatiwemo barindwi barimo Jean Kambanda wabaye Minisitiri w’Intebe, Pauline Nyiramasuhuko wari minisitiri n’umuhungu we Arsene Shalom Ntahobari, umunyamakuru Hassan Ngeze, Col Gratien Kabiligi, Aloys Ntabakuze na Sylvain Nsabimana wabaye perefe wa Butare.

Ndahiro yakomeje agira ati “Uwo munsi Kabuga yarigitiye he ko aho yari atuye hari hazwi, yahavuye ate? Kuki ‘Operation NAKI’ itageze kuri Kabuga kandi aho yari ari hari hazwi? Kuki itageze kuri Mpiranya? Ibyo biragaruka kuri bwa bushake bwa politiki bwageze aho bugabanuka, politike y’ibihugu izamo.”

Yakomeje agaragaza ko abantu batangije ishyaka CDR ryakongeje amatwara yo gukora Jenoside batarafatwa kandi ngo aho bari harazwi, anagaruka ku rubanza rwa Padiri Munyeshyaka Wenceslas na Bucyibaruta Laurent wabaye Perefe wa Gikongoro, bombi bari mu Bufaransa.

Ati “Ubu nibwo twumva ko Bucyibaruta agiye kuburanishwa ariko Padiri Munyeshyaka ubona ko badafite n’ubushake bwo kumuburanisha. Mu gihe cya jenoside padiri Munyeshyaka ni muri ba bantu bajyaga imbere bambaye imbunda yakira abanyamakuru, araregwa gufata ku ngufu, araregwa ibintu bitandukanye.”

Kimwe cya kabiri cy’abakekwaho uruhare muri jenoside bari muri Afurika

Umuyobozi w’Ishami ry’Ubushinjacyaha rishinzwe gushakisha abakekwaho ibyaha bya Jenoside batorotse ubutabera, Siboyintore Jean Bosco, yavuze ko hamaze gutangwa impapuro 1012 zisaba ibihugu bitandukanye guta muri yombi abakekwaho uruhare muri Jenoside, bacyidegembya.

Umubare munini wabo bari mu bihugu byo muri Afurika, by’umwihariko abagera kuri 600 bihishe muri Repubulika Iharanira Demokarasi ya Congo na Uganda.

Ati “Iyo umuntu yahinduye ubwenegihugu agahindura n’amazina, uwo ushakisha n’uriho agenda aba ari abantu babiri batandukanye. Muri bariya bantu bashakishwa na TPIR hari uwo abo mu muryango we bagiye kuvuga ngo yarapfuye, ariko batanga amakuru avuguruzanya bamwe bavuga ibihugu bibiri ashyinguyemo.”

“Hari n’umuntu umuryango we watanze itangazo kuri radio na Televiziyo Rwanda ko yapfuye mu 2010, ariko twamufashe 2012 agarurwa mu Rwanda araburana. Ntiyazutse, ntiyagize gute, si n’umuzimu we wafashwe.”

Siboyintore yakomeje avuga ko mu 2010 Major Faustin Ntilikina yanditse igitabo kivuga ko Mpiranya yapfuye mu 2006, ariko ngo ayo makuru si ukuri.

Ati “Amakuru twagiye tubona mu 2010-2012 ni uko yakoreshaga pasiporo yo mu bihugu duturanye akaba yaranahinduye amazina. Politike y’inda ku isonga mu bituma abagize uruhare muri jenoside yakorewe Abatutsi bidegembya.”

Umusesenguzi Mugabo John we yagaragaje ko kuba hari abanyapolitiki bahabwa amafaranga n’abihishahisha, bigatuma abagize uruhare muri jenoside badafatwa kuko babakingira ikibaba.

Ati “Hari abanyapolitike bakoreshwa cyangwa se bakoreshejwe n’ibihugu, hari abanyapolitike nanone bakoreshwa n’abakoreshejwe […] Niyo mpamvu abo bose bagihari kandi ibihugu barimo dufitanye n’amasezerano yo guhererekanya abanyabyaha. Politike zaho ni politike zigurwa n’inda kandi abo bantu bafite imari.”

Leta Zunze Ubumwe za Amerika zo zanashyizeho igihembo kigera kuri miliyoni 5 z’amadorari ku muntu uzatanga amakuru, agafasha mu guta muri yombi ba ruharwa mu bagize uruhare muri Jenoside yakorewe Abatutsi.

Kabuga Felicien ashakishwa ku rwego mpuzamahanga ariko kumufata bikomeje kugorana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza