Minisitiri w’Intebe Dr Ngirente yasabye ubwihutirwe bwo kurinda umurage gakondo mu iterambere rya Afurika

Yanditswe na Ishimwe Israel
Kuya 9 Nzeri 2019 saa 01:41
Yasuwe :
0 0

Minisitiri w’Intebe Dr Ngirente Edouard yakomoje ku rugendo rw’u Rwanda rwo kubungabunga urusobe rw’ibinyabuzima, anashimangira ko kwita ku murage gakondo Afurika ifite ari izingiro ry’iterambere ry’abayituye.

Yabitangaje kuri uyu wa 9 Nzeri 2019 atangiza Inama ku Ishoramari rigamije kubungabunga Urusobe rw’Ibinyabuzima (BCC) iteraniye muri Kigali Convention Centre.

Yahurije hamwe abarimo abayobozi mu nzego zitandukanye muri Afurika, abashoramari bakomeye mu bijyanye n’ubukerarugendo, abakora mu byo kwita kuri ba mukerarugendo n’abandi.

BCC igamije kurebera hamwe uko urwego rwo kubungabunga urusobe rw’ibinyabuzima ku mugabane rwazamuka binyuze mu kugaragaza uruhare rw’ubukerarugendo mu kuzamura ubukungu no guhanga imirimo.

Minisitiri w’Intebe, Dr Ngirente, yavuze ko u Rwanda rwashyize imbaraga mu kubungabunga urusobe rw’ibinyabuzima.

Ati “U Rwanda si rushya mu kubungabunga urusobe rw’ibinyabuzima no kurinda umurage karemano. Twazirikanye ihame ry’ubukerarugendo bushingiye ku kubungabunga urusobe rw’ibinyabuzima n’iterambere ry’ubukungu binyuze mu kubirinda.’’

Mu byo u Rwanda rwagezeho mu kubungabunga urusobe rw’ibinyabuzima harimo ko rufite ubutaka bungana na 8.9% bucunzwe neza nka Pariki z’Igihugu.

Ku bufatanye bw’u Rwanda, abaturage n’abafatanyabikorwa mu byo kubungabunga ibinyabuzima umubare w’ingagi zo mu Birunga wariyongereye.

Ibarura riheruka ryerekanye ko ingagi zo mu Birunga ziyongereyeho 23% zigera kuri 604 kuva mu 2010.

Kuva mu myaka isaga ine ishize u Rwanda rwateye intambwe yo kugarura inyamaswa zikomeye muri pariki. Intambwe ya mbere yatewe mu 2015, yari iyo kugarura Intare zirindwi zivanywe muri Afurika y’Epfo nyuma yo kumara imyaka 20 nta ntare n’imwe irurangwamo.

Muri Gicurasi 2017, kandi nibwo Inkura z’Umukara 18 zagejejwe muri Pariki y’Igihugu y’Akagera zivanywe muri Afurika y’Epfo nyuma y’uko zahaherukaga mu myaka 10.

Kuri ubu Pariki y’Igihugu y’Akagera ifite inyamaswa nini eshanu zikunze gukurura ba mukerarugendo ari zo; Intare, Inzovu, Ingwe, Inkura n’imbogo.

Minisitiri w’Intebe Dr Ngirente Edouard yavuze ko u Rwanda rwashoboye kubungabunga urusobe rw'ibinyabuzima kuko Abanyarwanda bafite inyungu bakura mu musaruro ubivamo

Minisitiri w’Intebe Dr Ngirente yakomeje avuga ko mu kurinda urusobe rw’ibinyabuzima u Rwanda rwanitaye cyane ku guha abenegihugu inyungu iva mu bukerarugendo nta we uhejwe.

Ati “Izi gahunda zagiriye umumaro u Rwanda n’Abanyarwanda mu myaka 15 ishize kuko abasura pariki z’igihugu biyongereyeho 600% kuva mu 2003 ndetse na Guverinoma ibona inyongera ya 250% avuye ku yo binjije.’’

Muri iyi gahunda, abaturiye pariki basangizwa inyungu iva mu bukerarugendo aho kuva mu 2005 bahabwaga 5%, agera ku 10% mu 2017.

Mu mwaka wa 2018/2019, imishinga 37 yatewe inkunga ya miliyoni $1.7, inyongera ya 51% ugereranyije n’umwaka wabanje.

Mu myaka 15 Guverinoma yashoye miliyoni $5.8 mu mishinga 647 igamije guhindura ubuzima bw’abaturiye Pariki z’Igihugu zirimo iy’Ibirunga, Akagera na Nyungwe.

Minisitiri Dr Ngirente yavuze kubaka uburyo butuma abasura biyumva nk’abari mu rugo no kuzamura imibereho y’Abanyarwanda bikwiye kubakirwaho no mu gihe kizaza.

Yakomeje asaba umwihariko mu kubungabunga ibinyabuzima mu iterambere rirambye.

Ati “Ndasaba ko hari icyakorwa mu kurinda no kugenzura umutungo karemano muri Afurika ariko tukanawukoresha bikwiye mu kuzamura ubukungu bufitiye inyungu abaturage ba Afurika.’’

Abayobozi bitabiriye iyi nama bagaraje ko hakenewe ingamba zihuriweho mu kugabanya ibidukikije byangirika.

Hailemariam Desalegn wabaye Minisitiri w’Intebe wa Ethiopia yagaragaje ko mu gihe ibinyabuzima bitabungabunzwe neza abantu ni bo babihomberamo.

Yagize ati “Tugomba kwereka Isi ko niba hari ibyo twakora, ibihugu byateye imbere byakora ibiruseho. Mu myaka ya nyuma ku buyobozi nagerageje kwita ku bukerarugendo ariko ibyo ntibihagije mu gihe abaturage atari abagenerwa bikorwa b’imena. Guverinoma yonyine ntiyabigeraho, hakenewe n’imbaraga z’urubyiruko mu kubyaza umusaruro amahirwe ahari.’’

Luke Bailes washinze akaba anayobora Singita Kwitonda Lodge yatangaje ko iki gikorwa kizahindura imyumvire ku bijyanye no kurengera urusobe rw’ibinyabuzima.

Yagize ati "Ni inama nziza kuko ivuga ku buryo gakondo abantu babona ibijyanye no kurengera urusobe rw’ibinyabuzima. Iganirirwamo ibitekerezo bishya aho abafite uburambe bacira inzira abakiri bato.’’

Yashimye ko ihuriramo abantu benshi buri mwaka bitewe nuko u Rwanda rumaze kuba igihugu cyiza mu by’ubushabitsi.

Ati "Isi yabonye iterambere ry’u Rwanda ku buryo hari abantu benshi barwinjiramo. Niyo mpamvu dukeneye gukora akazi kenshi ku isoko kiyongera ku kakozwe n’igihugu. Twabonye intangiriro nziza. Turi hoteli iri hafi y’Ibirunga, ahasurwa na ba mukerarugendo benshi. Twahawe ubusabe bwinshi bw’abatugana kandi baracyaza.’’

Singita Kwitonda Lodge and Kataza House ni inyubako yo ku rwego rwo hejuru yakira ba mukerarugendo, iri mu Karere ka Musanze, munsi y’Ibirunga. Yubatswe ahantu hahoze igishanga cyari urwuri, ariko ubu hashibutse umushinga ukomeye w’ubukerarugendo ugizwe n’inzu umunani zubatswe mu buryo zirengera ibidukikije.

Inama y’iminsi ibiri ya BCC yabaga ku nshuro ya kabiri yari ifite insanganyamatsiko ivuga ku “Gushora imari mu bidukikije, guhera ku busa ugana kuri byinshi.’’

Yateguwe ku bufatanye bw’Ikigo cy’Igihugu cy’Iterambere (RDB) na Kaminuza ya African Leadership University (ALU) ibinyujije mu Ishuri ryayo ryita ku Kubungabunga urusobe rw’ibinyabuzima.

Inama yateguwe nka kimwe mu bikorwa byakurikiye umuhango wo Kwita Izina abana 25 b’ingagi wabereye mu Karere ka Musanze ku wa 6 Nzeri 2019.

Minisitiri w’Intebe Dr Ngirente Edouard na Hailemariam Desalegn Boshe wabaye Minisitiri w’Intebe wa Ethiopia ubwo bageraga ahabereye inama. Bari baherekejwe n'Umuyobozi w’Ikirenga wa Kaminuza ya ALU, Fred Swaniker na Minisitiri w'Ibidukikije, Dr Vincent Biruta
Hailemariam Desalegn wabaye Minisitiri w’Intebe wa Ethiopia ari mu nshuti z'u Rwanda z'akadasohoka
Umunya-Ghana Fred Swaniker ari mu bashoramari bakomeye ku Mugabane wa Afurika
Minisitiri muri Primature ushinzwe Imirimo y’Inama y’Abaminisitiri, Kayisire Marie Solange (iburyo) aganira na Minisitiri w’Ubuhinzi n‘Ubworozi, Dr MUKESHIMANA Gérardine
Minisitiri w’Urubyiruko, Mbabazi Rosemary aganira n'umwe mu bitabiriye iyi nama
Umuyobozi mukuru w'Ikigo cy'Igihugu gishinzwe Iterambere (RDB), Clare Akamanzi, ari mu bitabiriye iyi nama
Minisitiri muri Primature ushinzwe Imirimo y’Inama y’Abaminisitiri, Kayisire Marie Solange
Minisitiri w’Urubyiruko, Mbabazi Rosemary, ari mu bayobozi muri Guverinoma y'u Rwanda bitabiriye iyi nama
Iyi nama yitabiriwe n'abantu batandukanye bafite inararibonye mu bijyanye no kubungabunga urusobe rw'ibinyabuzima
Uhereye ibumoso ni Umunya-Ghana Fred Swaniker washinze Kaminuza ya ALU ikorera mu Rwanda kuva mu 2017. Yayoboye ikiganiro ku kubungabunga urusobe rw'ibinyabuzima cyarimo Hailemariam Desalegn wabaye Minisitiri w’Intebe wa Ethiopia; Minisitiri w'Ibidukikije, Dr Vincent Biruta; Umunya- Guinea Bissau Paul Gomes washinze Constelor Investment Holdings n’Umunya-Kenya, Helen Wanjiru Gichohi, uyobora Umuryango wita ku rusobe rw'ibinyabuzima muri Afurika (African Wildlife Foundation)
Minisitiri w’Ibidukikije, Dr Biruta yavuze ko ibihugu bya Afurika bikwiye kwita ku kubungabunga urusobe rw’ibinyabuzima kuko urwego rw’ubukerarugendo ruhishemo ubukungu bwinshi
Iyi nama yabaye ku nshuro ya kabiri yateguwe ku bufatanye bwa Kaminuza ya ALU n'Ikigo cy'Igihugu cy'Iterambere (RDB)
Iyi nama yabereye muri Kigali Convention Centre
Abayobozi bakuru bitabiriye iyi nama bafashe ifoto y'urwibutso

Amafoto: Mugwiza Olivier na Niyontegereje Noah


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza