“Ndi Umunyarwanda” mu byo PSD izibandaho nibona intebe mu Nteko

Yanditswe na Akayezu Jean de Dieu
Kuya 19 Kanama 2018 saa 08:59
Yasuwe :
0 0

Abakandida b’abadepite bahagarariye Ishyaka Riharanira Demokarasi n’Imibereho myiza y’Abaturage, PSD, bijeje abaturage ko nibabagirira icyizere nk’ababahagararira mu Nteko, bazaharanira ko gahunda ya “Ndi Umunyarwanda” ikomeza gushyigikirwa.

Babigarutseho ku munsi wa Gatandatu wo kwamamaza abakandida b’abadepite ba PSD, ku wa 18 Kanama 2018, mu Murenge wa Rugerero, mu Karere ka Rubavu mu Ntara y’Uburengerazuba.

Abari ku rutonde rw’abakandida ba PSD, bijeje abaturage kuzabatumikira mu gihe bazabagirira icyizere.

Nyirahirwa Veneranda wari Umudepite mu Nteko Ishinga Amategeko icyuye igihe akaba ari na Visi Perezida wa Kabiri wa PSD, yavuze ko mu bihe by’abacengezi bari barabujije abaturage amahoro, nta cyizere cy’ubuzima Abanya-Rubavu bafite.

Yagize ati “Abari aha kuva mu 1997 kugeza mu 2000, muzi uko byari bimeze. Abacengezi bari barabujije abantu amahwemo, ibyo byose rero byaterwaga ni uko hari Abanyarwanda batiyumvagamo ubunyarwanda bakiyumvamo amoko.”

“Uyu munsi PSD irashaka ko gahunda ya Ndi Umunyarwanda ishyirwamo ingufu kugira ngo dutunge dutunganiwe tutazongera kurara twiruka tutabona uko turya ibyo twejeje.”

Hindura Jean Pierre uri ku rutonde rw’abakandida ba PSD yavuze ko bazaharanira ko iyi manda ya 2018/23, izarangira imanza z’imitungo zijyanye na Gacaca zarabaye amateka.

Ati “Kuko Jenoside yakorewe Abatutsi ari ikintu gikomeye, ni ikintu kibabaje cyane ni yo mpamvu tugomba gushyiramo imbaraga kugira ngo kive mu nzira.”

Hindura yavuze ko mu Karere ka Rubavu hari ikibazo cy’umutekano muke ukunze kurangwa hafi y’umupaka w’u Rwanda na Repubulika Iharanira Demokarasi ya Congo.

Yavuze ko PSD izaharanira ko buri muturage yumva ko umutekano ari inshingano ze.

Ati “Tugomba gushyiramo ingufu mu kubungabunga umutekano, murabizi Abanya-Rubavu hakurya aha duturiye umupaka, tudafite umutekano nta na kimwe twageraho ibintu byose byahinduka umuyonga. Tuzaharanira ko kwicungira umutekano buri Munyarwanda abigira ikintu cy’ubuzima bwe bw’ibanze.”

Bizimana Déogratias yabwiye abaturage bo mu Ntara y’Uburengerazuba by’umwihariko aba Rubavu ko baje kubasaba amajwi kandi nibayabaha bazaharanira imibereho myiza hajyaho gahunda y’uko buri muturage ubona umusaruro uciriritse abona itungo rigufi.

Ati “Turashaka ko abaturage bafite umusaruro muke tuzakora ubuvugizi bahabwe amatungo magufi kugira ngo abazamure. Ni muri urwo rwego twifuza ko buri Munyarwanda yakirigita ifaranga tugahera ku kumuha itungo rigufi kugira ngo umusaruro wiyongere.”

Umuyobozi wa PSD, Dr Vincent Biruta, yagarutse ku kibazo cy’umutekano ko nibaramuka babonye intebe mu Nteko bazaharanira ko abaturage bafata iya mbere mu kumenya ko ari inshingano zabo.

Usibye kugenzura ibikorwa bya guverinoma no gutora amategeko, PSD ifite ibitekerezo bishya bikubiye mu ngingo 41 zigamije gukomeza gufasha Abanyarwanda kugera ku iterambere rirambye.

Izo ngingo irashaka kuzijyana mu Nteko Ishinga Amategeko mu gihe yaba ibonyemo imyanya. Ifite abakandida 65 bayihagarariye muri aya matora.

Abakandida ba PSD baba bitabiriye ibikorwa byo kwiyamamaza
Bacinye akadiho m ndirimbo z'ishyaka ryabo
Bamwe mu bayobozi bakuru b'Ishyaka Riharanira Demokarasi n'Imibereho myiza y'abaturage bari bitabiriye iki gikorwa cyo kwiyamamaza
Hindura Jean Pierre ayobora PSD mu Ntara y'Uburengerazuba akaba n'umwe mu bakandida bayihagarariye
Veneranda Nyirahirwa wari umudepite mu Nteko Ishinga Amategeko icyuye igihe akaba ari na visi Perezida wa Kabiri wa PSD ageza ijambo ku bari bitabiriye ibi bikorwa byo kwiyamamaza
Umunyamabanga Mukuru wa PSD, Dr Ngabitsinze Jean Chrysostome
Urutonde rw'abakandida ba PSD mu matora y'abadepite y'uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza