00:00:00 IGIHE NETWORK KN KINYARWANDA EN ENGLISH FR FRANCAIS

Nyamagabe: Intabaza ku mugore wabyaye impanga eshatu ‘ukubitwa bunyamaswa’ n’umugabo

Yanditswe na Prudence Kwizera
Kuya 23 Ugushyingo 2022 saa 10:39
Yasuwe :

Umugore witwa Dusabimana Jeanette mu Murenge wa Kitabi mu Karere ka Nyamagabe avuga ko amaze kurambirwa inkoni akubitwa n’umugabo we kuko amaze kumumugaza, akaba atabaza inzego z’ubuyobozi azisaba kwinjira mu kibazo cye zikagishakira igisubizo kirambye.

Uwo mugore w’imyaka 34 y’amavuko asanzwe abana n’umugabo we mu Mudugudu wa Uwimisigati mu Kagari ka Uwingugu mu Murenge wa Kitabi, bakaba bamaze kubyara abana bane barimo batatu bavutse ari impanga.
Yabwiye IGIHE ko afite ikibazo gikomeye cy’umugabo we umukubita akamuhoza no ku nkenke.

Yavuze ko nyuma yo gushakana n’umugabo we mu buryo bwemewe n’amategeko mu 2014, yatangiye kujya amufuhira cyane yabona avuganye n’undi muntu w’igitsinagabo akamukubita amushinja gushaka kumuca inyuma.

Ati “N’iyo ari umuvandimwe we tuvuganye ndataha akampondagura ngo mvuye kumuca inyuma.”

Uyu mugore uvugana agahinda yagera aho agafatwa n’ikiniga akarira, yavuze ko yagerageje kwihangana no guhishira umugabo we ariko aho bigeza amaze kurambirwa kuko asigaye amukubita bunyamaswa.

Yavuze ko ubwa mbere babyaranye umwana w’imfura mu 2015 nyuma y’imyaka itandatu abyara abana batatu b’impanga.

Igihe yari atwite izo mpanga ngo yamuhozaga ku nkeke amubwira ko ‘nasanga abo bana badasa na we azabashyira umwamuteye inda’.

Ati “Uko kumpoza ku nkeke no kunkubita ntwite byatumaga inda ingwa nabi ikenda kuvamo. Gusa nakomeje guceceka nanga ko twishyira hanze, nkasenga Imana nyisaba ko yamuhindura.”

Uyu mugore usanzwe usangera mu Itorero rya ADEPR yavuze ko umugabo we adasiba kumukubita dore ko yerekana n’inkovu ku kirenge aho ngo yigeze kumutera umusumari.

Avuga ko asigaye amukubitisha ikibatira cy’umupanga amubirwa ko azamwica.

Ati “Arankubita nkamera nk’igiti nkanga kumurwanya kuko mba mfite ubwoba ko yahita antema akanyica.”

Yavuze ko umugabo we yamukubise mu nda amaze igihe gito abyaye bimugiraho ingaruka zo guhora ava amaraso mu myanya myibarukiro ku buryo yagiye no kwa muganga byanga gukira.

Abana babo barwaye imirire mibi

Dusabimana yavuze ko uko guhozwa ku nkeke n’umugabo no kumukubita bituma badashyira hamwe ngo bakorere urugo rwabo ku buryo byagize ingaruka ku bana babo barwara indwara zikomoka ku mirire mibi.

Ati “Abana baguye mu mirire mibi bakigira amezi atandatu mbajyana ku kigo nderabuzima babaha amata barakira ariko mfite impungenge ko bazasubiramo kuko ntabwo papa wabo amfasha kubitaho.”

Uyu mubyeyi yavuze ko kuri ubu bari mu bukene bukabije ku buryo atabasha kubonera abana ibyo kurya n’ibyo kunywa ndetse n’imyambaro.

Avuga ko n’imyenda yambaye yayihawe n’abagiraneza babonye iyo asanganywe yarashaje.

Asaba inzego kumutabara

Dusabimana yavuze ko ikibazo kiri mu rugo rwabo yakigejeje ku buyobozi bw’Akagari ka Uwingugu ntibwagira icyo bugikoraho, ajya ku Murenge wa Kitabi naho ntibamuha igisubizo kirambye.

Ati “Ku murenge umuyobozi yarambwiye ngo nzigire iwacu umugabo mureke atazanyica.”

Yagerageje kujya ku Karere ka Nyamagabe kugira ngo ageze ikibazo cye ku Muyobozi w’Akarere ariko ahageze ntiyabasha kumubona.

Asaba ko inzego z’ubuyobozi zakwita ku kibazo cye nubwo yasubira iwabo akagenda mu buryo buzwi kandi n’abana babo bakagenerwa uko bazitabwaho.

Umugabo we ntahakana cyangwa ngo yemere ibyo ashinjwa byo kumuhohotera no kumuhoza ku nkeke ndetse no kwanga kumufasha kwita ku bana babyaranye.

Avugana n’umunyamakuru wa IGIHE yavuze ko ntacyo yabivugaho.

Ati “Ntacyo nabivugaho; nk’uko yagushatse akakugezaho ikibazo cye nanjye nzagushaka nkubwire ibyanjye. Ubushobozi bwo kukugeraho ndabufite.”

Umuyobozi w’Akarere ka Nyamagabe Wungirije Ushinzwe Iterambere ry’Imibereho Myiza y’Abaturage, Uwamariya Agnes, yabwiye IGIHE ko ikibazo cy’uwo mugore atari akizi ariko agiye kucyitaho.

Ati “Reka ngikurikirane mu maguru mashya nibwo nakimenya.”

Dusabimana Jeanette avuga ko ubuyobozi bwigeze kumwemerera kuzamuha inka muri gahunda ya Girinka ikamirwa abana be ariko kugeza ubu atarayihabwa.

Gusa hari impungenge z’uko iyo nka izitabwaho mu rugo ruhoramo indura n’amakimbirane.

Uwo mugore ushinja umugabo we kumukubita bunyamaswa ni uwo mu Murenge wa KItabi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .