Nyamasheke: Bamporiki yasabye intore kwirinda gufatwa n’umwuka w’ibigwari

Yanditswe na Sitio Ndoli
Kuya 13 Mutarama 2018 saa 01:28
Yasuwe :
1 0

Perezida wa Komisiyo y’Itorero ry’Igihugu, Bamporiki Edouard, yasabye intore z’inkomezabigwi zo mu Karere ka Nyamasheke kwirinda ubugwari ahubwo bagaharanira kwigira ku byiza intwari ziba zarakoze.

Ibi yabigarutseho kuri uyu wa Gatanu tariki ya 12 Mutarama 2018, ubwo yasozaga Itorero Inkomezabigwi mu cyiciro cya gatandatu ku banyeshuri barangije amashuri yisumbuye, ryabereye ku ishuri rya Gafunzo riherereye mu Murenge wa Shangi mu Karere Nyamasheke.

Imbere y’abakobwa n’abahungu 507 baturutse mu Mirenge ya Bushenge, Shangi na Nyabitekeri, Edouard Bamporiki, yavuze ko agasozi kaba gatuyeho intwari n’ibigwari bityo asaba uru rubyiruko rwari rumaze icyumweru rutozwa indangaciro n’umuco Nyarwanda kwirinda umwuka w’ibigwari.

Ati “Buriya rero ngo agasozi katuweho intwari n’ibigwari biba biri hafi aho ngaho kugira ngo bice intege iyo ntwari cyangwa ngo biyigore. Ni ahacu ho guhitamo. Intwari iyo itabarutse isiga ibirindiro, isiga ibimenyetso by’uko yabaye intwari aho ngaho, ariko n’umwuka w’ibigwari nabyo iyo bipfuye uguma kuzerera aho ngaho. Ni ukwirinda ko mwafatwa n’umwuka w’ibigwari mugakomeza mubaririza amateka y’intwari n’umwuka w’intwari akaba ari wo ubaranga amanywa n’ijoro.”

Yakomeje agira ati “Uzarwana urugamba rwa kure akarutsinda rero ahera ku rwa hafi, ntabwo wananirwa urugamba rwo ku mudugudu ngo uzashobora urugamba rwo ku rwego rw’igihugu, waba ubeshye. Turebe ibibazo biri iwacu mu mudugudu tubikemure birangire nta wundi tubirindiriza. Nitwe duhari.”

Zimwe mu ntore zivuga ko umuco w’ubugwari ari ukumva amagambo mabi yatuma badateza imbere igihugu ariko bakurikije ibyo bakuye mu itorero bavuze ko bagiye kurwanya uyu mwuka bakora ibikorwa biteza imbere abaturage mu midugudu batuyemo.

Ngirincuti Felix ati “Icyo nakuye muri iri torero ni ibintu byinshi gusa naje mfite ubwoba ariko nahakuye inyungu nyinshi zizamfasha guteza imbere abaturage. Icyo niyemeje ni uko tuzakomeza [igihugu] kucyubaka dufasha abaturage kurwanya umwanda, twubaka uturima tw’igikoni ndetse turwanya ibiyobyabwenge mu rubyiruko.”

Mukandayambaje Christine na we uri mu Itorero Inkomezabigwi yagize ati “Kwirinda umwuka w’ubugwari njye numva yatubwiraga kutumva amagambo asenya igihugu cyacu ahubwo tukacyubaka twihangira imirimo kandi dushyira hamwe, dukangurira bagenzi bacu kwikuramo uburara.”

Ni ku ncuro ya gatandatu itorero ry’abarangije umwaka w’amashuri yisumbuye ribaye rikurikirwa n’ibikorwa by’urugerero aho intore zifasha abaturage mu midugudu, ibikorwa by’isuku, kubakira abatishoboye n’ibindi.

Perezida w'Itorero ry'Igihugu, Bamporiki Edouard n'Umuyobozi w'Akarere ka Nyamasheke, Kamali Aimé, bakirwa n'intore
Bamporiki yasabye intore kwirinda ubugwari
Intore ziyemeje gushyira mu bikorwa ibyo zatojwe
Inkomezabigwi 507 zatorejwe ku ishuri ryisumbuye rya Gafunzo
Habayeho n'umwanya wo gusabana zicinya akadiho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza