Perezida Kagame yasabye urubyiruko kutareberera inshuti zarwo zijandika mu biyobyabwenge

Yanditswe na Ferdinand Maniraguha, Ishimwe Israel
Kuya 19 Kanama 2018 saa 07:11
Yasuwe :
0 0

Perezida Kagame yabwiye urubyiruko ko rudakwiye kureberera inshuti n’abavandimwe bishora mu biyobyabwenge kuko byica ahazaza habo ah’imiryango n’igihugu cyabibarutse.

Yabitangaje kuri iki Cyumweru, tariki ya 19 Kanama 2018, mu kiganiro yagiranye n’urubyiruko rusaga 2500 rurimo abanyamwuga mu ikoranabuhanga, politiki, imyidagaduro, abikorera, rwateraniye mu Intare Conference Arena i Rusororo.

Perezida Kagame yagaragarije urubyiruko ko rwitezweho byinshi ndetse rugomba kwitoza inshingano zarwo nk’abayobozi b’ahazaza.

Yagize ati “Igihugu ni umuryango wanyu. Iyo mutameze neza, ntikimera neza, iyo igihugu kitameze neza, namwe ntimumera neza.”

Urubyiruko rugize 70 % by’abatuye u Rwanda, ni yo mpamvu ruhabwa umwihariko mu iterambere ry’igihugu.

Perezida Kagame yavuze ko urubyiruko rukwiye gutekereza ku buzima bwarwo kuko aricyo igihugu kibifuriza.

Yagize ati ‘‘Ese ubwanyu mutekereza ku buzima bwanyu? Ngomba kwiyitaho kuko ntabikoze, ishoramari ndi gukora n’ibyo umuryango wanjye untakazaho bizapfa ubusa. Niba mutabyikorera, bizagorana ko hari undi waguha ubuzima bwiza. Ntibishoboka, bitangirana na we ubwawe.’’

Yavuze ko afite amakuru ko urubyiruko rutita ku buzima bwarwo kandi rwijandika mu biyobyabwenge.

Yagize ati ‘‘Ibyo mbona bigaragaza ko urubyiruko rwacu rutita ku buzima bwarwo. Kuki ku Isi washaka kuyoba ubwenge? Kuki washaka kugira ubwenge buyobye? Ibyo bisigaye biri ahantu hose.”

“Niba nibeshye ayo yaba ari amakuru meza ariko nshobora kuba ntibeshye kuko hari ukuri kwabyo. Ntacyo byafasha kuba urubyiruko rwakwishora mu biyobyabwenge, nta na kimwe. Ni ukwiyangiza gusa.’’

Perezida Kagame yasabye buri wese kugira inshingano kudakoresha ibiyobyabwenge.

Yagize ati “Kuki watuza mu gihe inshuti, abavandimwe, abo witaho bishoye mu biyobyabwenge? Kuki utahaguruka ngo ubabuze. Ntabwo ari uko ari bibi gusa, ahubwo birica, bitwicira imiryango n’igihugu. Imiryango yanyu irabakeneye, igihugu cyanyu kirabakeneye.”

Yakomeje avuga ko kurwanya ibiyobyabwenge bidakwiye kuba akazi ka Polisi y’Igihugu gusa.

Ati “Rimwe na rimwe mbwira abapolisi bafata abasinzi, ariko bihoraho. Mbabwira ko bigomba gutangirira ku muntu ku giti cye. Polisi iza nyuma iyo ibintu byananiranye kandi biri kugira ingaruka ku bantu benshi. Ntimugomba gutegereza ko Polisi ihora yiruka inyuma y’abacuruza ibiyobyabwenge. Ni inshingano zanyu.”

Perezida Kagame yasabwe ko abashaka kureka ibiyobyabwenge bahabwa ubuvuzi hifashishijwe mituweli avuga ko “Icya mbere ni ukwirinda ariko uburyo bwose bwafasha harebwa uko bukoreshwa ngo ikibazo gikemuke.”

Umunyarwanda waturutse muri Uganda, Gihana Mike, yavuze kubera amayeri aba mu gucuruza ibiyobyabwenge, kubirwanya kwa mbere gukwiye guhera mu rubyiruko rubinywa.

Ati “Nitwe tugomba kubyivanamo kuko byose bituruka mu mutwe […] Icyakorwa ni ukujya muri rwa rubyiruko bakabibangisha kuko iyo bigeze ko rwego rwo kuvugwaho n’Umukuru w’Igihgu biba bigeze kure.”

Emera Shimo Mari Pascal yaje kuganira na Perezida aturutse mu karere ka Rubavu. Aka karere ni kamwe mu tunyuzwamo cyane ibiyobyabwenge kubera ko kegereye umupaka.

Shimo yagiriye inama bagenzi be cyane cyane abakobwa, ko uretse guta ubwenge hari n’abahatakariza inzozi zabo.

Ati “Hari bamwe mu bakobwa babitwariramo inda bityo icyizere cy’ejo kigahagarara, bwa busore bwabo bagakwiye kuba bakoresha bubaka igihugu bakaba bagiye kurera, bikabaviramo kwiheba.”

“Hari abandi bakora urugomo hakaba havamo urupfu, igihugu kigahomba amaboko. Tubirwanye, bagenzi bacu ntibakajye kwica abana bacu turebera ngo ni ukugira ngo bakire.”

Ibiyobyabwenge bitera indwara zirimo iz’umwijima, umutima, ubwonko, ubuhumekero, kanseri n’izindi.

Ubushakashatsi bwa Minisiteri y’Ubuzima bwerekanye ko urubyiruko ruri hagati yimyaka 14 na 35 rwakoresheje ibiyobyabwenge. Muri bo 7.46 % babaswe n’inzoga, 4.8% baganzwa n’itabi.

Mu 2017, Ikigo Ngororamuco cya Huye cyakiriye abagera kuri 209 bafite ibibazo bituruka ku ikoreshwa ry’ibiyobyabwenge naho mu bitaro by’uturere hakirwa abagera kuri 448.

Polisi y’u Rwanda yatangaje ko mu 2017 yakiriye ibirego 3941 by’abakoresha n’abacuruza ibiyobyabwenge, bingana na 18% y’ibyaha byakozwe muri uwo mwaka.

Hashize iminsi inzego zitandukanye zarahagurukiye ikibazo cy’ibiyobyabwenge, aho mu bice bitandukanye by’igihugu habaye ibiganiro bikangurira urubyiruko kureka burundu.

Perezida Kagame ubwo yari akurikiye umuvugo watangwaga n'urubyiruko rwari ruteraniye i Rusororo
Urubyiruko rugera ku 2500 ni rwo rwahuye na Perezida Kagame
Urubyiruko rwagaragarije Umukuru w'Igihugu impano rufite binyuze mu mivugo
Perezida Kagame asuhuza urubyiruko rwari ruteraniye mu Intare Conference Arena i Rusororo
Perezida Kagame yabwiye urubyiruko ko rudakwiye kureberera inshuti n’abavandimwe bishora mu biyobyabwenge
Perezida Kagame yagaragarije urubyiruko ko rwitezweho byinshi ndetse rugomba kwitoza inshingano zarwo nk’abayobozi b’ahazaza
Perezida Kagame yavuze ko urubyiruko rukwiye gutekereza ku buzima bwarwo kuko aricyo igihugu kibifuriza
Perezida Kagame yasabye buri wese kugira inshingano kudakoresha ibiyobyabwenge

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza