Perezida Kagame yatumye abayobozi bamanuka bajya kumva ibibazo by’abaturage (Amafoto)

Yanditswe na Rabbi Malo Umucunguzi
Kuya 11 Gicurasi 2019 saa 06:27
Yasuwe :
0 0

Uruzinduko Perezida Kagame yagiriye mu turere twa Burera, Musanze na Rubavu, rusize ahase ibibazo abayobozi ku kutuzuza inshingano neza, aho yashimangiye ko umuyobozi utuzuza inshingano ze atazamwihanganira.

Mu bibazo byagaragaye ahanini ni uko hari abayobozi badafatanya mu gukurikira ikibazo runaka ngo kive mu nzira, kuba ibibazo bidakemurwa ugasanga bihora bigaruka cyangwa abaturage bageza ikibazo ku muyobozi wo hasi, atagikemura aho kwitabaza urwego rwisumbuyeho bagategereza perezida kandi abandi bayobozi bahari.

Ubwo yari mu Karere ka Rubavu kuri uyu wa Gatanu, nk’uko byagenze mu Karere ka Burera na Musanze, ntibyabaye ngombwa ko Perezida Kagame ari we usubiza ibibazo byose by’abaturage, ahubwo umuyobozi ikibazo kiri mu nshingano ze yahitaga ajya kureba umuturage.

Byageze ku rwego umuyobozi abikora abyibwirije cyangwa Perezida Kagame akamubwira kwegera umuturage, bakihengeka ku ruhande ikibazo kigahabwa umurongo.

Nteziryayo Jean de Dieu yazamuye ikibazo cy’uko abaturage babujijwe kujyana amata muri Congo kandi uruganda rwa Mukamira rutayakira yose, ariko Minisitiri w’Ubuhinzi n’Ubworozi, Dr Mukeshimana Gérardine avuga ko ari uko badafite ibyangombwa by’ubuziranenge ndetse ko usanga aborozi bagorana ngo bakurikize amabwiriza y’ubuziranenge.

Perezida Kagame yabasabye kuzuza ubuziranenge, ati “hanyuma ibisigaye nihagira ukubuza gucuruza amata yawe kandi wakurikije ubuziranenge, icyo gihe tuzabigufashamo rwose.”

Icyo gihe Minisitiri Mukeshimana, yahise yegera Nteziryayo ngo yumve ikibazo uko giteye neza amufashe kugisubiza.

Tuyambaze Philbert wo mu Murenge wa Muhoza mu Karere ka Musanze yavuze ko ubwo Ikigo cy’Igihugu gishinzwe Ubuhinzi n’Ubworozi (RAB) cyubakaga Green Houses, bambuwe n’ikigo cyahawe isoko ryo kubaka, ngo hari abarenganuwe hakaba n’abatararenganuwe.

Perezida Kagame yahise amusaba kwegera Minisitiri Mukeshimana ngo bombi abafashe.

Undi yatanze ubuhamya bw’uburyo yamaze igihe ari umushomeri akigira inama yo kujya mu bukorikori, atangira adoda inkweto. Gusa ngo ahura n’ikibazo cy’impu ziva mu Rwanda zigatunganyirizwa mu mahanga kuko nta ruganda rubikorera mu gihugu, ugasanga zigarutse zihenze.

Perezida Kagame ati “Tumaze igihe tubivuga, iby’inganda, hari n’ibyo twagerageje, hari abantu babigiyemo babigeza hagati babirekera aho ku mpamvu zibaturutseho zindi, turaza kugikemura icyo kibazo.”

Na mbere y’uko asoza, Umuyobozi Mukuru Wungirije wa RDB, Emmanuel Hategeka, yahise ajya kwegera uyu muturage ngo amumenyeshe ikigomba gukurikira.

Nshizirungu Aimable we yavuze uko mu 2015, yasabye Perezida ubufasha bwo kwiga masters ariko amusaba kubanza kurangiza icyiciro cya kabiri cya kaminuza, none ngo amaze imyaka itatu arangije, yifuza ko noneho yamufasha.

Perezida Kagame yamubajije impamvu atagannye Minisiteri ibishinzwe, amusaba kunyura muri iyo nzira. Minisitiri w’Uburezi, Dr Mutimura Eugène yahise ahaguruka ajya kumva ikibazo cye.

Hari n’umugore ukomoka muri RDC ariko washakanye n’umugabo w’Umunyarwanda, bakabyarana abana batatu ariko akaza kumuta, none abana bimwe ubwenegihugu bw’u Rwanda kandi ikibazo cyaragejejwe mu buyobozi.

Umuyobozi w’Akarere ka Rubavu, Habyarimana Gilbert, yavuze ko iki kibazo atakizi, Perezida Kagame ati “Mugikemure vuba, abo bana niba ari Abanyarwanda murabima ubwenegihugu gute se? Ndetse na nyina wabo niba ashaka ubwenegihugu na we mubumuhe.”

Umugore witwa Niyonsaba Françoise na we yavuze ko yagiriwe akarengane n’umusirikare bari barashakanye bagasezerana ivangamutungo, ariko mu 2016 avuye mu butumwa bw’akazi mu mahanga, aramuta.

Ati “Nagiye kumva [ngo hari] ikirego mu rukiko asaba ubutane. Cyokora ibyo yaregaga naranabimutsinze ariko babuduhaye kubera ko yari yarantaye. […] Yari ahishe imitungo, yandikishije inzu twari dufite ariko amafaranga yavanye muri Sudani yose arayatwara, umutungo twari dufite muri Gasabo iwabo bari baraduhaye na wo awandika kuri mukuru we wo kwa Se wabo, tuburana imitungo myinshi yarayihishe.”

Mu gihe cyo kurangiza urubanza, ngo umugabo yayigurishije n’inzu bari bafite, amafaranga yose arayatwara.

Umugaba w’Ingabo zirwanira ku Butaka, Lt Gen Jean Jacques Mupenzi yahise amwegera ndetse n’Umunyamabanga wa Leta muri Minisiteri y’Ubutabera, Uwizeyimana Evode, ari nabo bashinzwe gukurikirana icyo kibazo.

Undi watanze ikibazo ni Ntibankundiye Patrick wavuze uburyo bavuye muri Congo bahungutse mu 1995, basanga isambu yabo barayibohoje. Se ngo yagize ngo arabaza isambu ye bahita bamutwara, kugeza n’ubu yarabuze.

Yakomeje ati “Mama mu 2010 atashye nawe tuburana ya sambu, tuburana mu bunzi b’akagari turatsinda. Byabaye ngombwa ko umuhesha w’inkiko ajya kuduhesha ya sambu, asanga hari umukire wayiguze witwa Uwimana Solange. Yadusanze muri iyo sambu barimo kuyiduhesha akubita umuhesha w’inkiko natwe batwirukaho. Ubwo turangije, twagiye kuri RIB, tukihagera [uwo mudamu] yahise asaba Polisi ko idufunga.”

Perezida Kagame yahise avuga ko Umunyamabanga Mukuru wa RIB, Col Ruhunga Jeannot ahari, avuga ko uwo Solange “turaza kumenya ibye tumenye n’ibyawe, turaza kubikemura.’’

Yakomeje ati “Uwo muyobozi wa RIB muhe amateka yose n’uko byagenze, n’abo [bakozi ba] RIB bandi mwari mwaregeye.”

Yahise anabwira Col Ruhunga ati “Ndashaka ko icyo kibazo gikurikiranwa kandi ndashaka no kumenya uko byagenze, uzamenyeshe uko byagenze.”

Nyuma yo kumva ibi bibazo byose, Perezida Kagame yashimiye abaturage, avuga ko ibibazo atabikemura byose, ko abaturage bakwiye kwegera abayobozi babo bakabagezaho ibyo bafite kandi na bo bakumva ko bafite inshingano yo kubikemura.

Minisitiri w'Ibikorwa Remezo Amb. Gatete Claver yandika ikibazo cy'umuturage
Minisitiri w'Imari n'Igenamigambi, Dr Uzziel Ndagijimana arimo kuganira n'umuturage ku kibazo cye
Abaturage batonze umurongo bajya kubaza ibibazo Perezida Kagame
Minisitiri Uwizeyimana ateze amatwi ikibazo cy'umuturage
Minisitiri Uwizeyimana na Lt Gen Mupenzi bumva ikibazo cy'umugore warenganyijwe n'umugabo we w'umusirikare
Minisitiri w'Ibidukikije, Dr Vincent Biruta yumva ikibazo cy'umuturage
Minisitiri w'Ubutegetsi bw'Igihugu Prof Shyaka Anastase yegereye umugore wari ufite ikibazo
Umunyamabanga Mukuru w'Urwego rw'Igihugu rushinzwe Ubugenzacyaha (RIB), Col Ruhunga Jeannot, yumva ikibazo cya Ntibankundiye Patrick warenganyijwe
Umuyobozi w'Akarere ka Rubavu Habyarimana Gilbert ateze amatwi umuturage

Amafoto: Village Urugwiro, Kigali Today


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza