Rubavu: Umusirikare ushinjwa kurasa abantu batatu yasabiwe gufungwa burundu

Yanditswe na Mukwaya Olivier
Kuya 8 Ugushyingo 2018 saa 05:20
Yasuwe :
0 0

Ubushinjacyaha bwa gisirikare bwasabiye Pte Ngendahimana Bosco gufungwa burundu no kwirukanwa mu gisirikare, ku cyaha akurikiranyweho cyo kurasa abantu batatu umwe agahita yitaba Imana, undi akabivanamo ubumuga budakira mu gihe undi akiri mu bitaro.

Byabaye mu ijoro ryo ku wa 10 Kanama 2018, mu kabari ka Mugwaneza Christine mu mudugudu wa Rurembo, Akagari ka Byahi mu murenge wa Rubavu.

Kuri uyu wa Gatatu urukiko rwa Gisirikare rwari ahabereye icyaha ngo rusubukure iburanisha. Riheruka gusubikwa ku wa 17 Nzeri, ubwo Pte Ngendahimana yari amaze kugaragaza imbogamizi z’uko atarabona umwunganira mu mategeko.

Icyo gihe uhagarariye inyungu z’umuryango wasizwe na Benimana Jean Marie Vianney warashwe agahita apfa, yari yasabye ko leta yahagararirwa muri uru rubanza.

Kuri iyi nshuro Leta yahagarariwe na Me Batsinda Aline, Pte Ngendahimana avuga ko umwunganizi we yamumenyesheje ko yakoze impanuka bityo atabonetse mu rubanza, yongera kuvuga ko atiteguye kuburana adafite umwunganizi.

Umucamanza Major Muhigirwa Gerard wari uyuboye inteko iburanisha, yahaye ijambo Ubushinjacyaha buhagarariwe na Capt. Nzakamwita Faustin, avuga ko impamvu Ngendahimana atanze zidakwiye kwizerwa kandi zitahabwa agaciro kuko uwari kumwunganira yagombye kuba yarandikiye urukiko arumenyesha ko ari muri uru rubanza.

Ikindi ngo kuba yakoze impanuka, yari kubimenyekanisha ndetse akerekana impapuro zo kwa muganga, kurusha kuba uregwa ari we ubimenyesha urukiko.

Ubushinjacyaha, abaregera indishyi n’uruhagarariye leta bahurije ku kuba impamvu zitangwa zigamije gutinza urubanza, basaba ko zitahabwa agaciro, urubanza rugakomeza.

Umucamanza yanzuye ko urubanza ruburanishwa, ashingiye ku kuba rumaze gusubikwa inshuro ebyiri kandi uregwa akaba yarahawe igihe gihagije cyo gushaka umwunganizi.

Ubushinjacyaha bwabajijwe niba bufite abatangabuhamya, Capt Nzakamwita avuga ko inyandikomvugo batanze zihagije, badakeneye abandi batangabuhamya.

Uregwa Pte Ngendahimana yabajijwe niba aburana yemera icyaha cyangwa agihakana, ati “Nyakubahwa perezida w’urukiko namwe bacamanza, ntacyo nabona mvuga ntafite unyunganira."

Ntibyabujije iburanisha gukomeza, Ubushinjacyaha butangira bugaragaza uko Ngendahimana yakoze icyaha.

Bwavuze ko umunsi icyaha cyakozwe, uyu musirikare yapanzwe kugemurira bagenzi be bari mu birindiro bitandukanye, aho yakoreraga muri batayo ya 11 ikorera i Rubavu; maze arangije akazi aho gusubira aho akorera ajya mu kabari asangira inzoga n’abaturage.

Muri ako kabari kegereye aho yakoreraga, ni na ho yatonganiye na bamwe mu bo basangiraga.

Umushinjacyaha Capt Nzakamwita ati "Mu burakari butagira aho buturutse, mu bwenge ntazi uko bungana, Ngendahimana yahise asohoka ajya kuzana imbunda arasa Hakizimana Vincent (yacitse ukuguru) Benimana araswa mu mbavu agwa mu Ruhengeri tariki 11 Kanama 2018; Undi yarashe ntituzi niba yaravuye mu bitaro.”

Yavuze ko Ngendahimana asubiye ku birindiro yabarizwagaho, abasirikare bakorana bamubajije niba ari we urashe arabyemera, ababeshyako yikanze umwanzi akarasa, kandi ko ibi yabyiyemereye mu nyandiko mvugo ubwo yabazwa n’ubugenzacyaha.

Pte Ngendahimana aregwa ubwicanyi kuri Benimana ariko ku bandi babiri akaregwa ubwinjiracyaha, kuko na bo ngo yari agamije kubica ariko kubera igihunga ntahamye mu cyico.

Me Musabwa Frederic uhagarariye umuryango wasizwe na Benimana ugizwe n’abana batanu n’umugore, yasabye urukiko indishyi z’akababaro zingana na 52.155.300 Frw harimo n’ibyakozwe mu gushyingura nyakwigendera; bidahwanye n’ubuzima bwe ariko ngo nibura byazafasha abana kwiga, kwivuza n’ibindi.

Indi ngingo yagiweho impaka ni iy’uko abaregera indishyi basaba ko Leta ari yo yabishyura. Ku bwa Me Musabwa, ngo leta ntishinjwa ibi byaha ariko igomba kwishyura ibyo umukozi wayo yangije.

Yvuze ko Ngendahimana yarashe abantu yambaye imyenda ya gisirikare, abarashisha imbunda yahawe na leta, bityo igomba kumwishyurira igihe idahakana ko ari umukozi wayo.

Me Batsinda uhagarariye Leta y’u Rwanda yahise avuga ko iyo baba bemera kumwishyurira batarikwirirwa baza mu rukiko.

Ashingiye ku by’umushinjacyaha, yavuze ko icyaha Pte Ngendahimana ashinjwa yagikoze yasoje akazi yari yahawe ko kugemura ibyo kurya abandi basirikare.

Yashimangiye ko atigeze ashingwa guhungabanya umutekano w’Abanyarwada ahubwo yatumwe kuwurinda, anashimangira ko umukoresha ataryozwa amakosa umukozi yakoze atandukiriye inshingano ze.

Bityo ngo indishyi Pte Ngendabihama azacibwa, agomba kuzitanga ku giti cye kuko yakoze icyaha ku giti cye.

Ubushinjacyaha bwasabye urukiko kwemeza ko Pte Ngendahimana Bosco alias Karama ahamwa n’icyaha cy’ubwicanyi, agahanishwa igifungo cya burundu kandi akanyagwa amapeti ya gisirikare, akavanwa no mu ngabo z’u Rwanda kuko ntacyo azimazemo.

Umucamanza uyoboye iburanisha Maj Muhigirwa Gerard yapfundikiye urubanza, avuga ko ruzasomwa ku wa 4 Ukuboza saa saba.

Hakizimana Vincent yacitse ukuguru nyuma yo kuraswa
Abaturage benshi bitabiriye iburanisha kuri uyu wa Gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza