Rusizi: Batatu bahitanywe n’imvura idasanzwe, ibikorwa by’agera kuri miliyoni 500Frw birangirika

Yanditswe na Sitio Ndoli
Kuya 12 Ukwakira 2017 saa 10:55
Yasuwe :
0 0

Kuva imvura yatangira kugwa mu kwezi kwa cyenda uyu mwaka, imaze kwangiza ibintu byinshi birimo inzu,inganda, amashuri, imyaka iri mu murima ndetse yahitanye abantu batatu mu Mirenge itandukanye y’Akarere ka Rusizi.

Imvura ibanza yaguye ku tariki ya 19 Nzeri 2017, isiga ishenye inzu 169 naho 141 zangirika mu buryo bworoheje.Ibisenge by’amashuri 13 n’icy’uruganda rwari rutarangira gukora byaragurutse.

Ni mu gihe iyaguye ku tariki ya 9 Ukwakira, mu Murenge ya Bugarama na Muganza yo yasize yangije inzu ndetse isiga inatwaye ubuzima bw’abantu babiri, umukecuru uri mu kigero cy’imyaka 75, umwana w’umwaka umwe n’igice n’umugore wakubiswe n’inkuba mu Murenge wa Bweyeye.

Bamwe mu baturage bahuye n’ibi biza babwiye IGIHE ko kuri ubu babayeho nabi kubera imvura yabasenyeye, ibiribwa n’ibikoresho byo mu rugo birangirika ndetse bamwe basigaye batagira aho bikinga.

Irankunda Marianne wo mu Mudugudu wa Kibangira ati “Inzu zagurutse none twaraye hanze, abana bo twabacumbikishirije.”

Nyirabagenzi Rahabu ati “Imvura yaraguye cyane igwana umuyaga mwinshi, ibintu byose byaragiye; ibyo turyamira n’imyaka byose byaragiye, ubu mbega tubayeho nabi cyane.”

Umuyobozi w’Akarere ka Rusizi, Harerimana Frederic yavuze ko kwimura abaturage ari kimwe mu bisubizo by’ibiza bikunda kwibasira abatuye mu mirenge igize ikibaya cya Bugarama.

Ati “Iyi mirenge dukunze kuvuga ngo iri mu kibaya yahuye n’ibibazo by’ibiza bikomeye ariko si iby’uyu munsi bisanzwe bibaho. Kugira ngo duhangane n’iki kibazo ni ukwimura abaturage bakajya mu Midugudu, ni umushinga wagutse usaba ubushobozi bwinshi cyane ariko dufatanyije n’izindi nzego (Minagri, Minaloc …) ariko nubwo abaturage baba bimutse muri iki kibaya hagashyirwa ubuhinzi, iyi misozi ikikije ikibaya biradusaba guteraho imirwanyasuri.Ikindi ni ugusaba abaturage kubaka inzu zikomeye.”

Akomeza avuga ko kuva iyi mvura yagwa imaze kwangiza ibintu byinshi cyane bifite agaciro ka miliyoni zisaga 500 z’amafaranga y’u Rwanda.

Ati “Biragoye ko duhita tubishyira mu mafaranga uyu munsi ariko nko muri raporo dufite hari ibitari byamenyekana, dushingiye no ku bindi biza byabaye muziko byanasenye n’uruganda, ushobora gusanga bikabakaba muri miliyoni Magana atanu tugereranyije.”

Kuri ubu harabarurwa inzu 202 zangiritse ku buryo zikenewe gusanwa na hegitari 25 z’imirima y’ibigori, umuceri n’imboga zangiritse kubera amazi.

Inzu MIDIMAR yubakiye abatishoboye mu Mudugudu wa Kibangira zarasenyutse
Hegitari 25 z'imirima y'umuceri n'ibindi bihingwa byo mu gishanga cya Bugarama byarengewe n'amazi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza