U Rwanda rwakwitega iki ku nama ya Commonwealth mu 2020?

Yanditswe na Mathias Hitimana
Kuya 26 Ugushyingo 2018 saa 02:48
Yasuwe :
0 0

Mata 2018, inkuru nziza yatashye mu rwa Gasabo ko u Rwanda rwatoranyijwe kuzakira bwa mbere Inama y’Abakuru b’Ibihugu na za Guverinoma byo mu Muryango w’Ibikoresha Ururimi rw’Icyongereza (Commonwealth) yo mu 2020.

Uhagarariye u Bwongereza mu Bunyamabanga bwa Commonwealth, Philip John Parham, yagiriye uruzinduko mu Rwanda, rugamije kuganira na Guverinoma ku myiteguro y’iyi nama.

Mu kiganiro InFocus cya RBA cyatambutse kuri iki Cyumweru, Parham yagaragaje ko u Rwanda rufite inyungu nyinshi mu kuzakira iyia nama.

Yagize ati “Mu bifatika, navuga nk’abantu benshi bazaza i Kigali kandi Kigali imenyereye kwakira inama, navuga nk’iy’Umuryango wa Afurika Yunze Ubumwe n’izindi nama nyinshi […] Ndizera ko abakuru b’ibihugu benshi bazaza mu nama y’i Kigali bazaruta abitabiriye inama y’i Londres.”

Yibukije ko abakuru b’ibihugu bitabiriye inama iheruka ya Commonwealth mu Bwongereza bari 46 mu bihugu 53 bigize uyu muryango.

Uretse inama y’abakuru b’ibihugu, Parham yasobanuye ko i Kigali hazabera inama nyinshi zirimo iza ba Minisitiri b’Ububanyi n’Amahanga, iz’abagize Inteko zishinga Amategeko, iz’urubyiruko, iz’abagore n’izindi.

Yashimangiye ko iyi nama izitabirwa n’abantu ibihumbi, barimo abazitabira iz’amahuriro abanziriza iy’abakuru b’ibihugu.

Parham yavuze ko bizwi ko Umwamilakazi w’u Bwongereza, Elizabeth II, amaze igihe adakora ingendo ndende nk’uko yajyaga azikora, ariko ati“ndizera ko igikomangoma Charles [uyobora Wales] azaba ari inaha”.

Ku bandi bazitabira iyi nama, yirinze kugira abo avuga kuko bireba u Rwanda ruzakira iyi nama.

Mu gihe iyo abashyitsi benshi bakiriwe i Kigali, hahita humvikana icyashara ku mahoteli n’abandi bacuruza serivise, hitezwe inyungu zagutse ku bikorera.

Parham yavuze ko inama ya Commonwealth izazanira inyungu Urwego rw’abikorera mu Rwanda kuko muri iyo nama abashoramari bazacuruza ibizakenerwa byinshi ariko bazanungukira by’umwihariko mu nama y’ihuriro ry’abashoramari baturutse hirya no hino mu bihugu bigize umuryango.

Ati “Bazaganira ku ngingo zitandukanye, zirimo uko ishoramari mu bucuruzi hagati y’ibihugu bigize Commonwealth ryakwiyongera, azaba ari amahirwe akomeye ku bashoramari b’u Rwanda kugira uruhare mu biganiro.”

Uretse inama z’ihuriro ry’abashoramari, yavuze ko hari n’amahirwe ko mu zizahuza abagore, urubyiruko na sosiyete sivile, abo mu Rwanda bazasangiza abanyamahanga ibikorerwa mu gihugu, bakareba n’ibishya bitarakorwa bakwigiraho.

Mu biganiro yagiranye na Guverinoma y’u Rwanda, Parham yavuze ko barebye aho rugeze imyiteguro y’inama, uko insanganyamatsiko y’inama yazitwa, anabasangiza ubunararibonye agendeye ku iheruka.

Asobanura ko kugira ngo imyanzuro yafatiwe mu nama za Commonwealth itaba amasigaracyicaro, uretse ubunyamabanga bw’uyu muryango, hagiye hariho amahuriro menshi agira uruhare mu ishyirwa mu bikorwa ry’ibyemejwe. Ayo harimo ahuza abacamanza, za Guverinoma, abubatsi, abagize Inteko zishinga Amategeko n’andi menshi.

Yemeje ko uyu muryango ukora ibintu byinshi ariko ko hakenewe gushyira ingufu mu kubimenyekanisha ku buryo abaturage b’ibihugu biwurimo bamenya neza Commonwealth.

Ubwo Umunyamabanga Mukuru Wungirije w’Umuryango w’Ibihugu bikoresha ururimi rw’Icyongereza (Commonwealth), Dr. Nabeel Goheer, yagendereraga u Rwanda muri Kanama 2018, yavuze ko yizeye ko u ruzakira neza inama yo mu 2020.

U Rwanda ni rwo rwasabye kwakira iyi nama nk’uko byagaragaye mu mwanzuro w’inama iheruka, wavugaga ko “Abakuru ba za Guverinoma bakiriye kandi bemera icyifuzo cya Perezida w’u Rwanda, cyo kwakira inama itaha mu 2020.”
U Rwanda rurimbanyije imyiteguro y’iyi nama ikomeye ndetse imirimo y’iyubakwa ry’Ikibuga Mpuzamahanga cy’Indege cya Bugesera iri kwihutishwa kugira ngo abazayitabira bazagikoreshe.

Uhagarariye u Bwongereza mu Bunyamabanga bwa Commonwealth, Philip John Parham

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza