U Rwanda rwashimangiye ko ntaho ruhuriye n’ifungwa ry’abimukira banze kuva muri Israel

Yanditswe na Philbert Girinema
Kuya 23 Gashyantare 2018 saa 11:59
Yasuwe :
0 0

Nyuma y’aho Israel itangiye gufunga abimukira banze kuva mu gihugu, u Rwanda rwashimangiye ko ntaho ruhuriye n’ibi bikorwa dore ko byavugwaga ko rwaba rwaremeye kwakira aba baturage b’ibihugu bitandukanye bya Afurika.

Urwego rushinzwe Abinjira n’Abasohoka muri Israel ruherutse kubwira abimukira bagera ku bihumbi icumi baturuka mu bihugu bya Sudani na Eritrea, kuhava mu gihe kitarenze amezi atatu bakajya mu bindi bihugu cyangwa bagafungwa.

Ku wa Gatatu w’iki Cyumweru, imiryango irengera uburenganzira bw’impunzi muri Israel, yatangaje ko ari ubwa mbere abimukira bafungwa bazira ko banze kwirukanwa.

Amakuru avuga ko abimukira 16 bakomoka muri Eritrea banze kuva muri Israel ngo basubizwe muri Afurika bafunzwe.

Mu itangazo ryashyizwe ahagaragara na Guverinoma y’u Rwanda rivuga ko rugihagaze ku cyemezo rwafashe kuva kera na kare cyo gufungurira amarembo Umunyafurika wese w’umwimukira n’impunzi ukeneye icumbi.

Iyi politiki yo guha ikaze abimukira n’impunzi, ku bashaka aho kuba by’igihe gito baturutse mu Karere n’ahandi yungukiwemo n’abantu benshi barimo abimukira bagera ku bihumbi 180 baturutse mu bihugu bitandukanye bya Afurika bafashijwe bigizwemo uruhare n’Umuryango w’Abibumbye.

Iri tangazo rikomeza rigira riti “Mu minsi ishize, u Rwanda rwemeye kwakira abacuruzwaga muri Libya.” Rikomeza rigira riti “Ibibazo by’abimukira biri muri Israel n’uburyo bwo kuhava, ni ibya Israel ubwayo. Mu gihe ibisabwa byubahirijwe, u Rwanda mu bushobozi bwarwo, ruzafasha abimukira babikeneye.”

Mu mpera za Mutarama ubwo yari i Davos mu Busuwisi mu Nama Mpuzamahanga yiga ku bukungu, Perezida Paul Kagame yabwiye Minisitiri w’Intebe wa Israel, Benjamin Netanyahu, ko ku birebana n’abimukira bari muri Israel, u Rwanda rwakwemera igikorwa icyo ari cyo cyose igihe cyaba gikurikije amategeko mpuzamahanga.

U Rwanda ruvuga ko kuba hari umwimukira uri muri Israel wahatirwa kujya mu Rwanda akangishwa ko natabikora aza gufungwa, byaba ari amakosa.

Ibinyamakuru byo muri Israel byavuze kenshi ko Guverinoma y’icyo gihugu yemeye guha u Rwanda cyangwa ikindi gihugu amadolari 5,000 kuri buri mwimukira ruzakira, nawe agahabwa impamba y’amadolari 3,500.

Ni ibintu u Rwanda rwamaganye ruvuga ko nta masezerano y’ibanga rwigeze rugirana na Israel agamije kwakira aba bimukira.

Ishami ry’Umuryango w’Abibumbye ryita ku Mpunzi (HCR) ryo ryasohoye itangazo ryamagana imyanzuro ya Israel, rivuga ko abimukira badakwiriye kwimurwa ku gahato n’ubwo wagaragaje ko ushingiye ku bivugwa, hari abashobora kuba barimuwe.

HCR ivuga ko muri Israel hari abimukira baturuka muri Eritrea bagera ku 27 500 n’abava muri Sudani bagera ku 7800. Nyamara kuva Israel yambuye HCR inshingano zo gutanga ubuhunzi muri icyo gihugu mu 2009, Abanya-Eritrea umunani n’Abanya-Sudani babiri nibo gusa babuhawe.

U Rwanda rwashimangiye ko nta mwimukira ukwiye guhatirwa kujya mu gihugu adashaka akangishwa gufungwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza