Umusaruro mbumbe w’igihugu wiyongereye ku rugero rwa 6.1% mu 2017

Yanditswe na Cyprien Niyomwungeri
Kuya 13 Werurwe 2018 saa 03:46
Yasuwe :
0 0

Ikigo cy’Igihugu cy’Ibarurishamibare (NISR), kuri uyu wa Kabiri cyatangaje ko mu 2017 umusaruro mbumbe w’igihugu wazamutse ku rugero rwa 6.1%, aho wageze kuri miliyari 7 597 uvuye kuri miliyari 6 672 z’amafaranga y’u Rwanda wariho mu 2016.

Muri uyu musaruro wose uw’ubuhinzi bufite uruhare rwa 31%, inganda zifite 16% naho serivisi zikagira 46%.

Mu mwaka ushize, umusaruro w’ubuhinzi wiyongereye ku rugero rwa 7%, uw’inganda wiyongeraho 4% naho uwa serivisi wiyongeraho 8%.

Umuyobozi w’Ikigo cy’Igihugu cy’Ibarurishamibare, Yusuf Murangwa, yasobanuye ko umusaruro mbumbe w’igihembwe cya kane gusa wagize uruhare runini cyane ku musaruro mbumbe rusange kuko wiyongereye ku rugero rwa 10.5%, aho ubuhinzi, inganda na serivisi byazamutse ku rwego rushimishije.

Yagize ati “Mu buhinzi izamuka ry’umusaruro ryatewe n’umusaruro mwiza w’igihembwe cya kabiri n’icya gatatu cy’ihinga wazamutse ku rugero rwa 10%, inganda zazamutse ku rugero rwa 10%, na serivisi zizamuka 11%.”

Yakomeje avuga ko izamuka ry’umusaruro ku rwego rw’inganda ryatewe n’umusaruro w’ubucukuzi bw’amabuye y’agaciro na za kariyeri wiyongereyeho 51%, umusaruro w’inganda zitunganya ibiribwa wazamutse ku rugero rwa 16% bitewe n’izamuka ry’umusaruro w’izitunganya ibinyampeke.

Murangwa yavuze ko umusaruro w’inganda zikora imyenda n’ibikomoka ku mpu wazamutseho 19% naho uw’inganda zikora kawucu na pulasitiki uzamukaho 14%. Icyakora umusaruro w’inganda zikora ibinyobwa n’itabi wo wagabanutse ku rugero rwa 8% naho uw’ubwubatsi ugabanukaho 1%.

Mu bijyanye na serivisi, umusaruro ukomoka ku bucuruzi buranguza n’ubudandaza wiyongereye ku rugero rwa 19%, uwa serivisi z’ubwikorezi uzamukaho 16%, uw’ibigo bifasha izindi serivisi uzamukaho 37% naho uwa serivisi z’imari uzamukaho 14%.

Umuyobozi w’Ikigo cy’Igihugu cy’Ibarurishamibare, Yusuf Murangwa, yasobanuye ko umusaruro mbumbe w’igihembwe cya kane gusa wagize uruhare runini cyane ku musaruro mbumbe rusange

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza