Van Gaal yavuze kuri Kagame, uko yabonye u Rwanda n’urugendo rwe mu birunga: Ikiganiro cyihariye

Yanditswe na Philbert Girinema
Kuya 5 Nzeri 2019 saa 07:59
Yasuwe :
0 0

Louis Van Gaal wabaye umutoza ukomeye mu makipe ya FC Barcelone, Bayern Munich, Manchester United no mu Ikipe y’Igihugu y’u Buholandi, yavuze ku bihe bidasanzwe amaze kugirira mu Rwanda mu minsi ibiri ahamaze.

Uyu mugabo w’imyaka 68 uheruka gusezera ku gutoza umupira w’amaguru, ari mu Rwanda kuva kuri uyu wa Gatatu aho ari mu bazita izina abana b’ingagi mu muhango uteganyijwe kuri uyu wa Gatanu.

Mu kiganiro cyihariye yagiranye na IGIHE mu Mujyi wa Musanze, yagarutse ku buryo yageze mu Rwanda agatungurwa n’uko abaturage bavuga Perezida wa Repubulika, aho yavuze ko ari ubwa mbere yari abibonye mu buzima bwe, kubona abaturage bavuga neza umukuru w’igihugu bene aka kageni.

Ati “Abantu bose navuganye nabo, baramwishimiye. Nabajije Paul, ni umushoferi wacu ariko yavuze ko ari umuntu udasanzwe. Ntabwo nari narigeze numva na rimwe abantu bavuga neza Perezida wabo nk’uko mwe mubikora. Nibyo yakoze ibintu bikomeye.”

Yakomeje avuga ko intambwe u Rwanda rwateye nyuma ya Jenoside ari ntagereranywa mu ngeri zose. Yagarutse kandi ku rugendo rwe mu birunga aho yabonye ingagi ku nshuro ya mbere.

Ati “Nabonye ingagi, naguha amafoto ndayafite, nagiyeyo muri iki gitondo. Ni ibintu bidasanzwe, twakoze urugendo rw’amasaha atatu kugira ngo tubone ingagi ariko byari ibintu by’akataraboneka.”

Yakomeje ati “Ibyo nakunze ni uko abantu bo mu Rwanda basabana, ni abantu bacisha bugufi, ni ibintu by’akataraboneka. Kandi ndakeka ko u Rwanda rwateye imbere kurusha ibihugu byinshi muri Afurika kandi byabaye nyuma y’ariya mahano mu 1994, guhindura imitekerereze y’abantu muri iki gihe gito, ni ibintu by’agatangaza.”

Van Gaal yaje mu Rwanda mu biruhuko bikubitana n’uko hari igikorwa cyo kwita izina, byose kuri we byabaye mu buryo butunguranye.

Ati “Umwaka ushize twari muri Gambia, kandi nabwo byari byiza. Gambia ntabwo ari igihugu cyateye imbere ariko u Rwanda rwo ruri gutera imbere mu mibereho myiza n’ubukungu kandi bikajyana no kwita ku bidukikije nk’imishinga ijyanye no kwita ku ngagi, ni ibintu bidasanzwe.”

Ku bijyanye n’iterambere ry’umupira w’amaguru mu Rwanda, uyu mutoza yavuze ko nta kintu kinini awuziho, ndetse ko n’abakinnyi twasanze areba mu myitozo ari uko yabanyuzeho ku muhanda.

Ati “Nta kintu na kimwe nzi ku bijyanye n’umupira wa hano mu Rwanda, twari mu modoka tugenda hanyuma mbona ikibuga cy’umupira, hari abantu bari gukora ikiganiro ku buzima bwanjye, bati ahari byaba byiza tugiye ku kibuga. Nashakaga kubareba.”

Abajijwe ku izina azita ingagi ku munsi w’ejo, yasubije mu magambo make ati “ Uratekereza iki? Ntacyo nakubwira ubu ni ibanga.”

Yavuze kandi ku bijyanye n’umupira w’amaguru mu Rwanda avuga ko “wenda hano nshobora kuzagaruka nk’umutoza, ubu ndi mu biruhuko. Urabizi ko natoje mu makipe akomeye, iyo usubiye hasi mu makipe y’abana nawe urabyumva.” Ahari wenda mu ikipe y’igihugu, ati “Nabyo byashoboka.”

Van Gaal yavuze ko yatunguwe n'uburyo abanyarwanda bafata Perezida Kagame, ko ari ubwa mbere yari abonye abaturage bavuga neza Umukuru w'Igihugu nk'uko abanyarwanda babigenza
Louis Van Gaal yabaye umutoza ukomeye mu mateka y'umupira w'amaguru aho yanyuze mu makipe arimo FC Barcelone, Bayern Munich, Manchester United n'andi
Uyu mugabo ari mu Rwanda mu biruhuko, ariko byahise binahurirana n'igikorwa cyo Kwita Izina abana b'ingagi
Van Gaal aha inama umwana muto wamubwiye ko yifuza kuzakina muri Manchester United
I Musanze yashimishije urubyiruko yasanze ku muhanda ruri gukina umupira

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza