00:00:00
IGIHE NETWORK

Rubavu: Intambwe ijya mbere ku rubyiruko rwatangije umushinga wo gukora imashini zitunganya umusaruro w’ubuhinzi

Abasore bane bo mu karere ka Rubavu bibumbiye muri sosiyete yitwa Rubavu Electro Mechanical Services ikora imashini zitunganya umusaruro ukomoka k’ubuhinzi n’ubworozi, bemeza ko byabahinduriye ubuzima, bakanafasha abandi gutera imbere.

Uyu mushinga bawutangiye muri 2016 nyuma yo kurangiza amashuri yisumbuye bagasanga kubona akazi bitazaborohera.

Batangije igishoro cy’ibihumbi Magana ane ariko ubu bageze muri miliyoni esheshatu.

Rubavu Electro Mechanical Service bakora imashini zirimo izisya isombe, izisya ibigori, izipfundikira amacupa, bagafasha n’abazishaka kuzibona mu buryo bw’inguzanyo.

Abayisenga Fabrice, umuyobozi wa Rubavu Electro Mechanical Service yabwiye IGIHE uko batangiye n’icyo babona sosiyete yabo imariye abaturage.

Yagize ati “Urabizi neza ko mu Rwanda hari gahunda yatangiye muri 2012 ijyanye n’uruganda iwacu, twahise dutekereza ko natwe tugomba kuba muba mbere mu kuyishyira mu bikorwa. Twahise dutangira gukorera abaturage za mashini zibafasha gutunganya umusaruro ukomoka k’ubuhinzi bwabo, kugira ngo umuturage ntafate ibigori ngo abirye ari impungure gusa ahubwo noneho tube dufite ubushobozi bya bigori bye abikuremo ifu”

Yongeyeho ko ibyo bakora byose bagerageza gufasha n’abandi batishoboye ngo nabo bazamuke

Ati “Izo mashini iyo tuzikoze tuzihereza abaturage batishoboye, noneho wa muturage akagenda akayikoresha ahantu abonye hashobora kuba abakiliya, wa musaruro avanyemo tukawufatanya twembi.”

Ishimwe Norbert ushinzwe imenyekanishabikorwa muri iyi sosiyete, avuga ko nyuma yo kwihangira umurimo byamuhinduriye ubuzima n’imibereho.

Ati “Ntaraza hano ubuzima bwanjye bwari bwigunze. Byari kwa kundi umuntu abyuka mu rugo ugasanga abuze icyerekezo ariko ubu nsigaye mbyuka nkavuga ko ngiye ku kazi, ubwo ubuzima bwarahindutse.”

Mukatuyizere Marie Rose, umwe mu bagurijwe imashini na Rubavu Electro Mechanical Services, avuga ko nyuma yo kubona iyi mashini ubuzima bwahindutse.
Uyu mubyeyi avuga ko ubu atakigorwa no kubona ibikoresho by’ishuri by’abana n’amafaranga yo kwikenuza.

Ati “Nk’ubu iyo twagize umugisha nko kuwa Gatandatu cyangwa ku cyumweru dukorera ibihumbi bitanu, amake akaba nk’ibihumbi bibiri”.

Abagize Rubavu Electro Mechanical Services bifuza ko mu myaka itanu iri imbere bazaba bafite iduka bacururizamo imashini bakoze, ibintu bizabafasha kongera umubare w’abantu baha akazi bakunganira na leta mu gutanga akazi.

Aba basore bakora imashini zitandukanye zitunganya cyane cyane umusaruro w'ubuhinzi n'ubworozi
Muri Rubavu Electro Mechanical Services bakora n'utumashini dupfundikira amacupa
Aba basore bafite intego ko mu myaka itanu iri imbere bazaba bafite iduka bacururizamo imashini bakoze, ibintu bizabafasha kongera umubare w’abantu baha akazi bakunganira na leta mu gutanga akazi.
Ishimwe Norbert ushinzwe imenyekanishabikorwa muri iyi sosiyete, avuga ko nyuma yo kwihangira umurimo byamuhinduriye ubuzima n’imibereho
Abayisenga Fabrice, umuyobozi wa Rubavu Electro Mechanical Service yabwiye IGIHE uko batangiye n’icyo babona sosiyete yabo imariye abaturage
Mukatuyizere Marie Rose, umwe mu bagurijwe imashini na Rubavu Electro Mechanical Services, avuga ko nyuma yo kubona iyi mashini atakibura ibikoresho by'ishuri by'abana be

Amafoto: Laura Mulkerne


Tanga igitekerezo


BIGEJEJEYO