00:00:00
IGIHE NETWORK

Uburyo ubugeni bwafashije Umulisa kurihira kaminuza abavandimwe be nyuma yo kubura ababyeyi bakiri bato

Umulisa Esperance, ni umukobwa wo mu Karere ka Rubavu mu murenge wa Gisenyi ukora umwuga wo gushushanya (Arts Plastiques), akaba umwe mu bakobwa bake bawukora mu gihugu.

Ni umwuga amazemo imyaka 15, dore ko yawutangiye mu 2004 nyuma yo gupfusha ababyeyi be bombi, agasigara ari we mukuru ugomba kwita kuri barumuna be na basaza be batandatu bari basigaye.

Yabyinjiyemo ngo ataburara cyangwa bene nyina bakangara, ariko ni umwuga wamutunze kugeza ubwo bose barangije kwiga Kaminuza bakabasha kwibeshaho.

Uyu mukobwa yaganiriye na IGIHE, adusangiza urugendo rw’ubuzima bwe, n’uko yihangiye umurimo ngo abavandimwe be batazangara.

IGIHE: Umwuga wo gushushanya wawutangiye ryari?

Umulisa: Nabitangiye mu 2005, ntangira nkora banderoles. Natangiye nkorera akarere, nandika ku myenda n’ibyapa nyuma mbonye ko ibintu byo gukora banderole bigenda bigabanuka, ndavuga nti ko nkunda ubugeni, uwakwagura nkashushanya nkoresheje irangi aho kuguma kuri za banderoles?

IGIHE: Byatewe n’iki ngo winjire mu by’ubugeni?

Umulisa: Ninjye mukuru mu rugo nkaba mpagarariye umuryango. Nta babyeyi dufite, naricaye ndavuga nti ese nk’umwana mukuru w’umukobwa ntagize icyo nkora nshobora kurera barumuna banjye nabi cyangwa njye nkabaho nabi. Kubera ko gushushanya ari ibintu byambagamo nkiri umwana, naravuze nti uwakwiga gukora banderoles. Nari imfubyi ndera barumuna banjye, ndavuga nti bishobora kuzanyorohera kubaho.

Kuba rwiyemezamirimo neza nabitangiye 2005 hari hashize imyaka ine mama apfuye, Papa we yapfuye mbere. Nari nkiri muto kandi turi barindwi ngomba kubishyurira ishuli, ngomba gushaka ibyo kurya kugira ngo bataba mayibobo, mpita numva aribyo ngomba gukora kubw’amahirwe biradutunga.

IGIHE: Ubumenyi bwo gushushanya wabukuye he?

Umulisa: Hari umunyabugeni w’inshuti y’umuryango witwa Aimable Twahirwa, nagiye kumusaba ngo anyigishe kuko yaransuraga akabona ukuntu nshushanya nko mu makayi akambwira ngo arashaka ko anyigisha gushushanya. Yanyigishije amezi abiri mpita ntangira. Ubu nkoresha amarangi, igitambaro n’urubaho.

IGIHE:Ubugeni bwawe bwibanda he?

Umulisa: Nkora ibintu bya Kinyarwanda nkaba nakora nk’urugo rwa kera, nkerekana umuco wa kera, uko abantu kera basangiraga, basabanaga cyangwa umwana w’umukobwa kera uko yabaga ameze.

IGIHE: Iyo ugiye gushushanya ikintu runaka, inganzo iyikura he?

Umulisa: Hari igihe nicara ngatekereza. Nkatekereza nko ku bintu byaba bimbayeho ako kanya cyangwa ibintu byabaye cyangwa ubutumwa nshaka kuzahereza abantu kugira ngo babe ukundi kuntu, ngahita mfata ikayi nkabishushanya nyuma nkaza kubishyira ku gitambaro neza.

IGIHE: Isoko ry’ibyo ukora rihagaze gute?

Umulisa: Mfite isoko hano mu Rwanda nkunda no kubishyira ku mbuga nkoranyambaga nkahakura abakiliya.

Isoko hano mu Rwanda rirahari no hanze nkagira abantu bagiye bagenda bakambwira ngo mbakorere nkabyohereza muri Amerika no mu Burayi.

IGIHE: Gushushanya byakugejeje kuki?

Umulisa: Hari ibyo twagezeho, abana barize bararangiza, inzu ntabwo yari nzima nayo ndayikora. Urumva hari ubundi buzima twagezemo no gufunguka, kumenyana n’abantu benshi byaramfashije cyane.

IGIHE: Uretse wowe, hari abandi bakozi ukoresha?

Umulisa: Nk’iyo mfite komande nyinshi nifashisha abana b’inshuti zanjye b’abanyabugeni nabo tugakorana nkabahemba.

IGIHE: Ni ikihe gishushanyo cyagutwaye umwanya munini?

Umulisa: Ni ibishushanyo bitatu nakoze numva ndabikunze. Icya mbere nashakaga kwerekana ubumwe bw’umuryango. Byantwaye umwanya kugira ngo mbone ukuntu nzagishushanya.

Icya kabiri ni icyo nakoze kigaragaza ko ubwiza bw’umugore ari umurimo, cyari kiriho abakobwa batatu bikoreye, umwe avuye guhaha undi avuye kuvoma bahuriye hagati, bafite isura nziza, bafite igihagararo cyiza ariko nkerekana ko umwana w’umukobwa niyo yaba ari mwiza gute agomba gukora kuko ari cyo kintu kiranga umugore.

Narebye nko muri iki gihe wenda nko ku mbuga nkoranyambaga ibyo nkunda kureba nkabikurikirana, nkasanga umuntu abaho mu buzima yerekana ubwiza bwe ariko nkumva ko ugomba no kugira umurimo ukora byakubitana n’ubwiza ufite bikagira noneho akamaro kenshi.

IGIHE:Ni izihe mbogamizi mwahuye nazo?

Umulisa: Mbere byari byiza hari abakiliya ibintu byose biboneka, ubu ntabwo biba byoroshye kugira ngo tugurishe, guhera nka 2018 mu ntangiriro ntibigenda neza.

IGIHE: Mu myaka itanu urifuza kuba ugeze he?

Umulisa: Nko mu myaka itanu iri imbere ndumva ubugeni bwanjye, naba ndi muri rwa rwego umuntu ashobora kubaza ngo umunyabugeni witwa Umulisa muramuzi, ugahita amenya kubera ibintu nakoze.

Ndifuza kandi ko hari nk’abantu nafasha kubyigisha kuko byaramfashije, byarantunze ni umurimo mwiza ku muntu uwukunda. Numva hari abo nafasha cyane cyane abagore ntibumve ko ari iby’abagabo gusa kuko ni umurimo w’abantu bose.

IGIHE: Ni iyihe nama mwagira urubyiruko rutinya kwihangira umurimo?

Umulisa: Inama nagira cyane cyane umwana w’umukobwa, ni uko umurimo wose ukoze uwukunze uragutunga, ibi bintu by’imirimo y’amaboko n’ubugeni ni byiza kuko bituma utekereza cyane ukaba wagera kure.

Umulisa arifuza ko ubugeni bwe bumuteza imbere akanabwigisha abagore n'abakobwa
Kimwe mu bihangano Umulisa ari gukora
Ibihangano by'uyu mukobwa byibanda ku muco nyarwanda n'uruhare rw'umugore mu muco nyarwanda
Umulisa yabashije kurihira abavandimwe be amashuri abikesheje ubugeni

Amafoto: Laura Mulkerne


Ibitekerezo

  • Waouuu! Mbega byiza.
    Uri ikirenga mwali mwiza, uduhaye urugero rwiza, uwashaka ibihangano byawe yakubona ate? Ukora ibintu byiza cyane, njue subwambere mbonye tableau zawe. Courage! Uri intwarane


Tanga igitekerezo


BIGEJEJEYO