00:00:00
IGIHE NETWORK

Uko Karekezi Martine yabaye umwanditsi w’ibitabo abitewe no kubura inkuru akoresha yigisha abana

Nta gihe cyashira utumvise abavuga ko Abanyarwanda badafite umuco wo gusoma, ko aho gusoma ibitabo bamwe bihitiramo gusoma amacupa mu tubari.

Byashoboka ko ari byo ariko ikibazo gikomeye ubivuga akwiriye kwibaza, ni ukumenya niba abandika ibyo bitabo bo bahari ku buryo buri wese mu cyiciro cye abona ibyo soma kandi bimunyuze.

Uwacu Karekezi Martine, ni umwarimu w’indimi wabigize umwuga wigisha abana bo mu mashuri y’incuke kuri Green Hills Academy mu Mujyi wa Kigali.

Hejuru yo kuba umwarimu, ni umwanditsi w’ibitabo by’abana, imivugo, gushushanya n’ibindi bifite aho bihuriye n’ubugeni.

Uyu mwarimu umaze imyaka isaga 15 mu burezi, yavuze ko agitangira kwigisha yaje kujya ahura n’ikibazo cy’inkuru ziryoshye zijyanye n’amasomo yabaga asabwa kwigisha abanyeshuri be.

Yarebye kujya apfa kwigisha uko abonye, abona yaba ari gutatira amahame agenga umwuga w’uburezi, ahitamo gutangira kwiyandikira inkuru zizajya zijyana n’amasomo ashaka kwigisha abana.

Mu kiganiro yagiranye na IGIHE yagize ati “Nabitangiye nkitangira kwigisha. Hari ukuntu ukenera kwigisha isomo, ukabona nta nkuru n’imwe iri mu gitabo ufite yagufasha kwigisha.”

Yakomeje agira ati “Njye ntabwo inkuru nari nkeneye byari ngombwa ko ziba mu bitabo cyangwa ngo zimpe amafaranga, nta nubwo nari nzi ko hari uwazikunda ngo azishyire mu bitabo ariko njye zari zinyuze n’abanyeshuri banjye zikabaryohera. Nkandika inkuru yarangiza ibyo nayihimbiye nkayishyira mu kabati nkayibika.”

Mu mwaka wa 2015, Uwacu yaje guhura n’abashinzwe guteza imbere ibijyanye n’ibitabo mu muryango Save the Children, bamusangana agatabo gato yari yariyandikiye n’intoki karimo imwe mu nkuru yajyaga yifashisha yigisha abanyeshuri be.

Ako gatabo baragakunze, bamwizeza kumuhuza n’inzu zisohora ibitabo zikomeye zikamufasha gushyira hanze inkuru ze.

Ati “Bampuje n’inzu zisohora ibitabo ndetse n’abashushanya, bakunda inkuru zanjye uyikunze akambwira ko ayigura.”

Mu myaka mike amaze atangiye gusohora ibitabo, amaze gusohora ibitabo 20 birimo inkuru z’abana ndetse n’ibindi bine birimo imivugo.

Avuga ko amafaranga ava mu bwanditsi bw’ibitabo ataraba menshi nk’uko bikwiriye ariko ku muntu wakuze akunda kwandika ibyo bitamuca intege.

Ati “Abantu bandika ibyishimo bya mbere ntabwo ari amafaranga. Inyungu ya mbere tugira ni ukubona ko hari abasomye ibyo twanditse cyangwa se akaguha igitekerezo gitandukanye. Uguhaye igitekerezo aba aguhaye inyungu iruta uwari kukigura akagishyira mu kabati.”

Uwacu nyuma yo gushyira hanze impano ze, yashinze Sankofa Creative Ltd, inzu ihuriza hamwe abahanzi n’ abanyabugeni mu ngeri zitandukanye, bagahanga, bagakosorana bakagurisha.

Ubwanditsi bwatumye Uwacu atagihorana umutima uhangayitse, cyangwa se ngo ahore arambirije ku mushahara gusa.

Ati “Umushahara uko waba ungana kose ntabwo ushobora guhaza icyo umuntu akeneye. Ibyo nibyo byakabaye bitera imbaraga umuntu agahanga ikindi ku ruhande. Bikumara ubwoba bwo kuvuga ngo uyu munsi nibanyirukana cyangwa se akazi ka hano kananiye nzabaho nte.”

Nubwo yemeza ko kwandika bitaratangira kubyara inyungu nk’uko bikwiriye, yemeza ko hari ubwo n’abanditsi batungukirwa n’ibyo bakoze kubera kutamenya neza ikibuga binjiyemo.

Ati “Ikigorana ni ubumenyi buke ku bijyanye n’amasezerano abanditsi bagirana n’abasohora inkuru. Ku buryo ushobora kutamenya ibyo usezeranye n’umuntu kuko utabizi ku buryo n’inkuru zawe zishobora kutazakugirira n’akamaro.”

Afite inzozi zo kwagura impano ye ndetse n’ibikorwa bya sosiyete ye, ubwanditsi n’ubugeni bukaba umwuga utunga abawukora mu Rwanda.

Uwacu afite inzozi zo kwagura impano ye ndetse n’ibikorwa bya sosiyete ye, ubwanditsi n’ubugeni bukaba umwuga utunga abawukora mu Rwanda
Uwacu amaze kwandika ibitabo bigera kuri 20 by'abana
Uwacu Karekezi Martine yatangiye kwandika ibitabo agitangira kwigisha
Ibitabo bya Martine biba biri mu ndimi zitandukanye

Ibitekerezo

  • mugarure ibitabo bya kera byarimo inyigisho z’ubuhanga kdi baziteguranye ubushishozi n’ubushobozi


Tanga igitekerezo


BIGEJEJEYO