00:00:00
IGIHE NETWORK

Urugendo rwa Tuyisenge wize siyansi akaba atunzwe n’ubusizi

“Nitwa icumu ry’ubucunzi rizira gucuka abacuzi bacuze. Umuheto wanjye si uwavuba nawuramvuye i Mwurire mu nyana z’inyambo, niho abanyamahanga bakurikiye nagera ahitegereye mu mpinga i Bwanacyambwe impembe nkazihuza, nkakora mu mutana, ngacumita icumu ry’indangagaciro na kirazira mu rubavu. Ndi umusizi w’umusangwa mu nganzo y’ubusizi, ndi usiga nkasigara basiganuza…”

Aya ni amwe mu magambo ari mu cyivugo cy’umuhanzi akaba n’umusizi Tuyisenge Olivier, umusore w’imyaka 24 y’amavuko umaze kugwiza ibigwi mu kuvuga amazina yo kuyobora imisango y’ubukwe bwa Kinyarwanda.

Tuyisenge yasoje amashuri yisumbuye aho yize ibijyanye n’Imibare, Ubugenge n’Ibinyabutabire [MPC], ibyo guhanga avuga ko ari impano yavukanye ariko atangira kuyivumbura ubwo yigaga mu mwaka wa Gatanu w’amashuri abanza.

Ati “kera nkiri umwana nakundaga gufata utuntu tw’udukayi noneho abanyeshuri baba basohotse bagiye nko gukina, ibintu ndimo ntekereza byose nkabishyira muri izo nyandiko. Umwarimu wanjye yaraje arambwira ati ‘ibi bintu wirirwamo bishobora kuvamo umwandiko cyangwa umuvugo’ aranyereka ati ‘ni gutya babihimba’, numva ndabikunze kuva ubwo ntangira guhimba imivugo.”

Yatangiye kwitabira amarushanwa ahuza abanyeshuri ndetse yitwara neza afata umwanzuro wo kubikora nk’umwuga mu 2012, azibukira ibindi byose yumvaga azakesha imibereho.

Amafaranga ya mbere yashyize mu mufuka ni ibihumbi 10 Frw yishyuwe n’umuntu wari inshuti ye wakoze ubukwe akamuha ikiraka cyo kuvuga amazina y’inka.

Yatangiye ategwa iminsi

Tuyisenge avuga ko mu ntangiriro ababyeyi batiyumvishaga ko ubuhanzi yari atangiye nk’umwuga bwashoboraga kumutunga.

Ntabwo bisanzwe kubona umusore w’imyaka 18 avuga Ikinyarwanda cy’umwimerere gikoreshwa mu misango y’ubukwe.

Ibi byabanje kuba imbogamizi kuri we kuko hari ababanzaga kumusuzugura kuko bakekaga ko ntabyo yabasha.

Ati “Nk’iyo umuntu namubwira ga nti ‘ubukwe bwawe nabuyobora’, yarambazaga ati ‘ubu se wowe ubukwe bwanjye wabuyobora ufite imyaka ingahe? Akakubaza ati ‘ese uzi Ikinyarwanda ku buryo wayobora ubukwe bwanjye? Ni imbogamizi y’imyumvire muri rusange.”

Atunzwe n’ubuhanzi

Tuyisenge Olivier atuye mu Mujyi wa Kigali, inzu abamo ni iyo akodesha n’ibindi byose akenera ni we ubyishakaho kandi nta handi abikura hatari mu mpano ye.

Ati “Byamaze kuba akazi. Kuko ubu ndicara mu rugo nkaryama, nkishyura inzu, nkabaho neza nk’umusore n’ibindi bitandukanye ubu buhanzi bungenzaho, sinakubeshya ko nabuvamo.”

Kuri we ngo biragoye kumuha akazi kamuhemba ku kwezi, kuko mu gihe hari abahembwa ibihumbi 150 Frw nyuma y’iminsi 30 we ashobora kuyakorera umunsi umwe yayoboye ubukwe, akanavuga amazina y’inka.

Akora kandi igitaramo ngarukamwaka yise “Ndi Igisigo” kigaruka ku muco kandi nacyo akuramo amafaranga amufasha kwibeshaho.

Afite inzozi zo kubaka ikigo ndangamuco

Tuyisenge Olivier avuga ko mu nzozi ze harimo kubaka ikigo ndangamuco ahazajya habera ibitaramo by’umuco, hakanigishirizwa ibijyanye na wo.

Ati “Mfite inzozi zo kugira ikigo ndangamuco, abantu bazajya baza tukamenya ngo buri wa gatanu hazajya habera igitaramo ku mazina y’inka, ibyivugo, ubundi abana baze kwiga ibintu nk’ibyo. Mfite izo nzozi mu myaka ya vuba nk’itanu.’’

Uyu musore avuga ko imwe mu mbogamizi ahura na zo ari ubushobozi buke butuma adashyira ku mugaragaro ibihangano bye, birimo ibitabo yandika ariko bisaba amafaranga menshi yo kubitunganya.

Tuyisenge yize siyansi ariko aza kwiyegurira ubusizi, ni nabwo bumutunze

Tanga igitekerezo


BIGEJEJEYO