Ibyo wamenya ku ishyamba rihingwamo imiti mu Rwanda rigasarurirwa muri Congo

Yanditswe na Evariste Nsengimana
Kuya 29 Kanama 2019 saa 09:39
Yasuwe :
0 0

Ishyamba ni umwe mu mitungo kamere ifatiye runini u Rwanda n’abarutuye kuko uretse kuba ribafasha kubona umwuka mwiza uhumekwa rinabafasha kubona amafaranga, ibiti byo kubakisha, imbaho, ibiti byo gucana, imiti n’ibindi.

Ikigo gishinzwe amazi n’amashyamba (RWFA) kigaragaza ko mu mashyamba igihugu gifite ateye ku buso busaga 28% by’ubutaka bwose, 68% ari ay’abaturage, 27% ari aya Leta, amashyamba acungwa n’Uturere angana na 2% n’aya sosiyete sivile angana na 3%.

Muri ayo y’abaturage habarurwamo ishyamba riherereye mu Karere ka Rusizi mu Ntara y’Uburengerazuba, mu nkengero z’ikiyaga cya Kivu, ryihariye guhingwamo ibiti bitunganywamo imiti ariko rigasarurirwa muri Repubulika iharanira Demokarasi ya Congo (RDC).

Umuyobozi wa koperative y’abakorera ubukerarugendo bushingiye ku burobyi mu kiyaga cya Kivu bo mu Murenge wa Gihundwe (Abagi), Nzeyimana Phenias, yabwiye IGIHE ko kuva cyera abona iryo shyamba risarurwamo ibitunganywamo imiti bigapakirwa ubwato bikajyanwa muri RDC.

Ati “Bahaguze cyera bateramo ibinini, birera bagasarura bagatera n’ibindi kuko ni ubutaka bunini bujya kungana nk’Utugari nka tubiri. Bahingamo ibihingwa byitwa Quinquina bahonda bakabikuraho ibihu, bakabijyana mu ruganda kubikoramo imiti.”

Nzeyimana yasobanuye bishoboka ko abazungu bene ryo baba baratangiye kurikoresha ku mwaduko w’abazungu mu Rwanda.

Ati “Pharmakina [Sosiyete y’Abadage ihinga ikanatunganya quinquina] ifite ubutaka bunini ihingaho mu Rwanda, i Bukavu na Uvila muri RDC..Icyo bakora, bahinga bakanatunganya imiti irimo za quinine [wamamaye mu kuvura malaria]”.

Uyu mugabo asobanura ko cyera hahoze ari ubutaka bw’abaturage abo bazungu babugurira n’abaturage babaha umunyu n’ibindi batangira kububyaza umusaruro.

Ati “Baraguze, bafite n’ibyangombwa, bivuze ko banatanga imisoro ya buri kwezi. Uyu munsi abakozi barikoramo n’ababacunga ni abanyarwanda..Bimeze nk’ibihuru ariko winjiyemo ni ahantu heza usanga biteye ku murongo.”

Umuyobozi Mukuru w’Ikigo gishinzwe amazi n’amashyamba (RWFA), Prime Ngabonziza, yabwiye IGIHE ko iryo shyamba ari umtungo w’Umudege witwa ‘Gebber Horst’ yahawe na Leta y’u Rwanda ku wa 1 Nzeri 1970.

Uyu mugabo [Gebber] uri no mu bashinze Pharmakina, ngo ubwo hatangiraga gahunda yo kubarura ubutaka kuri bene bwo, ku wa 21 Gicurasi 2014 yongeye guhabwa ibyangombwa by’ubwo butaka busaga hegitari 180.

Igice kimwe cy’iryo shyamba kiri mu Murenge wa Nkanka, Akagari ka Ngazi kikangana na hegitari 149, ikindi kiri mu Murenge wa Gihundwe, Akagari ka Gihaya rifite hegitari 28 naho irindi rifite hegitari 3.1 riherere mu Murenge wa Gihundwe, Akagari ka Kagara.

Ngabonziza ati “Umwihariko w’aya mashyamba ni uko yatewe afitiwe gahunda yo kubyazwa umusaruro, bivugwa ko yaba avamo imiti. Yarabikoze ariko akanabikorera mu gihugu cya RDC duturanye.”

Ngabonziza yasobanuye ko bizwi ko abibyaza uwo musaruro ariko adasarura amashyamba mu buryo bwo kuyatema ngo ayajyane muri RDC cyangwa ahandi.

Ati “Afite uko asarura ariko ishyamba rihora rihari nta biti atema, ntabwo byangiza ibidukikije, ntibihungabanya ubuso buteyeho amashyamba. Ikindi ntekereza kandi nzi ni uko akomeza kugira akamaro gasanzwe ko kugabanya imyuka mibi yangiza ikirere, gutanga imvura.”

Nubwo Pharmakina itagaragaza ingano ya Quinquina isarura kuri ubwo butaka bwo mu Rwnada, urubuga rwayo rugaragaza ko 60% by’umusaruro bikorwamo imiti ivura malaria ucuruzwa mu bihugu birimo n’u Rwanda.

Urwego rw’amashyamba by’umwihariko aya Leta arimo kwegurirwa abikorera, mu 2017 rwinjije miliyari zisaga 67Frw, bikaba biteganyijwe ko nyuma yo kuyegurira abikorera azinjiza asaga miliyari 200Frw ku mwaka.

Iri shyamba riherereye mu Karere ka Rusizi mu nkengero z'ikiyaga cya Kivu
Nzeyimana Phenias, yabwiye IGIHE ko kuva cyera abona iryo shyamba risarurwamo ibitunganywamo imiti bigapakirwa ubwato bikajyanwa muri RDC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza