Amashyamba ya leta amaze kwegurirwa abikorera ku kigero cya 30%

Yanditswe na Evariste Nsengimana
Kuya 28 Kanama 2019 saa 03:14
Yasuwe :
0 0

Guverinoma y’u Rwanda ikomeje ibikorwa byo kwegurira abikorera amashyamba ya Leta no gushishikariza abaturage bayafite kwibumbira muri koperative mu kunoza imicungire n’imikoreshereze yayo no kongera umusaruro uyakomokaho.

Politiki y’amashyamba yo mu 2010, iheruka kuvugururwa mu 2018 iteganya ko abikorera bagomba kugira uruhare rukomeye mu kongera umusaruro n’agaciro by’amashyamba kuko igenzura ryakoze ryagaragaje ko ashobora gucungwa neza mu gihe yeguriwe abikorera.

Mu kiganiro cyihariye yahaye IGIHE, Umuyobozi Mukuru w’Ikigo gishinzwe amazi n’amashyamba (RWFA), Prime Ngabonziza, yavuze ko kugeza uyu munsi amashyamba ya Leta amaze kwegurirwa abikorera ku kigero cya 30% hatabariwemo za Pariki.

Ati “Muri iyi gahunda tumaze kwegurira abikorera amashyamba ya Leta agera kuri 30% ariko ntabwo mbariyemo amapariki kuko iyo rimaze kwitwa pariki ryegurirwa ikigo gishinzwe iterambere (RDB), rikabyazwa umusaruro mu rwego rw’ubukerarugendo.”

Mu bafatanyabikorwa bigeze kuvugwa muri iyi gahunda yo kwegurira amashyamba abikorera harimo Inganda z’icyayi, ibigo bikora imirimo yo gusatura no gutunganya imbaho birimo icyitwa New Forest Company, gikorera muri Afurika y’Iburasirazuba, ikitwa Sawmill East Africa cyo muri Lithuania gikora ibikorwa byo gusatura imbaho zifashishwa n’ibigo by’ubwubatsi n’ububaji.

Ngabonziza ati “Dufite abafatanyabikorwa bo mu gihugu n’abaturuka hanze, baza bagashyira imari yabo mu mashyamba. Urabona nk’aya mapoto y’amashanyarazi, ni ibiti byo mu Rwanda.”

Yasobanuye ko hari abandi batunganya imbaho mu mashyamba ya Leta n’abiyemeje gukora ubushakashatsi bushobora gutuma amwe atunganywamo imiti.

Ati “Hari abandi babonye muri ayo mashyamba iryo bazakoreramo ubushakashatsi, tubona ko bakazakuramo imiti. Ni ukuvuga ngo gahunda ya Leta ni ukwegurira amashyamba ya Leta abikorera kugira ngo afatwe neza.”

Ngabonziza yakomeje agira ati “Icyayi gitunganywa hakoreshejwe inkwi ziva mu mashyamba yo mu Rwanda. Baraza bagakorana amasezerano na Leta, ikabegurira amashyamba bagasarura amashyamba ariko batera n’ayandi.”

RWFA igaragaza ko mu mashyamba igihugu gifite 68% ari ay’abaturage, 27% ari aya Leta.

Ati “Twatangiye gahunda yo guhuriza hamwe abaturage, bagafashwa mu kwigishwa gushyira hamwe uwo mutungo wabo, bakigishwa uko ufatwa neza.”

Nyuma yo kwishyira hamwe bakagira ishyamba rigari babishaka bakaryegurira abikorera cyangwa bakaribyaza umusaruro ubwabo bakurikije inama bagirwa n’ababishinzwe. Iyi gahunda imaze gukorerwa mu Karere ka Rwamagana, Gicumbi, Gakenke na Rulindo.

Urwego rw’amashyamba kandi ni rumwe mu zifatiye runini ubukungu bw’u Rwanda kuko nko mu 2017 rwinjije miliyari zisaga 67Frw. Biteganyijwe ko nyuma yo kuyegurira abikorera azinjiza asaga miliyari 200Frw ku mwaka.

Amashyamba ya leta amaze kwegurirwa abikorera ku kigero cya 30%

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza