Ikiyaga kiri ku gasongero ka Bisoke kiri gukorwaho ubushakashatsi

Yanditswe na Ferdinand Maniraguha
Kuya 9 Ukwakira 2018 saa 05:39
Yasuwe :
0 0

Aimable Tuyigire amaze igihe ajyana ba mukerarugendo gusura ibyiza bitandukanye bitatse u Rwanda.

Bisoke ni hamwe mu ho akunze kubajyana bakishimira kureba imisozi y’u Rwanda, ibibaya by’i Bugande n’ibitwa bya Repubulika Iharanira Demokarasi ya Congo.

Icy’ingenzi gikurura ba mukerarugendo kuri Bisoke ni uburyo ari ikirunga gito, ushobora kuzamuka ugahura n’ingagi by’umwihariko kikaba gifite ikiyaga ku gasongero.

Nyamara, icyo kiyaga uretse kucyicara imbere ukishimira kukireba, ntabwo byemewe kugikandagiramo.

Tuyigire avuga ko byaba byiza kibyajwe umusaruro byaba na ngombwa abantu bagahabwa uburenganzira bwo kogamo.

Ati “Byagira umumaro kuko nyuma y’uko umuntu yajya kureba ikiyaga haba hiyongereyeho ko yanacyishimishamo. Bibaye amahire bagashyiramo nk’ubwo bwato nubwo byaba kwicaramo hagati umuntu akanifata amafoto byaba ari ikindi cyiyongereyeho.”

Ikiyaga kiri kuri Bisoke si kinini kuko kibarirwa umurambararo wa metero 400 n’ubujyakuzimu bwa metero ijana.

Ikigo cy’Igihugu gishinzwe Ubukerarugendo (RDB) cyatangarije IGIHE ko icyo kiyaga kiri gukorwaho ubushakashatsi kugira ngo harebwe niba cyabyazwa umusaruro.

RDB ivuga ko yirinze kugikomorera ba mukerarugendo kugira ngo hatagira urusobe rw’ibinyabuzima ruhangirikira.

Yagize iti “Tubikora twirinda kubangamira urusobe rw’ibinyabuzima ruri muri icyo kiyaga kuko tugikoraho inyigo. Ntabwo twakwemera ko habera ibikorwa byo kwishimisha kugeza igihe inyigo izaba igaragaje niba bikozwe ntacyo byatwara.”

Bisoke ni ikirunga gifite uburebure bwa metero 3711.Cyarazimye kuko giheruka kuruka muri Kanama 1957.

Augustin Bukuru, Umuyobozi wa sosiyete Show Me Around Rwanda Safaris itembereza ba mukerarugendo yabwiye IGIHE ko hari byinshi byanozwa kuri Bisoke ku buryo uhasuye ataha yishimye cyane.

Yasabye ko kubera ubukonje buba ku gasongero kacyo, haramutse hanashyizwe iduka ricuruza ibinyobwa bishyushye nk’icyayi byaba akarusho.

Umwaka ushize, Bisoke yasuwe n’abakerarugendo 3 242 nkuko RDB ibitangaza.

Tanzania nayo iherutse gutangaza ko igiye gutangiza ibikorwa byo gutwara ba mukerarugendo mu kiyaga cya Ngosi giherereye hejuru y’imisozi ya Poroto, mu ntara ya Mbeya, igamije kongera ba mukerarugendo bagisura.

Ku gasongero ka Bisoke hariyo ikiyaga kirimo gukorwaho ubushakashatsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza