Imishinga myiza y’ubuzima no kubungabunga ibidukikije muri Afurika igiye guhatanira $50,000

Yanditswe na Ishimwe Israel
Kuya 12 Ugushyingo 2018 saa 02:09
Yasuwe :
0 0

Ba rwiyemezamirimo mu ikoranabuhanga bashyiriweho irushanwa ry’inkorokoro mu guhanga udushya two kubaka uburyo bwo guhangana n’ibibazo bitandatu by’ingutu biri mu buzima n’ibidukikije muri Afurika.

Iri rushanwa ryateguwe na Sosiyete y’Abanyamerika ya Johnson & Johnson ikora mu bijyanye na serivisi zo kwa muganga, yashinzwe mu 1886.

Ryiswe Champions of Science Africa Innovation Challenge 2.0, ni irushanwa rya kabiri rikomeye mu yahuza abahanga mu ikoranabuhanga muri Afurika binyuze mu kugaragaza ibitekerezo by’udushya n’ingamba zakomeza kuzanzamura umugabane.

Abazaryitabira bazatanga ibitekerezo mu byiciro bitandatu. Birimo kwita ku bafite ikibazo cy’uburwayi bwo mu mutwe; abari hagati ya 75-85% barwaye mu mutwe muri Afurika ntibagerwaho na serivisi z’ubuvuzi.

Ikindi kijyanye no kubyaza umusaruro ibikoresho byakoreshejwe (Packaging Innovations). Izamuka ry’imyanda iterwa n’ibisigazwa by’ibikoresho riteye inkeke muri Afurika.

Icya gatatu ni ugukora imiti ivuye mu byatsi n’ibiti (Botanical Solutions). Ingo ziri hagati ya 60 na 80% muri Afurika zikoresha imiti gakondo mu buvuzi.

Hari n’uburyo bwunganira abakora kwa muganga bagorwa no gukurikirana indwara z’ibyorezo n’imbogamizi ziri mu buvuzi. Ni uburyo buzafasha abaganga n’abaforomo gutanga serivisi nziza.

Ubuvuzi kandi bukeneye ikoranabuhanga rigezweho ryafasha Afurika guhangana n’indwara nka Sida, Igituntu, Ebola, ubuzima bwo mu mutwe n’ubw’umubyeyi, byibasira cyane abagore. Haziyambazwa application n’ubundi buryo bwakoroshya ihanahana ry’amakuru mu kwihutisha ubuvuzi.

Afurika kandi ikeneye abahanga mu kubaga kuko hari indwara zivurwa abarwayi banyujijwemo icyuma mu gihe ibitaro byinshi bidafite izo serivisi.

Ibi ni byo bishakirwa ibisubizo birambye binyuze mu mishinga izatoranywa.

Ba ny’ir’imishinga izatoranywa bazahabwa $50,000, akabakaba miliyoni 44Frw, banahugurwe n’abahanga bakorana Johnson & Johnson ku kuyishyira mu bikorwa.

Umuyobozi ushinzwe Ikoranabuhanga muri Johnson & Johnson Consumer Inc. Josh Ghaim, yavuze ko iri rushanwa rigiye kuba ku nshuro ya kabiri rigamije kwagura ba rwiyemezamirimo no kubafasha guhanga ibisubizo by’ibibazo bihari.

Yagize ati “Izamuka ry’ibigo byo guhanga udushya muri Afurika riragaragaza ba rwiyemezamirimo bashya bafite inyota yo gushaka inzira nshya zo gushaka ibisubizo bya sosiyete zabo.”

Johnson & Johnson Family igizwe n’ibigo bikomeye mu by’ubuzima ndetse imaze imyaka 85 ikorana na Afurika mu bihugu birenga 25.

Ibitekerezo by’imishinga bishobora gutangwa n’umuntu ku giti cye cyangwa ikigo. Ushobora gusura urubuga rwa Africa Innovation Challenge ku bindi bisobanuro.

Igikorwa cyo kwakira imishinga izatoranywa kizasozwa ku wa 16 Mutarama 2019, ari nawo mwaka uzatangarizwamo iyatoranyijwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza