Ingagi zo mu misozi zavanywe mu cyiciro cy’inyamaswa ziri mu byago bikomeye byo gukendera

Yanditswe na Rabbi Malo Umucunguzi
Kuya 15 Ugushyingo 2018 saa 01:26
Yasuwe :
0 0

Ihuriro Mpuzamahanga ryo kubungabunga ibidukikije (IUCN), ryemeje ko ingagi zo mu misozi zikomeje kwiyongera ku rwego rushimishije, ku buryo zitakiri mu mubare w’inyamaswa zigeramiwe ndetse zishobora gucika ku Isi.

IUCN ikurikirana urwego inyamaswa n’ibimera bibungabunzweho ku Isi yose, hashingiwe ku bimenyetso n’isesengura ry’abahanga.

Nk’uko yabitangaje kuri uyu wa Gatatu, ingagi zo mu misozi ziganje mu Rwanda, Uganda na Repubulika Iharanira Demokarasi ya Congo zavanwe mu cyiciro ziri cya ‘critically endangered’ zishyirwa mu cyiciro cya “endangered’ hagendewe ku rwego rw’ibyago bikizibuza kororoka.

Mu myaka 40 ishize nibwo Dr Diane Fossey wamenyekanye mu Rwanda mu kwita ku ngagi n’amahanga ashishikazwa no kwita ku bidukikije, bashavujwe n’uko umuryango w’ingagi wari uzwi nka ‘Group 4’ wamazwe n’ibikorwa bya ba rushimusi.

Group 4 niwo muryango wa mbere w’Ingagi wakoreweho ubushakashatsi n’ikigo Karisoke Research Center cyashinzwe na Dr. Fossey.

Mu 1978 ingagi enye zari zigize Group 4 zishwe na ba rushimusi, izindi eshatu zipfa zizize ingaruka zishingiye ku ihungabanywa ry’umuryango wazo. Kugeza mu Ukuboza uwo mwaka, imiryango itatu y’ingagi muri 11 yabarurwaga niyo yari ikiba hamwe.

Nyuma y’isenywa rya Group 4 ingagi zigasigara ari 240 gusa, Fossey yatangiye kugira ubwoba ko ingagi zizazimira bitarenze umwaka wa 2000.

Gusa bijyanye n’imbaraga nyinshi zashyizwe mu kubungabunga ingagi mu birunga, zarongeye ziba nyinshi ku buryo zavuye kuri 240 mu myaka 30 ishize, zigera kuri 604 muri Kamena 2016.
Iyi mibare kandi ntirimo iziri mu ishyamba rya Bwindi muri Uganda kuko ho ubushakashatsi bugikorwa, ariko ibarura ryaho mu 2011 ryerekanye ko harimo ingagi zigera kuri 400. Bivuze ko ubu ingagi zibarurwa muri iki gice zirenga 1000.

Umuyobozi wa Fossey Fund, Dr. Tara Stoinski yavuze ko iyi ari inkuru ikomeye ku rugendo rwo kubungabunga ibinyabuzima.

Ati “Ni umusaruro w’ibikorwa bimaze imyaka myinshi byo kurengera ingagi ndetse hari n’abantu babisizemo ubuzima, n’igihamya cy’imbaraga zikomeje gukoreshwa na Guverinoma y’u Rwanda, Uganda na Repubulika Iharanira Demokarasi ya Congo, aho izi ngagi ziba.”

Umuyobozi ushinzwe u Rwanda muri Fossey Fund, Felix Ndagijimana, we yavuze ko ibi ari ari urugero rwiza rw’ubufatanye bwa za Guverinoma, imiryango irengera ibidukikije n’abaturage.

Yashimangiye ko biteguye kongera imbaraga mu gufatanya na Guverinoma y’u Rwanda mu kurengera umurage w’ibinyabuzima.

Dr. Stoinski yavuze ko nubwo hari intambwe ikomeye imaze guterwa, bikwiye kuzirikanwa ko ibibazo byugarije ingagi ntaho byagiye, birimo icyanya zituyemo.

Zose hamwe zisaranganya ubuso bungana na metero kare miliyoni 2.5, zigakomeza kwibasirwa n’indwara, ibikorwa bya muntu n’ihindagurika ry’ibihe, byose bikazifatanye n’umubare muto wazo.

Uretse ingagi zo mu misozi ziganje cyane mu Rwanda zikomeza kwiyongera, andi moko y’ingagi yo yagumye mu cyiciro cy’inyamaswa zugarijwe, akomeje gukendera.

Fossey Fund ivuga ko ikomeje kongera imbaraga mu kurengera ingagi z’ubwoko bwa Grauer buba muri Repubulika Iharanira Demokarasi ya Congo. Nibura 80% by’ubwo bwoko bw’ingagi zishwe mu myaka 20 ishize.

N’andi moko y’ingagi nka ‘Cross River gorilla’, Western lowland gorilla n’andi atandukanye, nayo agenda agabanyuka kubera indwara zirimo na Ebola.

Ingagi zo mu misozi zaherukaga gushyirwa mu cyiciro cya ‘critically endangered’ ubwo zari nke cyane, munsi ya 250.

Guverinoma y’u Rwanda iheruka gutangaza gahunda yo kwagura Pariki y’Igihugu y’Ibirunga ikava ku buso bwa kilometero kare 160, ikongerwaho ¼ bitarenze imyaka itanu.

Muri Gicurasi 2017 Ikigo cy’Igihugu cy’Iterambere (RDB) cyakubye kabiri igiciro cy’abajya gusura ingagi mu birunga kiva ku madolari 750 kigera ku 1500$ ku bantu bose, hagamijwe gushaka ishoramari ryo gushyira mu mishinga yo kuzibungabunga.

Mu mwaka ushize umusaruro u Rwanda rukura mu bikorwa by’ubukerarugendo wageze kuri miliyoni $438, wiyongeraho miliyoni $34 ugereranyije na 2016.

Ingagi zo mu misozi ntizikiri mu cyiciro cy'inyamaswa ziri mu byago bikabije byo gukendera
Iyi ngagi y'ingabo yari yizihiwe nyuma ya gahunda zimaze imyaka myinshi zo kuziremera ahantu hatekanye ho kuba
Ubuto bw'aho ingagi zituye nayo ni kimwe mu bibazo zifite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza