Ethiopia izohereza icyogajuru mu kirere mu 2019

Yanditswe na David Eugène Marshall
Kuya 4 Ugushyingo 2018 saa 11:00
Yasuwe :
0 0

Bitarenze Nzeri 2019, Ethiopia izaba yinjiye mu ruhando rw’ibihugu mbarwa bya Afurika bifite ibyogajuru bwite mu isanzure.

Umuyobozi Mukuru w’Ikigo gishinzwe Ubumenyi n’Ikoranabuhanga mu by’Isanzure muri Kaminuza ya Addis Ababa muri Ethiopia, Dr Salomon Belay Tessema, yavuze ko iki cyogajuru kizahagurukira ku butaka bw’u Bushinwa ariko kikagenzurirwa muri Ethiopia.

Yagize ati “Iby’ibanze byose n’inyigo y’uko gitunganyijwe byakozwe n’abahanga bacu.”

U Bushinwa bwatanze amahugurwa na miliyoni $6 kuri uyu mushinga ufite agaciro ka miliyoni $8.

The East African yanditse ko imirimo irimo inyigo, imiterere y’icyogajuru no kucyubaka byakozwe ku bufatanye n’u Bushinwa.

Dr Solomon yagize ati “Dufite intego ebyiri nyamukuru mu gutangiza iki cyogajuru cya mbere. Iya mbere, ni ukubaka ubushobozi n’ubumenyi bw’abenjeniyeri bacu mu by’ikoranabuhanga binyuze mu mikoranire n’abahanga n’ibigo byo mu bindi bihugu.”

Ibyo abo bahanga b’Abanya-Ethiopia bazavoma muri iyo mikoranire kandi ngo bizabashoboza gutegura uburyo bwo kubaka ikindi cyogajuru cya kabiri, no kugikoresha ku giti cyabo.
Muri uyu mushinga Ethiopia ifitemo abenjeniyeri mu by’isanzure 20, biyongeraho abahanga 60 bafite impamyabushobozi z’ikirenga bakorera ubushakashatsi n’amahugurwa mu Kigo cy’Ubushakashatsi kiri ahitwa Entoto.

Ni ikigo kandi gifite abanyeshuri bakomoka mu bihugu bya Afurika birimo u Rwanda, Tanzania na Uganda.

Uretse u Bushinwa kandi Ethiopia ikorana bya hafi n’ibindi bigo bitandukanye birimo ibyo muri Amerika, Chile, Koreya y’Epfo, u Bwongereza, u Bufaransa, u Burusiya, Espagne, u Butaliyani na Afurika y’Epfo.

Ethiopia kandi muri uyu mushinga ngo izashobora kuzigama amafaranga yajyaga itanga mu kugura amwe mu makuru igihugu gikenera kandi ishobora kubyikorera ubwayo.

Ni icyogajuru kizafasha gukusanya amakuru arebana n’ubuhinzi, amazi, ihindagurika ry’ikirere no mu bidukikije.

Ibindi bihugu bifite ibyogajuru byo muri Afurika ni Misiri, Ghana, Algeria, Afurika y’Epfo, Maroc na Kenya yohereje icyayo muri Gicurasi 2018.

Angola nayo yohereje ikindi mu Ukuboza 2017 ariko kiza gutakara mu mezi ane, iranateganya kohereza ikindi mu 2020 nacyo iri kubakirwa n’u Burusiya.

Mu 2017, Afurika Yunze Ubumwe yashyizeho politiki igenga imikorere y’ibyogajuru hagamijwe guteza imbere ikoranabuhanga n’itumanaho mu iterambere ry’ubukungu bwa Afurika.

U Rwanda rurateganya narwo kucyohereza mu isanzura mu mushinga ruri gukorana n’abahanga bo mu Buyapani.

Ethiopia izohereza icyogajuru mu kirere mu 2019

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza