Facebook yatangiye gukorwaho iperereza ku kubangamira ihangana ku isoko muri Amerika

Yanditswe na IGIHE
Kuya 6 Nzeri 2019 saa 05:49
Yasuwe :
0 0

Leta zitandukanye zo muri Leta Zunze Ubumwe za Amerika zatangiye iperereza ku kigo cya Facebook, ku bivugwa ko gikomeje kurenga ku cyizere cyagiriwe n’abakoresha serivisi zacyo no kubangamira ihangana ku isoko muri icyo gihugu.

Mu itangazo ryashyizwe ahagaragara kuri uyu wa Gatanu, byatangajwe ko iri perereza riyobowe n’Intumwa nkuru ya Leta ya New York, Letitia James, ririmo na bagenzi be bahagarariye leta za Colorado, Florida, Iowa, Nebraska, North Carolina, Ohio, Tennessee na District of Columbia.

Rizibanda ku ruhare rwa Facebook mu mpinduka ku biciro byo kwamamaza, umutekano w’amakuru n’uw’abayikoresha kimwe n’ibikorwa byayo biheruka birimo kugura Instagram na WhatsApp.

Iryo tangazo rivuga ko kuba Facebook imaze kwigarurira urwego rw’itumanaho rusange, hazarebwa niba nta myitwarire iki kigo gifite ishobora kuba ibangamira ihangana ku isoko bishingiye ku buryo kimaze gukomera.

James yagize ati “Ni urubuga nkoranyambaga rwa mbere ruruta izindi ku Isi rugomba gukurikiza amategeko kandi rukubaha abarukoresha. Nishimiye kuyobora iri perereza rihuriweho rigamije kumenya niba Facebook itarashatse kubangamira ihangana igashyira mu byago abayikoresha."

"Tuzakoresha uburyo bwose bushoboka mu gushaka amakuru ngo tumenye niba ibikorwa bya Facebook byarashyize mu kaga amakuru y’abayikoresha, bikagabanya ubwiza bw’amahitamo bafite cyangwa se bikazamura igiciro cyo kwamamaza.”

Iri perereza rije nka gishegesha kuri uru rubuga nkoranyambaga ruheruka gucibwa amande ya miliyari $5 na komisiyo ya Amerika ishinzwe ubucuruzi, ndetse ngo iyikomejeho irindi perereza ku bijyanye no kurenga ku mategeko.

Visi Perezida wa Facebook, Will Castleberry, yavuze ko abantu bafite amahitamo menshi kuri buri serivisi iki kigo gitanga, kandi ko bahagaritse guhanga bishya, abantu benshi bahita bava kuri Facebook.

Ati "Ibyo bishimangira ihangana duhura naryo, atari muri Leta Zunze Ubumwe za Amerika gusa ariko no ku Isi yose.”

Ikinyamakuru The Verge kivuga ko mu cyumweru gitaha, izindi leta zizatangiza iperereza nk’iri kuri Google.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza